الجمعة، 30 سبتمبر 2011

أعتراف

-أعتذر عن البوست اللي فات لو حرج أو ضايق حد
كنت فحاله نفسيه صعبه

بس الحمد لله ربي كرمه كبير
شكرا لكل حد قلق عليا
شموسه ॥مامي॥عرفه॥هيثم السايس॥محمد متولي ॥ولكل حد سأل عليا وماعرفش يوصلي

شكرا ليكوا بجد

-في حاجات عوزا أغيرها فيا بجد
ممكن أكون بعمل حجات تضايق بس موش باخد بالي منها

بس موش هنسي كلام سمعته من شخص ما
صدمني

زعلت....بس الصدمه فوقتني
وحسستني ان لازم فعلا في حاجات لازم تتغير

شكرا

-حلم ليس له نهايه
يارب...سامحني وأغفر لي
واجعلني من بين من تحبهم يالله

-ياجدعااااااااان
من بوست كتبته امه لا اله الا الله أفتكرت اني فقصه

انا موش فقصه خالص
ولا هكون الا عندما يأذن ربي

ولحد ساعتها
بحب ربنا اولا
وماما ومامي ستيته وباقي المدونين حبايبي واخواتي وأصحابي
وانور وجدي:)

-مش بحب السياسه
فيها حاجه دي؟

-نفسي فخروجه من مدا
بس موش عرفه
سبت شغلي وروحت شغل جديد
وكان نفسي بجد أخرج واخد مدا قبل ماابتدي تاني
لكن ....قدري
الحمد لله

-محتاجه الفتره دي.....ايس كريم,شاي بلبن,واتفرج علي مسلسل جرايز اناتومي
بحب المسلسل دا جدا
بس بابا وماما بيضيقوا منه علشان فيه جو مستشفيات وكدا
بس هما موش عرفين ان فأخر المسلسل
بتأتي كلمات بتطلع منها حكم فعلا

حد شاف الحكم دي؟

-كنت بتناقش مناقشه اتعلمت منها حاجه
موش اي حد هيشوف اللي ادامه زي ماانتا شايفها

زي اللوحه مثلا لأمراه بوضع ما....
ناس هتشوفها قله ادب,ناس هتشوفها فن,ناس هتجمع بين المنظرين أو الرأيين

بس فالنهايه نخلي اختلافنا فالرأي لايفسد للود قضيه
ممكن؟

-هل فعلا الثوره أظهرت احسن....وأسوا من فينا؟
موش عرفه الصراحه بس حسه انها اظهرت الاحسن أكثر

-بحب ألبوم وائل جسار الجديد جدااااااااا...يخربيت صوتوا
واكتر منه,فيروز

يالله
بسمع صوتها او الموسيقي فاغانيها
بحس اني فعالم تاني فعلا

-راحه من كل شيء
هذا ماااريد

شكرا لك يارب





الثلاثاء، 20 سبتمبر 2011

يارب

يارب

خلصني

لتريحني
لتاخدني

ماعدتش قدره أستحمل
تعبت يارب

حسبي الله ونعم الوكيل
حسبي الله ونعم الوكيل

والله يارب تعبت

اديك شايف حالي
يارب

والله تعبت

يارب
ريحني بقا

انا تعبت عالاخر
وجبت أخري

جبت أخري يارب

والنبي يارب خدني عندك
يمكن أستريح

خدني يارب انا تعبت

يارب
نفسي استريح

نفسي

يارب


الجمعة، 9 سبتمبر 2011

أفكار

-ديمن بيجي فدماغي أعمل حاجه ...أخرج مع انتمتي بعد الشغل,أروح اكل ايس كريم فدارين بطعمه الغريب وشكله البلاستيك ولما تمسكه بالمعلقه بيبقي عامل زي الموزيلا كدا:)بس أحلي حاجه انه ليه زكريات لما كنت فخروجه مع شلتي وجبنا من عندوا أيس كريم وقعدت أحدف الايس كريم بالشوكلا بتاعي عليهم وهم اصلا الشله كلها كانت جيه لبسه أبيض فأبيض (دا علي اساس انهم ملايكه يعني)
وأرمي عليهم شوكلا واجري...
واجري علي انتمتي تخبيني منهم واكرر الموضوع تاني
لحد ماتقريبا يومها انا وكلنا روحنا هدومنا مليانه شوكلاته من كتر اللي عملته فيهم وردوه فيا
مع ان النصيب الاكبر اخدته انتيمتي دفاعا عني
وحشني اليوم دا جدا ووحشتني الايام دي

-أيام تانيه كنا بنخلص محاضرات بدري ونخرج فوسط البلد مع بعض ونروح كافيه او نتمشي هناك نتفرج علمحلاات او نأكل واحنا بنتمشي لحد مانوصل علنيل ونركب مركب أو نتمشي من الاوبرا لحد حديقه الحريه اللي جنب الاندلس ونلعب كوتيشنه هناك
ونحكي كل همومنا لبعض ونحاول نلاقي حل وان مالاقيناش نتريق عليها ونطلع ليها نكت بتاعتنا احنا وبس
ولما كنا بنقعد علي طرف السور وعليه علنيل عدل ونقعد
نبص علي رجلنا ونتريق علي الشرابات بتاعتنا:)

كان بيبقي منظرنا توحفا
بس حبيت الايام دي اوي وكتير بفتكرها وبقول ياريت ترجع تاني
الشغل واللي الواحد شيفه فعلا أخده فدوكه وكل حد نسي نفسه وأصحابه فوسط مشغاله

بقي فين وفين لما نقدر نكلم بعض فون حتا مع الحكاوي بقا كلو كاتم فنفسوا
ببقي عوزا اعرف ايه اللي حاصل
أحساسي انهم حطوا سد منيع بينهم وبين كل حد حوليهم حتا اقرب الناس ليهم

لما حتا بيحكوا(الحمد لله....مافيش جديد...حصل خير)وقمه فالاكتئاب

-أحيانا كتير الفضفضه بتريح....طب ليه مش بنتكلم وبنرغي فأي حاجه تانيه
بحسها كتير خوف

خوف لنبان ضعاف,خوف اننا مانلاقيش حل,خوف ان اللي ادامنا مش بيقي أمين علي سرنا واول مشكله معاه يقول كل سرنا للناس,خوف من عدم معرفه الحق والصح فين

الخوف كتير بقا بيحكمنا حتا لو كنا لوحدنا او ملناش أسرار اصلا

-لو لقيت الشخص اللي حبيته أكتر حد فالدنيا أدامك وتواصلت معاه مره تانيه بعد ماالظروف بعدكوا عن بعض

وجه فوسط كلامه قالك انا أسف بس كانت ظروفي أقوي مني وماكنتش عاوز أظلمك
ياتري هتقول ليه أيه؟

-كتير لما بسمع دي بتتكلم عن دي او دا بيتكلم عن دول ببقي عوزا أقلهم حاجه واحدا
انتو هايفييييييين أوي....
مافيش حاجه بجد عوزين تعملوها فحياتكم غير الكلام وبس
بصوا علمشاكل الحقيقيه وحولوا تحلوها॥
طب ممكن تكون المشكله جواكوا
بدال ماتكبروا الموجود أصلا بكلامكم
حولوا حلوها يمكن....يمكن تتحل
وساعتها يبقوا ساعدتوا بدال ماانكوا دمرتوا

-حلمت حلم...ليه مليون تفسير وتفسير
بس هل ياتري هيتحقق ولا كالعاده....مجرد حلم؟

-لما الواحد بيتخيل بكرا
بيشوف ايه؟
بيته شكله أزاي,حياته فيها ايه,اولاده هيسميهم أيه
طب دا كلو ازاي من غير حببته يعني
ولا الدنيا مشيه كدا والسلام

-عوزا أقول حاجه من بدري....
متهيألي معظم القصص بتفشل بسبب الخوف
اه الخوف

الخوف من بكرا,الخوف من ان الطرف التاني فلحظه يسيبنا ويمشي,الخوف من الظروف
مليون خوف بنحسه بس ساعات بنتغلب عليه وساعات مش بنقدر
بس المشكله الاساسيه اللي بشوفها
وبالذات من البنات

هي خوفنا من الطرف التاني
تصرفاته,كلامه,مشاعره...
اه بنخاف منها
علشان شوفنا كتير وعرفنا كتير...فبنخاف من تكرارها علشان كدا بنبي سد منيع جدا لحد منتأكد من الشخص اللي قدامنا انه فعلا بيعمل الصح ويجي لباب البيت

هل دا تفكير صح ولا غلط؟

-ماتتهموش اي حد انه غلط
مش ممكن يكون صح بس لو تبصلها من زاويه تانيه؟

-مشكله الشخص الاجتماعي انه لازم يكون عارف كل حاجه ويصبر علي كل حد
وانا تعبت بجد
مش سهل تلاقي حد يفهمك...زي نفسك
ولا أيد هتمسح دمعتك....الا ايدك انتا

-وأخيرا وليس أخرا
كلها أفكار ورؤي واحداث
تحتمل الصح وتحتمل الغلط

بس مريت بيها فحياتي وشوفتها
وبحكي عنها

لذا
فهي تخصني وسواء عجبت ولا لا
فهي...بتاعتي وبس


تحياتي


الثلاثاء، 6 سبتمبر 2011

كلمات

أشتقت أليه كثيرا
أين هوا الان

منذ أن أبتعد
لا أجد من يملأ فراغي
حتي أقرب الناس ألي

اللهم أحفظه يارب
وأجعله أمنا مطمئنا

أعتدت ان اجده في كل مكان حولي
أعتدت ان احادثه دائما يوميا

أعتدت حتي علي أن اجده في ذاكرتي
لكن منذ أن سافر
لايفارقني
كلامه
نظراته
احلامه
رؤياه

أشتقت أليه
ولكني لا أريد الاعتراف

لا أريد الاعتراف بما يهز كياني
فأنا
خائفه

دائما هكذا
الخوف يعتصرني
فهل من مخرج؟

(لصاحبه الرساله:يارب اكون وصلت الاحساس بطريقه جميله
أتمني ذلك)

ها ايه رأيكو؟