الجمعة، 9 سبتمبر 2011

أفكار

-ديمن بيجي فدماغي أعمل حاجه ...أخرج مع انتمتي بعد الشغل,أروح اكل ايس كريم فدارين بطعمه الغريب وشكله البلاستيك ولما تمسكه بالمعلقه بيبقي عامل زي الموزيلا كدا:)بس أحلي حاجه انه ليه زكريات لما كنت فخروجه مع شلتي وجبنا من عندوا أيس كريم وقعدت أحدف الايس كريم بالشوكلا بتاعي عليهم وهم اصلا الشله كلها كانت جيه لبسه أبيض فأبيض (دا علي اساس انهم ملايكه يعني)
وأرمي عليهم شوكلا واجري...
واجري علي انتمتي تخبيني منهم واكرر الموضوع تاني
لحد ماتقريبا يومها انا وكلنا روحنا هدومنا مليانه شوكلاته من كتر اللي عملته فيهم وردوه فيا
مع ان النصيب الاكبر اخدته انتيمتي دفاعا عني
وحشني اليوم دا جدا ووحشتني الايام دي

-أيام تانيه كنا بنخلص محاضرات بدري ونخرج فوسط البلد مع بعض ونروح كافيه او نتمشي هناك نتفرج علمحلاات او نأكل واحنا بنتمشي لحد مانوصل علنيل ونركب مركب أو نتمشي من الاوبرا لحد حديقه الحريه اللي جنب الاندلس ونلعب كوتيشنه هناك
ونحكي كل همومنا لبعض ونحاول نلاقي حل وان مالاقيناش نتريق عليها ونطلع ليها نكت بتاعتنا احنا وبس
ولما كنا بنقعد علي طرف السور وعليه علنيل عدل ونقعد
نبص علي رجلنا ونتريق علي الشرابات بتاعتنا:)

كان بيبقي منظرنا توحفا
بس حبيت الايام دي اوي وكتير بفتكرها وبقول ياريت ترجع تاني
الشغل واللي الواحد شيفه فعلا أخده فدوكه وكل حد نسي نفسه وأصحابه فوسط مشغاله

بقي فين وفين لما نقدر نكلم بعض فون حتا مع الحكاوي بقا كلو كاتم فنفسوا
ببقي عوزا اعرف ايه اللي حاصل
أحساسي انهم حطوا سد منيع بينهم وبين كل حد حوليهم حتا اقرب الناس ليهم

لما حتا بيحكوا(الحمد لله....مافيش جديد...حصل خير)وقمه فالاكتئاب

-أحيانا كتير الفضفضه بتريح....طب ليه مش بنتكلم وبنرغي فأي حاجه تانيه
بحسها كتير خوف

خوف لنبان ضعاف,خوف اننا مانلاقيش حل,خوف ان اللي ادامنا مش بيقي أمين علي سرنا واول مشكله معاه يقول كل سرنا للناس,خوف من عدم معرفه الحق والصح فين

الخوف كتير بقا بيحكمنا حتا لو كنا لوحدنا او ملناش أسرار اصلا

-لو لقيت الشخص اللي حبيته أكتر حد فالدنيا أدامك وتواصلت معاه مره تانيه بعد ماالظروف بعدكوا عن بعض

وجه فوسط كلامه قالك انا أسف بس كانت ظروفي أقوي مني وماكنتش عاوز أظلمك
ياتري هتقول ليه أيه؟

-كتير لما بسمع دي بتتكلم عن دي او دا بيتكلم عن دول ببقي عوزا أقلهم حاجه واحدا
انتو هايفييييييين أوي....
مافيش حاجه بجد عوزين تعملوها فحياتكم غير الكلام وبس
بصوا علمشاكل الحقيقيه وحولوا تحلوها॥
طب ممكن تكون المشكله جواكوا
بدال ماتكبروا الموجود أصلا بكلامكم
حولوا حلوها يمكن....يمكن تتحل
وساعتها يبقوا ساعدتوا بدال ماانكوا دمرتوا

-حلمت حلم...ليه مليون تفسير وتفسير
بس هل ياتري هيتحقق ولا كالعاده....مجرد حلم؟

-لما الواحد بيتخيل بكرا
بيشوف ايه؟
بيته شكله أزاي,حياته فيها ايه,اولاده هيسميهم أيه
طب دا كلو ازاي من غير حببته يعني
ولا الدنيا مشيه كدا والسلام

-عوزا أقول حاجه من بدري....
متهيألي معظم القصص بتفشل بسبب الخوف
اه الخوف

الخوف من بكرا,الخوف من ان الطرف التاني فلحظه يسيبنا ويمشي,الخوف من الظروف
مليون خوف بنحسه بس ساعات بنتغلب عليه وساعات مش بنقدر
بس المشكله الاساسيه اللي بشوفها
وبالذات من البنات

هي خوفنا من الطرف التاني
تصرفاته,كلامه,مشاعره...
اه بنخاف منها
علشان شوفنا كتير وعرفنا كتير...فبنخاف من تكرارها علشان كدا بنبي سد منيع جدا لحد منتأكد من الشخص اللي قدامنا انه فعلا بيعمل الصح ويجي لباب البيت

هل دا تفكير صح ولا غلط؟

-ماتتهموش اي حد انه غلط
مش ممكن يكون صح بس لو تبصلها من زاويه تانيه؟

-مشكله الشخص الاجتماعي انه لازم يكون عارف كل حاجه ويصبر علي كل حد
وانا تعبت بجد
مش سهل تلاقي حد يفهمك...زي نفسك
ولا أيد هتمسح دمعتك....الا ايدك انتا

-وأخيرا وليس أخرا
كلها أفكار ورؤي واحداث
تحتمل الصح وتحتمل الغلط

بس مريت بيها فحياتي وشوفتها
وبحكي عنها

لذا
فهي تخصني وسواء عجبت ولا لا
فهي...بتاعتي وبس


تحياتي


هناك 11 تعليقًا:

  1. السلام عليكم
    حلوة قوى فضفضتك وذكرياتك ومرحك وانتى بتحكيها
    كمان خواطرك وافكارك وتكهناتك جميلة
    عشان واقعية قوى
    فأكيد هتوصل لكل اللى يقرأها
    دومتى بخير
    وفقك الله فى كل احوالك

    ردحذف
  2. السلام عليكم
    طبعا الذكريات الجميله عمرها ما تتنسى
    بس ليه الخوف انا معتقدش انى خايف
    يمكن لانى شايف الدنيا بمنظور تانى خالص
    بس كل اللى اقدر اقولهولك انك لما تلاقى ابن الحلال
    اللى يستاهلك عمرك ما هتخافى
    مش عايز اطول عليكى
    تحياتى

    ردحذف
  3. ازيك يا سونى
    تحياتى
    عدت من الاسكندريه اليوم
    بس الفضفضه حلوه وبتريح الناس ساعات بدلا من ان الواحد يكلم نفسه
    عاجبك اللى حصل دا فى السفاره اللى ما تتسماش
    مهما كان لازم مصر تحمى الممثلين الدبلوماسيين من جميع الدول ومش مهم بتوع مين المهم تطبيق الاتفاقيات الدوليه .. يعنى احنا كان لنا الحق .. ربنا يستر
    تحياتى .. ودى المدونه الجديدخ بتاعتى

    ردحذف
  4. ايووووة سونى فكرتينى بالنيل وذكرياته الحلوة والايس كريم فى عز الشتا

    عجبنى اووووى الكلام عن الحبيب ولو هرد عليه هقولوا مصدقاك

    اللى بيحب انسان بيحب يشوفوا سعيد ولو فى بعده عنى سعادته

    يبقى اتعذب انا عشان يكون سعيد

    الحب تضحيه ووفاء

    مش لازم يكون جنبى كفايه انه دايما ساكن قلبى

    فضفضه صريحه لاحلى قمر

    تحياتى

    ردحذف
  5. جميلة يا سونى فضفضتك وافكارك المجنونة وذكريات الحلوة
    اللى عمرك ما هتنسيها بدليل اهو دخلتى وكتبتى عنها
    الانسان اللى بيفضفض كده ويحكى بيرتاح
    والانسان اللى بيخبى بيفضل تاعب نفسه
    انا عن نفسى مش كل حاجة بقدر احكيها
    واللى بقدر احكيه مشش بحكيه للكل
    ولما يكون عندى سر او حاجىة جوايا ببقا هموووووت واقولها .. زى دلوقتى كده


    ياريت اقدر
    عجبنى البوست
    طبعا انا منورررررررررررررة :)

    ردحذف
  6. مساء الغاردينيا سوني
    فضفضي وقولي الي في قلبك
    لان اجمل حاجة هي حكايات القلب والذكريات
    بجد أستمتعت هنا لاني قريت روح عفوية وصادقة "
    ؛؛
    ؛
    لروحك عبق الغاردينيا
    reemaas

    ردحذف
  7. دايما ذكرياتنا هي حياتنا
    لما نفتكرها بنفتكر اننا كنا عايشين
    وطبعا عندك حق مش دايما احنا اللي مظلومين
    كل واحد ليه اسبابه وظروفه
    تحياتي

    ردحذف
  8. أرخم حاجة في الدنيا بجد...
    انك لما يكون عندك ذكريات جميلة ، تبتسمي لما تفتكريها و تتألمي من شوقك ليها ، و لما يكون عندك ذكريات سودة ، تتألمي لما تفتكريها و تبتسمي لإنها انتهت و بقت مجرد ذكريات...
    اي الحلاوة دي يا واد يا حسني و النبي انا بقول حكم ^_^

    ردحذف
  9. ايام زمان ما ينفعش ترجع تاني واحنا كنا بنلعب ونضحك ونجري ونقعد في جناين ونلعب كوتشينه ياااااااااااااه ياريت الايام الجميله ده ترجع ونلاقي وقت نقعد فيه على النيل ونتمشى على الكورنيش
    فعلا حياتنا سرقتنا

    ردحذف
  10. شكلك مضايقة
    عرفت منين؟
    لما تكتبي بوست اغلبه ذكريات جميلة
    وبعدين تدخلي علي فضفضة يبقا الحالة مش تمام
    ويبقا لما اقول ان الذكريات الحلوة بتألم اكتر من الوحشة ابقوا صدقوني

    ان شاء الله بكره احسن
    ومن غير خوف

    ردحذف
  11. بوست حلو اوي وفكرتيني بايام الجامعه
    كانت ايام حلوه اوي ما تتنسيش
    تقبلي مروري وتعليقي

    ردحذف