الجمعة، 22 أبريل 2011

كان يما كان..عيد ميلادي


كان يما كان ياساده ياكرااااااام ومايحلا الكلاااام الا بذكر النبي عليه الصلاه والسلام
(موسيقي فوازير شيريهان فالخلفيه)
:)
(الصوره من عند الشوكه الناعمه ربنا يخليكي ليا)
كان في بنوته..من 22 سنه اتولدت وأسمها....سوني
البنوته دي كعاده البنات اتولدت ستعه فجريه(مش عرفه ليه الفجريه بسي..امه لا اله الا الله بتتولد فالفجريه)
ومن ساعه ماجت ملت الدنيا عياط وصريخ(كالعاده يعني)
وبما انها البنت الاولي فالعيله فطبعا طبعا...بالنسبه للجد والجده دي حاجه كبيرا
طبعا طبعا(لحد دلوقتي بالرغم من انهم توفاهم الله بس لسا فقلبي ديمن)
وبالرغم من ان جدي ماقعدتشي كتير وتيتا لحد ثانوي وتوفاها الله...بس تيتا دي بالذات ليها معزه كبيرا فقلبي جدا..الله يرحمهم

طبعا ابتدائي شقاوه وأعدادي انطواء
بس ثانوي هي المرحله الفعليه فحياتي..
لان فعلا لما ابتديت اعرف يعني ايه كلام واصحاب ودنيا عيشاها
عرفت يعني ايه لما حد يكذب وعرفت يعني ايه خداع
وكنت فكره ان كل الناس أنقياء بس اتعملت من مرحله ثانوي ان لا احد ملاك
بس بردو عرفت يعني ايه صداقه بجد..لسا في بنات من ايام ثانوي اصحاب لحد دلوقتي

في الجامعه بقا...دي اول كل حاجه بجد فيها
واخر كل حاجه بردو
جميع التناقضات والمتضادات والمفردات وكل حاجه..فالجامعه
تجربه لاتنسي من حياتي وصور وذكريات لاتنسي بجد

وانا دلوقتي فبدايه مرحله جديده..الشغل واللذي منو:)
أتمني بجد ان بلدنا تبقي حاجه كويسه وان ربنا يوفقني ويوفق الجميع لكل حاجه بيحبوها بجد

ويخلي ليا اصحابي وممتيني(ماما بتاعتي ..ومامي ستيته)يخليكوا ليا يارب
وكل سنه واختي طيبه وبخير يمامي...
يــــــــــــارب


الاثنين، 18 أبريل 2011

شعر جديد ..بس مش بتاعي

بدور عليها..شعر غنائي
_____________________

بدور عليها
جوا البحور بين الصدف
وأتمنا تجمعنا الصدف
والاقي قلبي بيتخطف
وسابني قلبي وراح ليكي

يشهد علي الحب القمر
وحتي أوراق الشجر
حبيبتي يا أغلي البشر
ياكل الدنيا ومافيها

والشمس تزعل في غروبها
علشان حتقفل أبوابها
أصل أحنا هوانا دوبها
وحبت النهار بينا

والليل لنهاروا بيلوموا
ويعاتبوا نهاروا علي لوموا
ويجيب الليل في نجوموا
ويسهروا مع حكاوينا

عارفك قبل ما أشوفك
وراسم قلبي بحروفك
وبحلم أمتا أشوف طيفك
ويفرح قلبي وياكي

يابحر وسحر وحكايه
يامعني الحب جوايا
مشتاق القلب لبدايه
ونفسه انه يلقاكي

من ديوان ضهر البيوت
لأستاذ أحمد عبد العليم

عجبوني أستأذته احطهم هنا
يارب يعجبوكم


الخميس، 14 أبريل 2011

الاثنين، 11 أبريل 2011

تهييسات

- عندي عاده بعتبرها سيئه:
قبل ماأنام وانا بنام متأخر॥اقوم ريحه علي التلاجه اعمل سندوتش جبنه بيضا وعصير برتقال
وديمن بابا يقفشني وانا ديمن بقولوا مش هاكل بليل تاني علشان خايف علي صحتي

-بعد ماسمعت خطاب الرئيس السابق مع عيلتي...
كلهم سكتوا وانا قعدت أضحك
بيقلولي بتضحكي علي ايه...
قلتلهم سيبوه يتكلم....هوا حد هيسمع؟

-الايام دي بحن لأيام زمان اوي
مااعرفشي ليه
وحشتني مدرستي..........وحشتني شله البنات بتاعتنا
وحشني حوش المدرسه وانا لما كنت بجري فيه
ارخم علبنات ويرخموا عليا ونفضل نجري ورا بعض
والجري دا ماعملتهوش فالجامعه خالص
وحشني الجري جدا

-نفسي اتقابل مع شلتي
كل شويه بحاول انزلهم الاقي الظروف منعتني
بجد وحشوني

-سألتني صحبتي
لو كنتي ارتبطي بحد وفركشتوا
ممكن ترجعي تكلميه عادي تاني؟
طب لو كنتي مكاني كنتي عملتي ايه
ماعرفتش ارد

-محتاجه للتغيير فحياتي
فما قبل २५ يناير
هوا بعد २५ يناير بالنسبه لي

-بعض الا حلام........
يجب ان تكون احلاما فقط
وبعض الجروح سطحيه ولا نراها
واخري عميقه ويصعب علينا...فهمها

-وأخيرا:
الصدفه....
خير من الف ميعاد



الأحد، 3 أبريل 2011

لماذا..........وكيف



انا لا أصدق


هل تصدقون

عندما كنت أري

اغمضت عيني...

تخيلت انني احلم


هل هذا مايحث؟

لا انني لا احلم

انها حقيقه...الي الان لا زلت مندهشه

هذا يحدث فعلا ولم يكن حلم بل هوا اسوأ من الكابوس

من فعلوها هل لم يسمعوا بأننا اخوه حتي فالثوره التي قامت؟

اذا لم نكن اخوه فالدم والدين والارض والعرض


نعم كما يقال أن(مصارين البطن بتتعارك)...

ولكن هذه ليست (عاركه) اخوه ابدا؟ بل انها

لا أجد لها وصفا... نحن فرحون بثورتنا وهم ايضا فهم من سبقونا وتعلمنا منهم كيف ومتي وماهي اول خطوات الثوره

حتي عندما فررنا من ليبا استقبلونا استقبالا حسنا يليق بأخوه لم يروا بعضهم منذ امد بعيد


بعد هذه المشاهد,جلست أبكي

ابكي مما حدث وابكي لأني فرحت بأن الكل بدأ يتحد مره اخري ثم تحدث فعله شنعاء تجعل الكل يفترق مره أخري


وبسبب ماذا؟؟

ليتها لسبب حقيقي...بل بسبب (كره)...مجرد كره قدم

ابكي بسبب المشاهد التي تحدث علي ارضنا وسيقال ان هذا هو (كرم المصريين)

ابكي من خوفي ان تفرقنا الكره مره اخري بعد ان توحدنا,سنفترق مره اخري

ابكي لعلمي بأنها ستؤثر كتيرا,وهذه المره موقعه الاستاد...ستنجح


ليتني قادره علي ان اصل لكل بيت تونسي.........لاعتذر عما حدث

وليت يرجع الصفاء مره اخري فنحن مازلنا في ثوره؟؟ونحتاج جميعا لدعم بعضنا


يالله لست قادره الا علي الدعاء بأن نخرج من هذا المأزق ونعود اخوه وصف بنيان مره اخري

كم اتمني ذلك

يــــــــــــــــــــــــــــــــــــــــارب