الاثنين، 20 ديسمبر 2010

انا جيييييييييييييييت نورت البيييييييت.........وأستاذي

والله ماتعرفوش الكام يوم دول وحشتوني اذاي
ربنا مايرجعهم.....يلا خير
المهم
وأنا مشيه فيوم مع ماما وخالاتي....بصيت شويه
لقيت أستاذي
معقوله
هو أستاذي
يااااااااه.....شكله أتغير
لكنه مكانتي فقلبه...عمرهاماتتغير أبدا
أستأذنت من ماما لما الكل طلع فوق وانا نزلت أسلم
يااااااااااه....بجد لما شفتوا أفتكرت ايام ثانوي وأصحاب زمان...اللي كل حد فيهم راح فحته
شويه بيسألوا وشويه لا...أو قول شويه لا وقله مندسه أه
بجد هو السبب فأني احب الانجيليزي....لاني طول عمري بكره الماده دي لحد ماجه ثانوي
هو نوع من المدرسين اللي بيوسعوا أفاق الطالب...مش بالضرب والعصيان
لا
بأنه يعرفني بجد...بيحببني فالحاجه بجد
بحكاويه بأسلوبه...بمواطن القوه والضعف مش فاللغه...فكل حاجه
بالمواقف العاديه واللي اللغه ليها باع كبير فأنها تتحل
ومواقف بجد بتتحكي ...كل دا جوايا انا....مش بقت بالنسبالي لغه وكدا
بسببه بقت لغه عشق

_أذيك يااستاذي...عامل أيه
_مين.....مين حضرتك؟؟
انا ووشي مفتوح بقوا مترين
_أستاذي مش فاكرني؟؟انا سوني
معلش ياسوني...أنتي عرفه الكبر بقي بيعمل أيه...أذيك عمله ايه
_انا تمام الحمد لله...وأذي حضرتك عامل ايه
_الحمد لله ماشي الحال...معلش أصل معظم اللي كنت بديلهم لما بيجي عينهم فعيني مش بيفتكروني...مااعرفشي الدنيا فيها أيه
_معلش يااستاذي الدنيا تلاهي....وقبل مأكمل كلامي أستأذن ومشي

كان نفسي قبل مايمشي...أقولوا هو غيرني أد أيه
كان نفسي أٌقولو...غيرت جوايا حاجات كتير من غير ماتعرف....غيرت عالمي كلو بمجرد معرفتي بيك يااستاذي
أتمني بجد اني اشوفك تاني...واقعد المرداي أرغي معاك
لاني بجد نفسي انهل من نهر معرفتك اللي محدش عالم أو حاسس بيه
أتمني

الاثنين، 13 ديسمبر 2010

ألي دودو عاشقه الرومانسيه.......وكلام مهم

دودو........يمكن لاول مره شفتك كان يوم البؤجه
بجد حسيت انك قريبه مني ومن الكل جدا
بنوته جدعه بميت راجل زي مابيقولوا....

أنتي علي فكره فيكي شبه من انتمتي جامد....تعرفي كدا؟
أول ماشفتك قلت هي البت نيما جت من ورايا ولا ايه
ولكن الحمد لله طلعهتي انتي ياام قلب دهب....
حسيتك شبهها وشبهي اوي


وبجد أتبسطت يومها معاكي جدا ومع بقيه فريق أسكندريه المحروسه
ولما كل شويه بترفعي حاجب وتنزلي حاجب....ونظره الشورير دي
كنت بضحك جداااا لما بتقفشيني كل شويه....ولحظات بجد هتفضل جوا قلبي

كل سنه وأنتي طيبه وبخير
كل سنه وكل اللي حوليكي كويسين وطيبين
كل سنه وأحنا ديمن حبايب واخوات وربنا جامعنا ديمن فمحبته
ويارب يكون اللي جاي أحلي من اللي راح
اللهم امين


.................................................................
انا ديمن كنت بزعل لما أعرف حد بيقول انو هيبقفل المدونه
أو هيختفي شويه
وكنت بسأل ليه بيعمل كدا

ماكنتش أعرف انو هيجي اليوم عليا
وأعمل كدا كمان

فأنا عن أزنكو هختفي حبه
لأني الفتره اللي جيه محتاجه أكون لوحدي...وأقدر أستعيد نفسي بنفسي
ومش بيدي أني أبعد كدا عنكوا يااغلي ناس
لكن الواحد مهما حصل...بيحتاح لوقت مع نفسو

يارب أشوفكوا علي خير
اللهم امين


السبت، 11 ديسمبر 2010

يوم....في الحسين

انتوا تعرفوا....في ايام ,الواحد فيها مبيبقاش حاسس بأي حاجه

وفي ايام بجد الواحد يفرق فحياتو اليوم بجد
اهو اليوم امبارح...كان فارق معايا كتير اوي اوي

كنا انا وكيارا متفقين اننا هنيجي بالبؤج بتاعتنا من بدري
ياعيني لما قابلتها أتاخرت عليها تلت ساعه وكانت هتاكلني॥
بس أكتر حاجه كانت بجد تتعب هي البؤجه بتاعتها لانها والحمد لله كانت مليانه
اقلها يابنتي اشيل معاكي تقولي لا علشان الثواب....أسمعي الكلام تقولي لا علشان الثواب
وشلت فالاخر الشنطه بتاعتها لحد ماوصل أستاذ خالد وداليا قوس قزح
لما شاف الشنطه مشي بيها وياعيني لحد ماطلع فوق ونزل...قلتلوا طب وشنطتي
قالي يعني كنتي قلتيلي علشان أشلهم...انا قعدت أضحك وقلتلو خير خير أتفضل
وقعدنا تحت لحد مالكل وصل وصلاه الضهر هتبدا...أحنا كبنوتات وستات طبعا والعاده بتاعنا وقعدنا نرررررررغي رغي لحد ماللجيران أشتكوا عقبال مايجوا الشباب من الصلاه
شويه وجت ممتي انا لقيت نفسي بتنطط واللي فأيدي اساشا مأخدتش بالي منو الا وهو علي الارض وانا بقفز علشان بقالي كتير مش شوفت ممتي
بجد كان يومي رائع جدا بوصولها ورغيها معانا الحبه دول
شويه واتحركنا كلنا للحسين بعد ماهي مشيت وحصلنا الباقي علي هناك
وقعدنا نلف فبيت زينب خاتون
وصور البيت للي عاوذ يتفرج عليها أهي
१०००००२९३५५२९५४" href="http://www.facebook.com/album.php?aid=39431&id=
واي معلومات عن البيت(زينب خاتون)
هنا:
http://form7000.maktoobblog.com/739551/%D8%A3%D9%85%D8%A7%D9%83%D9%86-%D9%84%D9%87%D8%A7-%D8%AA%D8%A7%D8%B1%D9%8A%D8%AE-%D8%A8%D9%8A%D8%AA-%D8%B2%D9%8A%D9%86%D8%A8-%D8%AE%D8%A7%D8%AA%D9%88%D9%86/
وطبعا قعدنا نلف فيه مدا وقعدنا ندور وأديناها زغاريد لان السلالم عمله زي كل البيوت القديمه تحس ان اللي طالع رايح يبارك للعرسان
والسوال اللي فضل فذهن الستات بالخصوص:هي الوليه دي كانت بتنظف البيت دا اذااااااااي؟؟؟
شويه وروحنا عند جاد أتغدينا هناك وعقبال ماروحت وصلت كيارا وجيت لقيت بتوع أسكندريه مشيوا.....بس بجد كان نفسي اسلم عليكم قبل مأامشي
وشويه وروحنا لكافيه فالحسين تبع مركذ الثقافه والابداع
بجد المكان كان وهم وخصوصا ان حوليه الحسين والازهر وبيت زينب خاتون وشغاله أغاني منير عليه
بجد كنت مبسوووطه أوي اني خرجت مع اللي بحبهم والرغي والنم اللي نميناه وبندندن مع منير انا وأيناس نهر الحب
وللناس اللي مجوش

فاطيما:طمطم بجد كنا عوذين نشوفك...تتعوض مره تانيه بأذن الله
سو باشا:والله اليوم كان محتاجك بجد....لاااااذمن تيجي المره اللي جيه
رامي:ناس سألت عليك علشان الشوكولاتات بس:)
علا صيدلانيه:لولا انك كلمتيني فأنا ماكنتش هسامحك
سميه ستار ان ذا سكاي:بجد اليوم كان محتاجك ياقمره...تتعوض المره اللي جيه
محمد متولي:بأذن الله اللقاء اللي جاي عندي.....لما نشووووف
الصباغ:يارب ياعم يكون اللي منعك المرادي خير
أستاذي أستاذ شيرين:انا بقي بجد كااان نفسي اشوف حضرتك جدا واقعد أرغيي معاك॥المره اللي جيه يارب تتيسر الظروف
منون....بجد كان نفسي انا وكيارا تكوني معانا...مره تانيه بأذن الله ياتؤامي الثلاثيكيكي:كان نفسي تكوني معايا بجد...المره اللي جيه لو ماجيتيش هقتلك


طيب واللي جم أيه نظامهم يعني؟؟
حااااااااضر هقول من غييير ضرب

أستاذه داليا وأستاذ خالد همس الاحباب.....خلااااااص انتو المسئولين عن اني كل مره أكون مبسوطه:)
بجد اليوم كان رائع يامجمعنا فالخير
قلب ريتشاردايه:بجد بجد اليوم كان رائع بوجودك...أييه كميه الضحك دي ياربي
انا مااقدرش اقعد ثواني من غير ضحك بسببك
دودو عاشقه الرومانسيه...اللي حسيت انها زعلانه بسبب غياب فاطيما...بأذن الله هنتجمع كلنا عن قريب بأذن الله...بجد وجودك فرق كتير معايا
ماميييييييييي.........والله ماتعرفي انا كنت عمله اذاي بعد ماتيجي...أتقلبت १८० درجه...واليوم كان بالنسبالي حلو بسبب وجودك بس
أيناس...يسلام لما دندنا مع منير...أكتشفت ساعتها انو حبيب الملايين:)
شيماء صبرني يارب...بجد أتبسطت انك جيتي انتي والاولاد ....وعرفت ساعتها معني فرق الطول
ضياء....الرغي كلووو....رايح جاي مضيقاك انا عرفه لاني مسبتش ودنك انا وكيارا ثواني
استاذ هاني...بجد اول مره أشوف حضرتك واتبسطت جدا بمعرفتك
ساجي...بجد أتبسطت اوي بالمناقشه معاكي انتي والبنوتات لما كنا فالمكتب॥أفحمتيني بجد
أحمد سكر...انا بجد كان نفسي اقعد أكتر معاكو انتا وضياء ووليد بس مالحقتش...ملحوقه ياعم لانك هتصدع مني انا عرفه
ريهام رضا ومروه ياسمين....مستنيه مدونتكو يبنات الخير ديمن معانا فالخير علطول يارب
غاده محسن...بجد أتبسطت اوي انك جيتي وانا عرفه اني ملحقتش اقعد معاكي لانك جيه وقعدتي بسبب زني عليكي
كيموووووووو.....يالهوي عليييييك....انا بعد كدا هسميك الفرعقلوز لانك كل شويه تضحك الكل ومش بتسيب حد الا لما يضحك حتي لو مودو وحش
وليد الدوغري....ماااااشي....مردودالك
كريم شاب فقري....أتمني ياعم يكون مودك بقي احسن لان كان شكلك تعبان
أستاذ شريه وخطبتو....بجد بجد ربنا يوفقكو يارب...أنت عرفت تختار وهي عمله نادره بجد
كيارا....أختي وصحبتي...بجد من غيرك ماكنتش عرفه اعمل ايه
رشا حفيده عرابي...يالهوتيييييييييي...حسه انك عمله زي ماما الرقه والطيبه كلها
ندا الياسمين.....انا عرفت انك زعلتي لانك مش لحقتي تسلمي عليا......يارب يخليكي ليا والجيات أكتر من الرحيات...بس من غير ضرب

يجماعه بجد والله ماعرفه أقول حاجه من كتر فرحتي باليوم والحمد لله
ميرسي ليكو يااستاذ خالد انتا وداليا لانكو مش عرفين اليوم دا بيفرق معانا قد أيه
ومستنياكو قريب بيوم تاني بأذن الله




الثلاثاء، 7 ديسمبر 2010

كل سنه وانتو طيبيييييييييييين


كل سنه وانتو طيبين

ويااارب

فالعام الهجري الجديد

دعوا كدا

يارب

أغفر لنا وأرحمنا يارب

وحقق لكل حد أمنيته

ويارب

بلدنا تكون أحسن يارب

اللهم امين

الأحد، 5 ديسمبر 2010

الالفيه

طبعا الكل عارف البوست بتاع فاطيما عن ذكريات المدونه
وأول مره تدوين

هو ايون مدونتي لسه مكلمتشي سنه.......يعني لسا بيبي
بس أتعلمت منها كتير اوي
أنا كنت متابعا عالم التدوين من سنه وزياده
واللي خلاني اقرر ادخل عالم التدوين هي ممتي الدكتوره ستيته....هييييييييييه:)

كنت دخلا فجوجل كتبت كلمات علشان ادور علي نماذج لحاجات عوذا اعملها علي الفيس
لقيت فأول مره جبلي موضوع من مواضيع ممتي وانا بصراحه عندي فضول قاااااااااتل لقرايه أي موضوع ادامي
قلت أشوف ايه الموضوع دا وبصراحه عجبتني لغه الكتابه وعجبني الموضوع جدا وكانت عن أول محاضرات لجمعيه المرأه المتوحشه(علطوول كدا ياممتي دخلت فالمود عدللللللل)
ولقيت ريدر المدونه وقلبت فيه فعجبتني كل حاجه الصراحه
ومنها عرفت المدونات التانيه

اما أول تدوينه ليا فكانت قبل الذلانطين بكام يوم
http://sony2000-sony2000em.blogspot.com/2010/02/blog-post_12.html
وأول كومنت من مدون كان من اللي ساعدني اني أعمل مدونه
محمود بطوط
وبقولوا شكرا كتيييييييير بجد لأنك كنت السبب الاساسي فاني ادخل عالم التدوين وتساعدني فعمل مدونتي لاني كنت لاأفقه شيء فعملها خالص

ومنها عرفت ناس كتييييييييير جدا جدا
ممتي...ستيته حسب الله الحمش...أحب الناس ليا بعد امي وابويا
فاطيما...يارب يوفقك لاني بجد بحبك جدا ويجمعك بيوسف قريب يارب
بطوووووووووط...ليك وحشه ياااااد وبجد عوذين نسمع عنك أخبار حلوا
كيمو....ميرسي ليك بجد وعلي وقفاتك يااجدع مدون
منون......بجد وحشاني جدا ومش هنسي الرغي اللي رغيناه فيوم الخير فرمضان...دي
حاجه تخصنا(وش بيغمز)ويارب اشوفك علي خير يوم البؤجه ياتوأمي الثلاثي
كيارا....أختي ومن التؤام الثلاثي بردو.......ربنا يخليكي ليا يارب ومايحرمنيش منك
وتفضلي علطول اختي وحببتي ديمن ونفضل نروح ونيجي مع بعض
مرمر:ميرسي بجد॥بأبتسماتك ونكتك ديمن بضحك حتي وانا موجوعه...ربنا يخليهولك
فميزان حسانتك ياصاحبه الابتسامه الدائمه
رامي...يااااااااااااجدععععع:)....بجد ربنا يوفقك لما فيه الخير ليك لانك حد بجد الكل
يتمني انه يعرفك ويتكون اخ ليك
صباغ....بجد مش هنسي رخامتك عليا .....وياكبير المنتقه اظهر وبان عليك الامان ياعمنا
المنتقه من غيرك مش لذيذا خاااااااااااالص
سووووووو..........عميد السووووين....بجد مبسوطه بمعرفتك ياابن المنتقه العزيزو
يارب كدا اعرف عنك كل خير
كيكي.........ربنا يخليكي ليا يارب ونفضل أخوات واصحاب...اجدع وحوووش
محمد متولي....ياااااااااعم ياطيب ربنا يخليك يارب وشكرا علي مساعداتك ليا فعالم النت
أبو حميد...والله ماعرفه اقلك أيه ...غير شكرا جزيلا وربنا معاك يارب
الاستاذ شيرين.....أستاذي دائما...سعدت بمعرفتك يااستاذي يانهر المعرفه
احمد سكر....ياأصيل ديماااااا:)
أستاذه داليا قوس قزح.....سباقه بالخير ديمن ومجمعانا...فميزان حسناتك بأذن الله
ضياء أحمد.......ربنا معاك يارب ويكرمك ...
غاده محسن....العزيزه علي قلبي دائما بسؤالها...ربنا مايحرمني منك يارب
محمد غاليا....مستنين كتابك الجديد وبكل خير أسمعو عنك يارب
ممكن....سباق بالسؤال دايمن.....ميرسي ليك ومبسوطه اني اتشرفت بمعرفتك
مها أحمد...ربنا معاكي يارب...وأعرف عنك كل خير ويوفقك فحياتك انتي واحمد يارب
ريموووو.......عزيزتي العثوله والمتوافقه معي دائما...يتمملك بخير انتي واسلام
يااااااارب.....وماتزعليش مني علتسيييح:)
رودي...يااحلي شخصيه بجد شفتها....المرحه دائما وابدااا...ربنا يخليكي ليا
وليد.......كل سنه وانت طيب ومدونتك بخير ياعم ياطيب وعقبال مانفرح فيك بقي
الشوكه الناعمه...بجد أتشرفت بمعرفتك وميرسيه ليكي ياأختي العزيزه
منار بيطريه....بحبها ومش بيدي......:) بجد بجد مبسوطه اني عرفت أخت زيك كدا ويارب أفرح بنجاحك ويوفقك ياقمر
بسمه عبد الباسط.....صاحبه الكلمات الرائعه ....بتعلم كل يوم منك جديد
صاحب مدونه تظبيط اللي مااعرفش اسمو....ربنا يكرمك يارب بمعلوماتك وانت كنت السبب فأن ماما تقرا مدونتك علشان معلوماتك ياعم

أتمني ان يارب مااكون نسيت حد
واتمني اني لو زعلت حد فيوم يسامحني
والي صاحبه عزيزه عليا...انا أسفه علي سوء التفاهم اللي حصل
لو بيحصل موقف انا مش بحب ازعل حد وبيكون سوء تفاهم مش اكتر
اتمني انك لو لحد دلوقتي زعلانه مني انك تسامحيني ولو بعاتبك لانك اختي وحد عزيزه عليا جدا جدا
واتمني انك تحاولي تتفهمي اي موقف حصل مني فمكنتش اقصده لو جرحك او زعلك مني لانك بجد بالنسبالي تهميني جدا
ولو زعلت حد فيوم أرجو انه يسامحني علي اي سوء تفاهم حصل منيي
ومبسووووطه ديمن يامدونين اني وسطكو ويارب يخليني ليكو وأفضل علطووووووول مرخمه عليكو
تحياتي





الجمعة، 3 ديسمبر 2010

خواطر

عندما قال لي لن أجد فالعالم مثلك ابدا
بكيت

عندما قال لي مثلما يقول دائما
لأخر مره:خلي بالك من نفسك
بكيت

عندما قال لي سأحبك الان والي الابد
بالرغم من فراقنا
بكيت


عندما قال لي:انا اعلم انك تحملتي كثيرا من أجلي
وكان كل مرادي ان تكوني تؤامي الي الابد
بكيت
وبكي

وأصبحنا نبكي معا

ولكن مع هذا
أخترنا ان نكون أحبابا مفترقين
علي ان نكون مقتربين...وكارهي بعض
وأهلنا ايضا


(ديمن القصص اللي بنتنهي بسبب تعنت الاهل
وديمن القصه اللي بتنتهي بنفس النهايه.........الفراق)
حالات لقتها حوليا كتير

الاثنين، 29 نوفمبر 2010

نجحت:)

أنااااااااااااااااااااااا نجحت
نجحت
نجحت

لولولوييييييييييييييييييييييييييييييي
أخييييييييييييييرا
وتخرجت خالث
مالص:)

عوذا من كل حد منكووووو هديااا حلوا
مليييش دعوه:))))))

الأحد، 28 نوفمبر 2010

يارب

يارب

انا خيفه علي بلدي أوي
احميها من كل شر
ومن كل شخص أراد بيها سوء

يارب
أحميها
واحمي ناسها وأهلها
بالرغم من اني تعبانه جواها
وكلنا كدا
بس بنحبها

يارب

الأحد، 21 نوفمبر 2010

الامل(تدوينه بفكره..........१)

الأمل

هو اللي بيحرك كل حاجه
شفت مشهد من فيلم أبن القنصل...لما كان ماشي مع باباه وبيقولوه امال فين السبايك اللي ضيعت جيل بحاله

مأاعرفشي جت فكره كدا فدماغي واستمرت أسئله كتير عليها

الامل اللي سواء الافراد أو الشعوب....بيدوروا عليه,أيه هو؟؟

انا لما فكرت.....لقيت ان الشعب المصري كان كويس زمان وسعيد ومبسوط بالرغم من الظروف المنيله قبل وبعد حرب ७३........هي الامل
الامل فبكره احسن....الامل فبكره أفضل لتعليم صح وشغل موجود وحياه مستقره و
جو صحي ونظيف
الامل فأن أعيش واتعايش...الامل فالنهاردا وبكره وبعدوا
الامل اني انهاردا كويس يبقي عاوز ان اولادي يكونوا احسن مني

بس اللي حصل حاجه تانيه
جت ناس أخدت كل مجهود الحروب اللي فاتت وهي اللي أستمتعت بيه وأستفادت منو
طب ونصيب الشعب المصري اللي حارب وأتاخد من اولادوا كتير
لدرجه أن زي ماسمعت من جدتي وأمي لما بيحكولي عن الايام دي:أن فكل بيت فمصر شهيد
نصيب الناس دي راح فين؟؟

وطبعا لما كل دا راح وبدأت بقي الاستفزازات..........
بنت الراجل دا اتجوزت الشخص دا وأتعملهم فرح بكام مليون وجه غني فيه المطرب كزا والمطربه كزا
الشخص كزا راح هرب كام مليون للبلد كزا وكل دا من فلوس الناس

ناس زعلت وناس اتحسرت
غير كدا المعاملات بقت وحشا......علشان كدا الكل بيخطف ويجري
لأن دا من أعتقادوا ان دا حقوا اللي مأاخدهوش

الحياه بقت أصعب...لأن مافيش امل فبكرا
أمل ان الاوضاع تتحسن وتتغير
أمل ان نصحي يوم نلاقي كل واحد واخد حقه بجد

بالرغم من كل دا
بحس كتير ان لسا الامل موجود
ففكره موجوده.....فضحكه طفل بالرغم من الظروف بيحاول أنه يكبر فوسط كل دا
لسا بردوا....... موجود
الامل


الجمعة، 19 نوفمبر 2010

خبر اكسبلووووووووووووسف

اللي يعرف ريمو
صاحبه مدونه أعقل مجنونه
ريمووووووووhttp://a32l-magnona।blogspot.com/

يتصل بيها ويقولها مبروووووووووووووك
لأن فتحتها اتقرت انبارح
عقبالكو يبنااااااااااااااااااااااات
والحمد لله انا قمت بواجبي كدا
وسيحت:)

الثلاثاء، 16 نوفمبر 2010

كل سنه وانتو طيبين


كل سنه وانتو طيبيييييين

ومن ربنا قريبين

ويارب يكون عيد سعيد عليكو يااحلي الناس

ودي عيدتي اهو خدوا بأه وعيشوا

الأحد، 14 نوفمبر 2010

الخميس، 11 نوفمبر 2010

الحمد لله...أحلي كلمه

الي هتكلم عنه دلوقتي بالرغم من انه تاعبني وواجعني لحد دلوقتي
بس هي تجربه كل حد ممكن فيوم يمر بيها او ممكن تكون حصلتلو او يارب يبعدها عنكو

أنا فيوم من الايام كنت ذي اي حد بتنطط وعيشه حياتي من غير اي هموم ولا مشاكل غير الاستعداد لأمتحاني ذي بقيه الطلبه
قبل الامتحان بيوم...أمي كانت بتشتغل فالشقه عادي جدا ذي مااتعودت بعمل معاها واحيانا بتسيب ليا كل حاجه اعملها
يومها امي قالتلي تعالي اشتغلي بدالي ياسوني شويه بس ...معلش هتعبك ياماما
قلتلها ولا يهمك ياست الحبايب...انتي بس استريحي وانا عن نفسي فاضيه...مهو اللي ذاكر ذاكر من ذماااااااااااان بقي
وانا بشتغل بذق وبشيل شويه حجات تقيله من اثاث الشقه
مأخدتش بالي ان في حجات بتتذق بوضعيات معينه علشان متأثرشي علي الضهر
وانا بذقها جامد ذي ماأتعودت...حسيت بألم رهييب فضهري جدا
وأستحملتوا لحد ماخلصت شغلي اللي ورايا...ساعتها مااقدرتش استحمل وصرخت بأعلي صوتي
مكنشي ينفع اني اروح لايمين ولا شمال غير كدا الامتحان تاني يوم
ماقدرتش انام يومها علي أساس انه شويه ألم وهيمشي
روحت امتحنت ...بس لقيت الالم خلاص مش قدره استحمله
روحت المستشفي وقالي الدكتور خدي شويه ادويه ومراهم كتبلي عليها وقالي استريحي بس اليومين دول
طبعا مكنشي في راحه والمفروض اني كنت اتابع معاه بعد كدا
الراحه مفيش والتوتر بسبب الامتحانات وغيركدا كان والدي تعب ووقع مننا وعمل عمليه خطيره جدا.......وأتضريت اني استحمل واستني كل دا لحد ماوالدي تم شفاؤه علي خير وابتدت رحله علاجي انا


كل دا مايهمش...اللي يهم فاللي جاي
روحت مستشفي تانيه بعد كدا...مستشفي احمد ماهر
بجد يومها انا خرجت مدمعه من اللي شفته هناك لحد ماوالدي ذعقلي....
وقعدت اقول فسري الحمد لله اني انا كدا دلوقتي لأني بالنسبه للناس اللي هناك اسمو دلع
الناس بجد تعبانه جدا....واللي أثر فيا بجد
طفل صغير...البرأءه فعلا في صوره الطفل دا....انا مش هقدر أنساه ابدا
الطفل في فدراعه شرايح باينه جدا جدا من جلده وجلد ايده متشقق وباين منها حديد الشرايح
وامه وابوه مسكين ايده غلط جدا وهو بيتألم عاوذ يعيط مش قادر
شوفت الالم والرعب فعيونه......تخيلوا لما حد بيحاول يقول ااااه ومش قادر
كل لما يحاول أبوه وامه بيبصلوه نظره تنم عن غباء شديد جدا
ماقدرتش اعمل حاجه غير اني ابتسم ليه واحاول اتكلم معاه
هو وسط كل الالم اللي فيه دا...أبتسم ليا بس لما حاول يتكلم معايا الاب والام بعدو بيه كتير وماقدرتش اتكلم معاه
كان نفسي اصرخ او اعمل اي حاجه...بس ما قدرتش
ودا اسوء شعور انك تحاول تعمل حاجه وماتقدرش


أتمني منكم بجد تدعو للناس اللي محتاجين لمجرد دعوه بالشفاء أن ربنا يتم شفاهم علي خير
ولو حد اتعرض لمرض او وجع او ألم
يقول الحمد لله ان دا حصلي....لأنو ساعات كتير بيحس بحاجات لايمكن انها تتوصف
بيحس انه قريب من ربنا جدا...وقريب من نفسه اوي اوي
والناس اللي بجد...بيكونوا معاه فكل وقت مهما حصل...وأن كمان في اسوء من حالته بكتييير اوي
الحمد لله علي اللي عندي وربنا يشفي كل مريض
اللهم امين

الاثنين، 8 نوفمبر 2010

مواقف

(१)
في جلسه عائليه...
مفيش فيها غير بنات وستات وبس
بنت بتدخل تسلم علي الكل....
-أذيك ياطنط...أذيك ياخالتو...عملين ايه...مش كلو تمام والحمد لله
ويبدأ الحصار:
هااا ايه الاخبار...مافيش عريس قريب
طب مافيش حد من الجامعه
طب مافيش حد من صحاب ماما عوذاكي لأبنها
طب مافيش ابن جيران موجود....
وتبص للأرض وتسكت
.......................................................
(२)
فقعده بنات فالجامعه
كل بنت بتتكلم عن نفس ذات الموضوع
انا خرجت انهاردا مع مودي حبيبي واتمشينا علنيل و...
وانا ذوغت من المحاضره وقعدت مع عمووور بيبي واتغدينا مع بعض و.....
وتيجي ناني مأنكشا زيزو وجين علي الموجودين وتكمل معاهم الكلام:انا بس يابنانيت جيت اسلم لأني هخرج معاه هنروح السنيما و....
وفوسط كل دا....بنت قعده معاهم وتسمع وبس
والكل بيسألها:وانتي ايه النظام
وتبص للارض وتسكت
........................................................
(३)
جلسه عائليه والاب بيتكلم
انا قلت مافيش غير دا
يعني مافيش غير دا...
ولو جه اللي قلتي عليه ....انا مش هوافق عليه
التاني جاهذ وكل حاجه جايبها من شقه لشغل لخلافو
احنا لسا هنتستني التاني لما لسا هيبتدي حياته من الاول
انا قلت كلمه ومش هتراجع عنها
وتبص للأرض وتسكت
...................................................
(४)
الأم خاله العروس
قعده معاها وبتتكلم
أنتي هتتجوذي ابني وذي ماقلتلك...مافيش نقاش
انا خالتك ومسئوله عن البيت المفتوح دا بسببي لحد دلوقتي
جت البنت تعترض فالخاله ذغدتها ادام الام والام مقدرتشي تعمل حاجه لبنتها
انا قلت كلمه واحده ومش هتراجع عنها
وتبص للارض وتسكت
.............................................
(५)
فمكالمه تليفون لبنت مع اقرب الناس ليها
واحدا بتحبها .....عمتها...وذي امها جدا
شوفي ياحببتي المناسب واقعدي اتكلمي معاه
وخدي وادي ولما تستريحي معاه فكري وخدي قرار بأه او لا
احنا فمجتمع مش هيسكت لو بلغتي سن معين الا لاذم تتجوذي
دي معظمها شكليات بس لاذم تكون موجودا
فرد انتي فمجتمع كلو كد....تفكيرو كدا
هتعملي ايه
وتبص للارض وتسكت


ياتري ليه بنخلي كل حاجه توصل لكدا
التفكير مش علي اي حاجه تانيه غير الموضوع دا وبس
اعملي وماتعمليش والبسي وماتلبسيش علشان خاطر الشخص دا
ليه مافيش نوعيات من القرارت دي
بس للشغل
للدراسه
للمستقبل العلمي والعملي ليها
ياريت نركذ علي الحياه بجد...مش علي موضوع واحد وبس
علموها تتعلم بجد...تتصرف فالمواقف اللي ممكن تتعرضلها فالحياه
والتفكير السليم والصح علشان تاخد قرارت فحياتها صح
مش اي حاجه والسلام وممكن تندم عليها بعد كدا
ياريت






الأحد، 31 أكتوبر 2010

الله يرحم ايام زمان

قبل أي حاجه وكل حاجه ارجوكم بصوا علي الخبر داnews:http://www.melody4arab.com/news/%d9%85%d8%ad%d9%85%d8%af-%d8%b9%d8%a8%d8%af%d9%87-%d8%a7%d9%84%d9%84%d9%87%d8%ac%d8%a9-%d8%a7%d9%84%d8%ae%d9%84%d9%8a%d8%ac%d9%8a%d8%a9-%d8%aa%d9%81%d9%88%d9%82%d8%aa-%d8%b9%d9%84%d9%89-%d8%a7%d9%84/%d8%a7%d8%ae%d8%a8%d8%a7%d8%b1-%d8%a7%d9%84%d9%81%d9%86/?utm_source=feedburner&utm_medium=feed&utm_campaign=Feed%3A+melody4arab+%28%D8%A7%D8%AE%D8%A8%D8%A7%D8%B1+%D8%A7%D9%84%D9%81%D9%86%29
محمد عبده:اللهجه الخليجيه تفوقت علي المصريه في الساحه الغنائيه
ااااااااااه....الله يرحم ايام زمان
لما ماكنتوش حاجه اصلا
ولولا فلوس البترول ....ماكنتوش هتبقوا
اللي خلي اللهجه المصريه تنتشر...لما كان في نهضه بجد
فالفن والثقافه والسياسه والاجتماع ...بالرغم من كل الحروب اللي خاضتها مصر علشان نهضتها ونهضه بلاد العرب والدفاع عن ارضها وارضهم
جه اليوم...اللي يتقال عنها كدا
اي حد يطلع....يقول المسلسل السوري احسن من المصري
ويجي حد تاني...يقول اللجه الخليجيه أفضل من المصريه
اللي عندكم دا...مش نهضه بجد
النهضه مش بأيد الخليجين نفسهم...لا دي من برا وبالفلوس
لما طلعت اللهجه المصريه....كانت بسبب الاغنيه المصريه والمغنيين المصريين
اللي الكلمه منهم والصوت بيطلع بأحساس....والفيلم المصري اللي بيقدم موضوع حقيقي بيتكلم عنه
حد يقدر ينسي أم كلثوم ولا عبد الحليم حافظ أول مغني غني للون الخليجي
ولا يوسف وهبي ولاامينه رزق أو سعاد حسني السندريلا
أو فمجال الشعر ذي حبيب قلبي جاهينلو...أو فمجال الادب ذي العقاد او طه حسين أو احسان عبد القدوس...أوفي مجال الصحه أو في مجال الرياضه أو فأي مجال حطينا بصمه فيه
ممكن أن دلوقتي نكون فكبوه...بس طول عمر مصر ولاده
مش بالفلوس او بغيرنا لما ندي ليهم ويجوا علشان يعملوا لينا نهضتنا
واللي أتكلم دا...لولا الشعرا والملحنين المصريين...مكنشي عمل حاجه أو اغنيه اصلا
نفسي أشوف بجد لما الفلوس دي هتخلص أيه اللي هيحصل
ويتبقي العمل اللي يخلد بجد...مش الحاجه التجاريه اللي بتاخد وقت وخلاص
ياريت كل حد بجد يعلق يقول رأيو بكل موضوعيه
لأني شكلي خبطت فالحلل:)
تحياتي

الأحد، 24 أكتوبر 2010

حمله مدونات فالميزان

أكيد كلكو سمعتوا عن حمله مدونات فالميزان
بجد من اللي قريتوا عنها
وبالذات فالمدونات الصديقه او الشقيقه
ان كل حد يقيم مدونته او المدونات التانيه
وبما اني مش عرفه اقيم مدونتي اساشا
فالدعوه مفتوحه ليكم علشان تكتبوا اي حاجه عجبتكوا او حتي نقد
لمدونتي ذي ماانتم عوذين
وبالتوفيييييييييييييق:)

الخميس، 14 أكتوبر 2010

كومنت من عند بطوط:)

عم بطوط سأل سؤال عندوا فالمدونه
ياريت كل واحد يكتب ذكرياته بعد ماقرا البوست اللي هو كتبوا
ففضلت ان اكتبوا هنا بما ان هوا بوست عن اللي فات من ايامنا

صراحه انا احسن او افضل ايام ليا كانت فثانويه عامه,لأني لقيت بنات شبهي بجد
فتره ابتدائي دي مش فكراها اوي صراحه
واعدادي دي كانت اخر مرمطه صراحه:)
لأنها كانت فمدرسه السنيه اعدادي وطبعا معروف بناتها من غير مااقول
كل اللي عرفتهم وقتها بنت واحدا لاني موش متعودا علي جو ال......(ممكن اقول ردح يعني ولا بلاش)......لا بلاش:)
وطبعا لاكنت بجيب ولا أودي لأني متربيه فبيئه غييييير
لأن تربيتي مغلقه نوعا ما من خوف اهلي عليا وطبعا داخل فيها الدماغ الصعيدي ودي معروفه لوحدها
ودول بسم الله ماشاء الله...مش محتاجين توصيه
بعدها جتلي حاله اكتئاب شديده من محيط البنات اللي حوليا,افتكر كلام ماما وقتها
قالتلي ياسوني لاذم تتجدعني وتجيبي مجموع كبير
لأني لو ماعملتيش كدا,هتلاقي كل الناس دي معاكي فثانوي عام
وأخدت قرار فعلا ان افضل اذاكر واجيب مجموع علشان اغير المدرسه
والحمد لله ربنا اراد كدا فعلا وروحت مدرسه ثانوي بتاعتي
بجد بنات غير...شبهي اوي بجد ,فيهم من طباعي واخلاقي كتير...مدرسين محترمين وبنحبهم وبنقدرهم موش موجود ذيهم دلوقتي...والاكتر من كدا مدير المدرسه:استاذ زغلول...الله يمسيه بالخير,يارب اسمع عنهم كلهم كل خير
مستر زغلول دا بقي مقلكوش,عرفين شخصيه السهل الممتنع,هو دا
بيحب يضحك ويهذر مع كول الناس خصوصا الطالبات:)
بس بجد وقت الشغل مايعرفشي مييييين,وهو كان سبب تفوق المدرسه كلها,حبنا واحترامنا ليه بجد مايتوصفشي ولمدرسينا كولهم
تتصوروا اني لما جيت ازور المدرسه هما افتكروني وانا كنت مكسووووفه لاني كنت فاكره انهم نسيوني تمااااااااما:)
اما فتره الجاااااااامعه دي بقي شفت كل حاجه وعرفت كل حاجه
اول فتره عرفت فيها تعامل مع اولاد لأني صراحه عمري ماتعاملت معاهم قبل كدا...اول فتره اعمل فيها نشاطات واتعرف علي ناس وثقافات مختلفه....اول فتره اعرف فيها معني التهجيص والتهييص واللذي منو.....اول كول حاجه عرفتها او عملتها كانت فيها صراحه:)
نفسي فأييييييييييه؟؟نفسك فأييييه ياسوني
نفسي ان كل الناس تفرح بجد....نفسي ان كل الناس تبطل تتكلم عن كل الناس من وراها لأن دا عامل مشاكل كتير اوي بتوصل احيانا لحجات منيله لسه اثارها موجودا بالرغم من ان فات فتره عليها...نفسي اولا واخيرا ان ربنا يكون راضي عني ودي اكتر حاجه تهمني
اللهم امين
معلشي طولت علييييكو كالعاده ...بس تبعا عرفييين سوني رغايه وبتحبكوا قد ايه
:)

الثلاثاء، 12 أكتوبر 2010

خاطره(३)

عندما نظرت لها...وجدتها فرحه
هذه فعلا
عينان فتاه تحب
وتذكرت
كنت يوما ما...مثلها
فقلت:يااااااارب
وابتسمت

(الخاطره دي بهديها لواحده قريبه من قلبي جداااااااا
وبقلها ربنا يسعدك ويهنيكي يااااااارب كدا
واشوفك مبثوووووووووووووطه علي طول
اللهم امين:)

الخميس، 30 سبتمبر 2010

وبصت لبعيد

وبصت لبعيد
دا رد فعلها لما حكتلي حكايتها
قالتلي:انا تعبت بجد ياسوني
-من ايه بس
من كل اللي حوليا وبالذات والدي
-خير فيه ايه
بصي...نفسي احس انه ابويا
كل شويه بهدله وامر وذعيق ودعا عليا
مع ان مفيش حد بيساعدوا او بيشوف كل حاجه بيطلبها غيري
حتي الدوا انا اللي بجيبوا وبيدهولوا لانك عرفه هو تعبان اد ايه
انا تعبت بجد
وياريتو عاجب
كل دا علشان اخويا الصغير
لما بقولو اعمل حاجه....او ساعدني فحاجه...بيقوم مذعقلي
احيانا بموت من التعب...بس لاذم اسمع كلامو
لما اعترض ولا اتكلم...بيقعد يدعي عليا دعاوي وحشه اوي
ان ربنا يرذقني بأبن الحرام...وان ربنا ياخد مني صحتي...
-وانا لقيت نفسي بدمع...واخدتها فحضني لاني عرفه الكلام دا كويس
عرفه امبارح...لقيت نفسي بقول حسبي الله ونعم الوكيل بأعلي صوتي لاني تعبت
اخواته الاكبر منو اعمامي بيعاملوه وحش
انا مالي...لما دعيت اخر غلبي...قام اداني قلم فوشي
محستشي بوشي...
-قلتلها لا غلط اللي عملتيه دا...ماينفعشي كدا
دا اكبر غلط...موش صح
قالت:هعمل ايه يعني..ووسط دموعها كملت...انا تعبت
حتي ماما موش قدره تتصرف..كل ماتتكلم بيتخانق معاها ...وهي صحتها فالناذل اصلا
حتي دلوقتي بتدورلي علي عريس
قلتلها ليه كدا يماما؟؟
عرفه قالت ايه
-قلتلها قالت ايه؟؟
قالتلي نفسي اجوذك علشان ابعدك عنو....انا تعبت بجد ياسوني...وسكتت وعيطت
-قلتلها بصي ياستي...لاذم تصبري
دا موش علشانوا دا علشان ربنا اولا واخيرا
فيوم الموقف العظيم هتتكلمي تقولي ايه
يارب انا ساعدتوا وعملت كل حاجه علشان ارضيك
ولا هتقولي يارب انا اهملت فيه علشان هو عمل كذا وكذا؟؟
لا...انتي اتقي الله فمعمالتك معاه...واصبري
ربنا بأذن الله هيكرمك بحد كويس جزاء لانك شلتي بباكي...وبعدين كما تدين تدان
انتي لما تكبري ويكون عندك اولاد...هيجي اللي يشيلك فكبرك ويبقي عكازك فالايام اللي جيه
وبعدين اصبري...لان الحياه كدا ...وقولي الحمد لله
انك عندك اب حتي لو هو كدا...وعندك ام ...في كتيير اوي ماعندهمشي كدا
عندك حياتك وحوليكي ناس واصحاب بتحبك والحمد لله ...كفايه ان ربنا محبب فيكي خلقه
وبعدين ياعثوله انتي هيجي فيوم اللي هياخدك مننا وموش هنعرف نشوووف وشك تاني...وابقي قابليييييييييني يومها هتعرفي ام حد فينا من اللي هتلاقيه يااوختشي
وقعدت تضحك ضوحك وتبتسم...وقتها حسيت انها بقت كويسه وتقدر تكمل
سؤالي هو ليه الاهل احيانا بيعملوا كدا...بحس انهم بيرموا كل حاجه فنفسهم علي اولادهم
اكمن ربنا حطهم تحت اديهم...مش قدرين يفهموا ان دول هديه من ربنا ليهم موش عند ناس تانيه بيتمنوا ضفرهم فبيسيؤا معاملتهم وبيطلعوا عليهم كل حاجه؟
نفسي بجد يقدروا اللي فأيديهم...بدال ماهيجي اليوم اللي هيكونوا فيه لوحدوهم
ويحصدوا اللي زرعوه

الأحد، 26 سبتمبر 2010

خواطر

عندما احبته
لم تر سواه

عندما احبته
لم تتمني غيره

لكنها لم تعرف...انه سيتركها...ويعود من حيث اتي...ولا يرجع اليها مره اخري


(تهيسه كدا قبل الامتحان...ادعووووووووووولي)

السبت، 18 سبتمبر 2010

دعوا عاااااااااااااااااااااااااااااامه

بما ان اكتر الناس قالوا ان الاسبوع اللي جي دا الكل موش فاضي بمناسبه الدراسه وكدا
فكيارا اقترحت ان لقاءنا ممكن يتأجل ليوم७ او ८
(يوم سبعه او تمانيه من الشهر دا بأذن الله)
هي قالتلي ان في موفأجه اييييه هي الله اعلم
فاللي يقدر يشوف اليوم الانسب ليه ياريت يتقدم بأقتراح
لان الكل واحشني جداااااااا جدااااا
وانا معاكو فأي يوم بأذن الله تختاروه بس بعد يوم ستع لان عندي امتحان
شوفوا اللي يناسبكوا وانا معاكو يااحلي ناس:)

الأربعاء، 15 سبتمبر 2010

ضرورييييييييييييييييييييييييييييييييييي

بجد وحشتوني جداااااااااااااا
ياجماعه بجد عوذين كلنا نتقابل تاني
والفكره دي فدماغ الكل من أخر مره اتقابلنا فيها فأبو الريش
مبدئيا ياريت الكل يفضي نفسو فالاسبوع اللي جاي
علشان يبقي في يوم نقدر نتقابل فه
قبل دوامه الدراسه والشغل
ياريييييييييييييييييييت
واللي مواقف نحاول نحدد يوم
وبأذن الله هنقدر
يكون غداء او نتقابل فأي مكان
اللي موافق يرفع ايدوووووووووووووووووووووا

السبت، 11 سبتمبر 2010

حرااااااااااااااااام

حراااااااااام بجد اللي بيحصل كل شويه
بدال ماالناس تتبسط فالعيد وتفرح
تلاقي اخبار تخلي بهجه وفرحه العيد تروحhttp://http://www।youm7.com/News.asp?NewsID=276432
يعني احب اخرج مع شلتي ولا مع صحباتي فالعيد
ممكن يحصلي ذي البنات دول؟؟؟
حراااااام بجد
احنا عوذين نخرج ونتفسح ذي خلق الله
نلاقي اخبار عن تحرشات جماعيه فالاماكن اللي كل الناس بتتفسح وتخرج فيها
مره وسط البلد...مره حديقه الفسطاط
مره حديقه الاورمان
ايييييه......كفايه بجد تعبنا
هو احنا يعني بنخرج علشان دا عيييد
المفروض ان كل الناس تتبسط وتضحك وتهذر وتستمع بالجو والخروج
ليه في ناس مصره انها تعكنن علينا؟؟
ودول مين اللي بيعملوا كدا ....انا خايفه فيوم ليقولو بلاش خروج للستات والبنات بعد كدا
علشان مايحصلهمشي كدا
يعني دول يتسابوا واحنا اللي نتحبس فالبيوت علشان اهلنا خايفين علينامن الحجات دي
بجد تعبت ونفسيتي دلوقتي ذي الذفت
لما احب اخرج مع صحباتي وبنات خالاتي اللي موش بشهفم غير فالاعياد
يقلولنا لا علشان احنا خايفين عليكم منهم
يعني حبس اجباري
نفسي اقول لا واروح مع البنات ونروح الاماكن اللي عوذين نروحها من غير مايحصلنا حاجه
ولا نكون مشيين خيفين لا فأي لحظه تحصلنا حاجه
ليه الاوضاع وصلت لكدا
نفسي اعرف........حد يفهمني
بأي حال جأت ياعيد
وأخر حاجه هقولها:(اللهم اني اشكو اليك ضعف قوتي,وقله حيلتي,وهواني علي الناس,برحمتك استغيث,انت رب المستضعفين وانت ربي,ألي من تكلني,الي بعيد يتجهمني؟ام الي عدو ملكته امري ,أسالك بنور وجهك الكريم اللذي أشرقت به الظلمات وصلح به أمر الدنيا والاخرهمن ان يحل بي غضبك او ينذل علي سخطك,لك العتبي حتي ترضلا ولا حول ولا قوه الا بك)
موش هقدر اقول غير كدا.....يارب انقذنا مما نواجهه ومما نحن فيه

كل سنه وانتو طيبييييييين:)

كل سنه وانتو طيبين يااحلي ناس وعيد سعيد عليكووووووووو
معلشي جت متأخرا جدا بس هعمل اييه؟؟
شغل البيت اللي لاذمن يخلص قبل العييييييد:))
يارب يكون عيد سعيد عليكم يارب
وديمن عالم التدوين والمدونين بخير وفسعاده للابد
فييييييين عيديتي
عوذاها حجات كبيرا ملييييييش دعواااااا:)
كل سنه وانتم طيبيييين

الأحد، 29 أغسطس 2010

يوم الخيييييييييييييير

بكتب دلوقتي من تاني يوم بعد اليوم الرائع..اللي اجتمعت في مع من احبهم بجد
في مستشفي ابو الريش الياباني
صلو علي النبي...............:)
كان يما كان..ياسعد يااكرام..ومايحلا الكلام....اللي بذكر النبي عليه الصلاه والسلام
بحكيلكو عن اجدع واحلي ناس قابلتهم وبجد كان نفسي اقابلهم من مدا طويله والحمد لله ان ربنا حقق امنيتي
لما جيت روحت المستشفي ...لقيت ادامي بنوته كانت ذيي تقريبا بتدور علمستشفي,لانو كان فأعتقادي انها المستشفي اللي جنب المحطه علطول...ماطلعتشي هي خاااااالث
وطبعا لاذم امشي...امشي,واذ فجأه لقيت بنوته ادامي..قلت دي اكيييييد تبع المدونين
بس قلت ممكن ماتطلعشي هي فأتضريت للسؤال من الناس اللي موجودا(وطلعت تبعنا فعلا فالاخر لانها كان ميييييييين؟؟
(منون العثوله)واللي كمان روحت معاها اخر اليوم واتصلت تتطمن عليا..ايشي بنانيت حلوا ينااااااااااس:)
المهم بردو قعدت امشي...لقيت بردو واااحد ماشي قدامي فنفس الطريق..(قلت فعقل بالي...هي مصر كلها جت ولا ااااايه ياجودعاان)بس طلع فالاخر تبعنا
وطلع رامي صاحب مدونه بابي
ومن موقعي هذا احب ان اقولو......سنكس علي الشيكولاتات الجمدا ياكبير
بس ملحقتش اكل منها حاجه لاني مجرد ماوصلت هنا اتااااكلت والحمد لله
اول ماوصلت اخيييرا...كلمت الاستاذه داليا وبجد حد محترم وذي ماتوقعت بالظبط
يارب انتي والاستاذ خالد تجمعونا ديمن كدا فالخير
وبعديها جت ناس كتير اوي وبجد ماكنتش مصدقه كميه الناس دي...حتي بردو مكنشي منهم مدونين بس جم يعملوا الخير لما حسوا انهم ممكن يعملوا حاجه صح
اول واحده بجد كان نفسي اشوفها:فاطيما
بجد بجد اتبطست اني شوفتك امبارح وكان نفسي اقعد معاكي اكتر واكمل رغي قبل ماايوم يخلص وماتذعلييش مني اكيد وجعت ودنك من الرغي انا عرفه...بس حسيت اوي انك مامتنا كلنا موش مامه يوسف بس
الاستاذ شيرين...استمتعت جدا بالكلام مع حضرتك عن عالم التدوين والكلام عن البنات وفعلا كنت غايه فالذوق والادب والاحترام وحضرت مثال للأب فعلا اللي بيخاف علينا كلنا
رودي...الاخت الكبيره اللي كان نفسي اشوفها من ذمان...والضحك والكلام اللي موش بيخلص معاكي خالص...وشكرا ليكي بجد ...بس ياريت المره اللي جيه تجيبي نور معاكي بأذن الله
الاستاذه حفيده عرابي الهدوء كله...وليد الدوغري الاخ الشقي...كيارا التؤام الثلاثي لي....كبير المنتقه الصباغ....شاب فقري اللي قعدت اجادل معاه ساعه بس بجد اتبسطت ان كان في حبه رخامه ياذميل الكليه...نوران خيخه اللي كان نفسي اقابلها واشوفها من بدري صاحبه الشخصيه القويه...ضياء بيوتيفل ميند بجد اتبسطت اني شفتك واتعرفت علي الناس الحلوه دي.....كيكي عووووووووو والشيكولاته الحلوا والضحك الكتير...ممدوح دوحه والضحك والهذار اللي موش بيخلص والاخ الاكبر ...استاذه واندا كلمتك شويه بس حسيت انك قريبه مني....البنات اللي مااعرفهمشي من الفيس ايه ودوعاء وبقيه البنات اللي كان نفسي اعرفهم اكتر وحسيت انهم اخواتي....منار بيطريه وموش بأيدي ياخواتي علي الهدوء وقمه الادب:)
منوووووووون الاخت التانيه فالثلاثي المرح
كانوا بيشوفونا انا وهي وكيارا بيقولو اننا شبه بعض وعملين ذي التؤام الثلاثي...اذاي دي مااعرفشي ,فالاخر طلعنا شبه بعض اهو واتبسطت اني روحت معاكي ودي كانت احلي حاجه فاليوم
بجد كان يوم ممتع جدا وخصوصا اننا كملناه في وسط البلد فالدايرا الكبيييييييييرا والمشروبات بأه .......يااااااعيني:)
كان نفسي بجد يكون مامتي موجودا لكن لظروف رمضان مجتشي...والله كان نفسي تيجي
محمد غاليا حملي سلام لناس وبقولك ....الامانه وصلت....خالتي بنسلم عليك
ويارب ديمن نتجمع فالخير علطول
اللهم امين

الجمعة، 27 أغسطس 2010

الوفيه للابد.........مها احمد

سوري يجماعه اني ماردتشي علي البوست اللي فات
لأني لسا مكلما مها صاحبه مدونه الوفيه للابد ..مها احمد
بتسلم علي الجميع
وبتقلكم بجد وحشتوها جدااااااااااا......وعالم التدوين بردو وحشها
وبتعتذر انها موش متابعا الايام دي
علشان شغلها واخد منها كل الوقت
وموش عرفه تتواصل
وبأذن الله هترجع تاني لما تقدر بأذن الله
وطلبت مني اني ابعت السلام للكل فردا فردا للمدونين كلهم

الأربعاء، 11 أغسطس 2010

دعوه مقاطعه

كل سنه وانتو طيبين ورمضان كريم

طبعا انتو عرفين ان رمضان السنادي مليان مسلسلات ذي كل سنه يعني
بس بجد انا من اول يوم
النهارده
شفت شويه حجات ضايقتني
أول مافتحت التليفزيون....ويااااااااااريتني مافتحته
أتصدمت..
الممثله المشهوره....لبسه حجات ماينفعشي تتلبس فرمضااااان
ياللي بتعرضو المسلسلات فرمضان
انتو خليتو رمضان عباره عن موسم مسلسلات موش شهر فضيل نتعبد فيه ونقرأ القرأن ونتقرب من ربنا

ولهذا........ومن مكاني هذا
ادعوا لمقاطعه المسلسلات والافلام والعوده بجد للصلاه وقرأه القرأن فالايام الفضيله
عسي ان يرجع فعلا رمضان واللي بنحس بأيامه بالفرحه الطاغيه برجوعه
لاني حسه الايام دي بأننا فأيام عاديه جدا
فرحه رمضان اللي بحسها ديما
موش حساها السنادي

فقررت اني اقاطع كل المسلسلات والحجات اللي بجد ماينفعشي انها تتعرض في الشهر الفضيل

وياريت..........لو انتم كمان ماتفتحوش التلفيزيون
بجد ياريت كلنا نعمل حركه مقاطعه للدش واللي بيتعرض عليه
وتساعدوني علي اننا نرجع للشهر الفضيل عباداته بجد....وصيامه بجد
بدال ماناخد ذنوب اكتر من اللي علينا
عسي ان يكتبنا الله من عتقاءه فالشهر الفضيل
ودمتم سالمين

الخميس، 5 أغسطس 2010

الحمد لله

الحمد لله
الحمد لله
الحمد لله
بابا عمل العمليه .......ونجحت والحمد لله

لقيته امبارح بيكلمني فالتليفون وبيقلي انتي فين,قلتلو فالبلكونه
قالي ايون شايفك
ببص تحت لقيته فالشارع

كان هاين عليا اذغرط ولا اعمل حاجه
محستشي الا بالاندفاع وكنت عوذا اخدوا حضن جامد لولا انه كان تعبان

الحمد لله انك رجعتلي بالسلامه
الحمد لله:)

الاثنين، 26 يوليو 2010

ابي

انا دلوقتي جوايا مليون احساس

بابايا دلوقتي بيعمل عمليه مااعرفشي ايه هي حتي...مرضيش يقولي

ممكن اكون اختلفت معاك كتير ...ممكن اكون ذعلتك مني فحاجه...بس برجع اصالحك تاني لأني عرفه انك حتي لما بتذعقلي بتبقي خايف عليا من العالم اللي برا ده

دلوقتي بجد حسيت انا اد ايه مفتقداك

لما لقيتك الصبح بتبوس جبيني....خفت قوي

مقدرتش امنع الافكار الوحشه انها تيجي فدماغي...يارب يرجعك ليا بالسلامه



يمكن مافهمتش ليه انت بقالك كام يوم متعصب ..بتقولي مشاكل فالشغل

ماهي المشاكل علطول موجودا...اشمعني المرادي



مليون حاجه كنت عوذا اقولها قبل ماتمشي...وانت بتقولي خلي بالك من اخواتك ياسوني...انتي الكبيره وحافظي عليهم...

كنت عوذا اقولك حجات كتير اوي...بس مااقدرتش اتكلم



يااااااااااااااااااااااااااارب ترجعلي بالسلامه....اللهم امين يارب

الأحد، 18 يوليو 2010

خايفه

-خايفه جدا
ليه بس يابنتي....من ايه قولي؟؟؟؟؟(دا انا)
-خايفه ليكون بيتسلي بيا
يرااااااااااااااجل.....(دا بردو انا...كالعاده برخم)
الظااااهر ان في حاجه ..قري واعترفي بدال ما.....انتي عرفاني
-بأبتسامه صغيره كدا...بدأت تحكيلي:بصي ياسوني
انا من فتره حسه بحاجه غريبه من ناحيه حد كدا...مااعرفشي ايه هي
بجد حد كويس وكل حاجه
هو جه وقلها فوشي..انه بيحبني وعاوذ يتقدملي
بعد نفاذ صبري وشويه هشد شعري منها....امااااااااااااال ايه المشكله بس
-ياسوني انتي عرفه..كل القصص اللي حولينا مفيش ولا وحده منها انتعت صح
يأما مكملين غلط..يااما الموضوع بايظ بايظ وموش قدرين يسيبوا بعض بالرغم من في حجات موش صح بيعملوها
انتي ذي ماشايفه كدا في حاجه مبشره؟؟؟
انا خايفه...يكون كلام وبس علشان يتسلي بيا
في ناس كتير اوي..اوي بيعملوا حجات ذي ماشفتي كدا بأسم الحب والجواذ غلط كتير
وفي بنات احنا عرفنهم كويس..قالوا موش هنعمل وموش هنسوي..للاسف لقيناهم اتقلبوا 180 درجه
انا خايفه اضعف ذيهم
بعد اما ضربت عصير المنجه اللي بحبو بتاعي..والتفكير قليلا قلتلها بصي يابنتي
طبيعي انك تخافي وطبيعي انك تقلقي من اللي جاي
بس ماتخليش خوفك دا يبقي خوف وتردد
صحيح حصل حولينا كتير..ويعتبر كل القصص فشلت الا من رحم ربي
بس ذي مافي فشل في نجاح بردو...حتي لو في فشل اكيد البنات بتتعلم من التجربه دي واللي مرت بيها
انها ماتصدقشي اي كلام يتقلها..وتفكر وتخلي عقلها قبل قلبها
بس خلي بالك...ان البنات دي هما حطوا نفسهم فوهم كبير ..لاهو قلها انا عاوذ اخد خطوه رسمي ولا غيرو
مشيوا ورا قلبهم ووصلو لدرجه ممكن انه هو نفسه مايبصلهاشي بعد كدا علشان كل حاجه ادتها قبل اوانها
لاذم كل حاجه تديها الاول بالعقل...ولما تمشي بالعقل هتعرف الصح من الغلط
وبعدين دول كانو بيتسلوا ...لكن اللي جايلك دا حد محترم وانا مشفتش انه عاوذ يتسلي ولا حاجه وجه وخبط علي الباب
يعني موش عاوذ يقضيها ولا حاجه...وماتخفيش..وقت الذنقه قوليلي بس وهتشووووفي
ومعلشي ياااااعني...ليا نظرا فالناس بردووو..هيهيهييييييييي
-وضحكت وبصتلي بصه غريبه...بس عرفت معانا ايه وكملنا اليوم مع بقيه البنات
المشكله ان فعلا القصص اللي كانت حولينا خلت الواحد يتعقد..مبين خروج من ورا الاهل...رايحين وجايين مع بعض وانكجه بقي والجو دا...وطبعاااااا السيكرته اللي اعرفها اللي بجد الكبار لو عرفوها هتبقي مشكله كبيره جدا
بس ممكن يكون عندها حق لان مفيش حد مضمون الايام دي
وبردو نرجع نقول هنشوف التصرفات ونخلي بالنا من كل حاجه بنعملها..موش علشان خاطرنا لا
علشان خاطر ربنا اولا........صوح كلامي و لااااااااااااا:)