السبت، 26 سبتمبر، 2015

عاوزين نصيحه

 الضربه الي مابتموتش..بتقوي
هما قالو الكلام دا فين ولا منين....بجد
طيب
لما تيجي فعلا
من الاقرب
الاقرب قوي
بتبقي ايه
هاه
والخيانه لما بتوجع كدا
بتعملوها ليه

زمان .السبب الي خلاني اشتغل
وقررت بسببه اني اتبهدل فعليا
كان علشان اعرف الناس
لاني زيي زي بنات كتير
اتولدنا هبل
لا لينا فالطور ولا فأي حاجه
وتعبت من الجامعه كتير فالي حوليا
دا خلاني افكر
امال لما هعرف ناس من بره واتعامل خارج الاطار دا
هيحصل ايه

كان قراري اني اشتغل
علشان اقدر اعرف اتعامل واعتمد علي نفسي
اعرف اشوف الدنيا واوصل لمستوي ني اقدر احكم بالصح والغلط حوليا
من التجارب الي بتحصل ليا وحوليا

لكن الواقع الفعلي...
يترجم فكلمه ..الغابه وللاسف ملقتش كلمه أسوء من كدا
حمايه نفسي من الألم سواء بالبعد او اللا مبالاه 
فالاخر بعد الحوارات والي بيحصل لينا هنا
ومخصوصا بعد أخر ضربه الي هيا جت من اقرب صديقه ليا

خلاني أسال
الغلط فمين
وليه

هل لازم علينا اننا منثقش فأي حد للدرجادي
طيب احنا ليه بنعمل كدا فنفسنا
كون اننا كنا صحاب من ايام الجامعه
وموقف بسببه شالت منه
ودخلت بعد كدا تدمر اي حد من صحابها فطريقها
ليه
ليه يبقي فيه كدا
ليه بدال مانتي تقوي
تضعفي اكتر

ليه بدال مانتي تبقي حمايه
تبقي اكتر حد بيوجع
ليه حسيت فجأه اننا مبقناش بشر

كنت اتمني ابقي فوقت او زمن تاني
زمن او وقت مكنتش كل حاجه او الناس كدا
وهنرجع نقول مهو كل حاجه فيها الوحش والحلو
بس بصراحه
الواقع بيقول ان مبقاش فيه حلو اصلا
احنا بس الي بنحاول منشوفش بعنينا علشان منلاقيش الاسود فوشنا
دي حقيقه للاسف وموجودا

ومازالت اعيش فمرحله الوجع انا وصديقاتي
من اقرب صديقه لينا
عشره العمر الي هانت
وكل حاجه شاركنا بيها وكل وقت
ليه كل دا اصلا حصل
ليه بيحاول ناس كتير يخلوها غامق اللون كدا

طيب ايه العمل فانك بتحمي نفسك
ولسا بتتألم

لو في حل ياريت تشاركونا بيه


الأحد، 23 أغسطس، 2015

شويه كلام....



يمكن يكون الانسان عمره صغير... بس الاكيد مر بتجارب كتير غيرته,

ممكن يكون حصل فحياته حاجه غيرته للأحسن,او الاسوء
بس من الاكيد انه بيتعلم من الي بيحصله او من الي بيحصل حوليه

اتعلم انك مش بتقدر تثق فحد بعد ماأخدت طعن من أقرب الناس..أنت الي غلطان,شفت انهم من الاول مش أهل للثقه دي ووثقت فيهم علي أمل التغيير..ماحدش بيتغير ألا لما بيبقي عاوز دا من جواه

أتعلمتي انه بعد ماسابك لقيتي نفسك بتنسحبي من الناس والحياه..انا نفسي عملت كدا بس كانت أيه الفايده بأني أذيت نفسي لما بعدت عن كل حاجه بحبها..يمكن لحقتني ورجعت لكل حاجه بحبها
الصدمات كتير بتقوي بس احنا الي مبقدرش نفهم دا

عملت ايه لما حصل مشاكل فالشغل..مشيت وسبت كل حاجه وأتبعت طريقه المكسيكي فالهروب التكتيكي,
طيب هتتحل المشاكل ازاي بالهروب
أعرف ناس كتير مبقتش تقدر تواجه حتي نفسها..والحل؟
ادينا بنحاول نواجه كل حاجه..ساعات بننحج وساعات اكتر بنفشل
اه ماحدش بيتعلم بالساهل بس ادينا بنعمل حاجه ممكن تبقي صح فالحياه

أفكار كتير بتيجي فبال الواحد..طيب لو طبقها او نفذها هيحصل ايه؟؟


كل الي اقدر اقوله.. العمر بيعدي ومش بيستني حد
حاول تبسط نفسك علي أد ماتقدر
وأعمل الحاجات الي تفرحك..وبس
وانا نفسي فدا...يوما ما هعمله

 للحين ..اسمعوا أحلي ما في الحياه

الثلاثاء، 6 يناير، 2015

رساله ألي...

أدام ناس كتير وخرجت فتدريب وأتكلمت
- أنتي أخترتي مين يبقي مثلك الأعلي
امي
 - أمممممم..طيب ليه

انتو متعرفوش يعني أيه أمي

أمي أتربت هنا.بس تربيه صعايده
عرفين يعني أيه تربيه صعايده أكيد :)
أمي مثال للشده والقوه والحب والجلد والحنيه
وكل حاجه فبعض وعكس  بعض فنفس الوقت
تشد,, لما تغلط علشان تبقي عارف الصح فين
تلين,,في مواقف علشان المركب تعدي والدنيا تتظبط
انا مش عرفه اتكلم كتير

كنت أدام السبوره
كنت عوزا أملاها بكلام كتير أوي عنها
لدرجه ان السبوره تبقي مفيهاش مكان فعلا لكلمه تانيه
أمي
ميتقالش عنها كلام

أمي 
انا كتبتلك كل دا وانتي متعرفيش أي حاجه من دا
مش شيفاكي مثلي الاعلي وبس
انا نفسي أبقي زيك
لما حد بيحتاج حاجه معاه
عماد البيت
العيله والاصحاب وكل حاجه تقريبا تعتمد عليها
أمي انا فعلا خيفه عليكي من كتر ماالمسئوليات كبيره وأه عرفه
انك قدها بس أنتي بشر
سيبنا شويه نشيل عنك
لأ
أنتو كفايه عليكو شغلكو وحياتكو عيشوها وأهم حاجه تكونو 
كويسين ومبسوطين

-......
(انا بدمع)

-بحبك أوي
يارب ميحرمني منك
شكرا لأنك فحياتي

الاثنين، 29 ديسمبر، 2014

رسائل ألي ..... (1)

  انا قررت أني أبتدي السنه الجديده.. كل فتره هكتب حاجه جديده خلال الشهر دا والشهر الجديد للسنه الجديده وكل سنه وأنتو طبيبن 

رساله ألي...

أنت كنت فيوم أقرب ليا من النفس الي بتنفسه
كنت كل حاجه فحياتي
كنت باجي علي نفسي علشانك
أعمل الي يرضيك ويريحك وأنساني تماما
كان هدفي اني أخليك مبسوط وفرحان وبس
ونسيت نفسي
نسيتني بكل تفاصيلي
لحد مافيوم
قررت وبكل شيء أنك ...تبعد
أفتعلت مشكله..ومشيت وسبتني
وانا ماعرفش تهمتي أيه
خلتني أدوق وجع عمري ماحسيت بيه
فضلت موجوعه وقفله علي نفسي
الآقرب ليا كانو عرفين سوني كويس...مسابونيش
شويه شويه حاولت أني أخرج من الحاله دي
لحد ماقررت أنت ترجع تاني
ولأني كنت أنت لسا جوايا..سامحتك
وتقبلت رجوعك وعذرك ألي هو مش عذر
انت وكل الناس مقتنعين بحوار الظروف والحال والمحتال
لكن مش بالنسبالي...ألي عاوز حاجه وبيصمم عليها
وهي صح..ربنا بيبقي معاه وبيساعده فيها
وعدتني أنك مش هتعملها...لقيتك بتكررها تاني 
بعدت ورجعت..ولما أتقابلنا تاني قلتلي لأخر مره سامحيني مش هكررها
بس انا من وجعي قررت انها المرادي..الاخيره
لاني حسيت بأحساس جديد...عدم الأمان
ومحدش يعرف يعني أيه لما حد بتحبه تحس بعدم الامان من ناحيته...
كنت مقيده نفسي وقلبي بيك.. لو كنت استنيت فعلا انا كنت مستعده أستناك عمري كله
بس أنت بردو رجعت تاني 
ولأخر مره لعادتك القديمه.. بس انا كنت حسه انك هتعملها تاني
لما حبيت ترجع
كان فات الاوان
أديت ليك فرص كتير..بس علشان مأظلمكش
وأقدر اتحرر من وجعي ومن حبي ناحيتك
وأحرر نفسي..منك
أتعودت فأزماتي متبقاش موجود... وفعلا فكل مره انا كنت بمر بأزمه مكنتش بتبقي موجود
بس ربنا عوضتني بصحبه كانت هي الي بتسندني لحد ماقدر أقف علي رجلي
مش هنسي أول وقت قراري كنت موجوعه أوي وانت جيت وقفت قدامي ... انا اتسمرت مكاني,,, أتصايقت أوي من نفسي وتصرفي
بس ربنا كان فعلا ليه حكمه فالظروف الي حصلتلي
مبقاش في مكان تاني يجمعنا 
انا فمكان وانت فمكان تاني
مش هقلك شفت أنت عملت فينا أيه
بس كل الي عوزا أقلهولك غير ان بردو مازلت سوني
انا اتغيرت تماما بسببك.. مبقتش بتعلق بالناس
تجربتي خلتني اتعلق بالحاجات ودا كنت فيوم محتاجه أني اعمله
الوجع علمني حاجات كتير أوي
شكرا ليك
علمتني حاجات كتير أوي
وفعلا...العهده راحت لربنا
والمهم 
اني مهما حصل
مش هعرف أفتكرتك بالشر
وأتمني بردو أتغير للأفضل بعد كل تجربه بمر بيها
ديما ربنا موجود
وشكرا للي كانو معايا... أنتو هتفضلوا أحسن حاجه فحياتي مهما مرت بيا السنين

أنتظروا رسالتي القادمه

الاثنين، 20 أكتوبر، 2014

فاتيما

مش هنسي أول مره اتقابلنا فيها
مش هنسي حكاوينا وكلامنا
مش هنسي أحن قلب شفته
القلب الي بيطبطب علي الي حوليه
برغم الوجع
قدرت تطبطب علي القلوب
قدرت تبقي معانا ..برغم من الوجع
عرفتها
ومين ماعرفهاش
عرف قلبها وعرف يوسف منها

الرجوع واللقا
فرحه بعد وجع
يمكن كنت عوزا اكتب حاجات كتير
بس الفرحه جوا القلب مبتتوصفش
يارب يرجع كل بعيد ويقربه من أحبابه
يارب أفراحنا تكتر
اتوجعنا كتير
بس الفرح جاي
مستنيه أشوفك
مع يوسف

تتجمعوا علي خير
أمين

الثلاثاء، 7 أكتوبر، 2014

لازم...

لما يبقي في كلام عاوز تقولو بس مبتعرفش
بتحصل مواقف كتير في حياه الواحد

حصلت مواقف 
حسيت بيها فعلا بفرحه وبطبطه من اللي أدامي
ومواقف حسيت أن اللي ادامي لوحه (زجاج)
فرحه وأبتسامه وشكل (زجاج)
هوا وبس

فكرت فالمواقف الي مريت بيها
الحقيقي والزجاج

هو الي بيعلمك الدنيا
التجارب الي بنمر بيها
هي اللي بتبنيك
استفيد منها لأقصي حد
الي وجعك اتعلمت منه الصبر والعزه والكرامه
الي فرحك علمك معني السعاده
الي فضل مكمل معاك والي سابك
كل حد علمك حاجه 
فأنت بقيت انت
بكل حاجه حصلتلك
يمكن متحطتشي فمواقف كتير زي ناس 
يمكن ربنا حن عليا واداني علي اد مااقدر أستحمل
يمكن بكره هيبقي فيه مليون حاجه ليا


بس لازم من الصبر
لازم من الأمل
لازم اتعلم ونتعلم
لازم

الثلاثاء، 9 سبتمبر، 2014

عن.......

عن
 الفرحه لما تشوف حد

عن
 الطبطه في عز الوجع

عن
 التوهه فالحياه فتلاقي حد بيدلك علي الطريق

عن 
بحبك ... وبعدين بيمشي ويكمل الطريق

عن
 فيروز الصبح

عن 
كلام فورق في المحفظه

عن 
التفاصيل الصغيره اوي لما تلاقي البعيد بياخد باله منها
والقريب مش واخد باله اصلا من حاجه

عن
الاحتياج.. للمه .. للصحاب واللي بتحبهم

عن 
حاجات حاسس بيها ومش عارف تقولها

عن
الدفا فكل حاجه بتعملها وحواليك أحساس برود رهيب

عن
كل حاجه عملتها حلوه او وحشه..كفايه انك عملتها وانتا مقتنع بيها

عن 
بكره الي بتأمل فيه خيرا

عن
يارب....الي فالسجده وبتحكيله

عن 
المشهد الاخير من كل حاجه
المشهد الأخير الي فيه كل حاجه

عن
ألي نفسك نشوفهم من زمان..بس الظروف والمسافات
مبتسمحش

عن 
لحظه الغروب فمنطقه اللسان فراس البر
أخر الدنيا عندي

عن
النظره الي فيها كل حاجه بتتقال وبتتحس
بس من غير كلام

عن
خطوتك وانت وسط الناس بتشق طريقك

عن
كل دول
ربك
دينك
صلاتك
اهلك
اصحابك
كل حاجه حوليك

عن
كل حاجه
جت وهتيجي

شكرا
انا بقيت انا
بكل دا