الاثنين، 29 ديسمبر، 2014

رسائل ألي ..... (1)

  انا قررت أني أبتدي السنه الجديده.. كل فتره هكتب حاجه جديده خلال الشهر دا والشهر الجديد للسنه الجديده وكل سنه وأنتو طبيبن 

رساله ألي...

أنت كنت فيوم أقرب ليا من النفس الي بتنفسه
كنت كل حاجه فحياتي
كنت باجي علي نفسي علشانك
أعمل الي يرضيك ويريحك وأنساني تماما
كان هدفي اني أخليك مبسوط وفرحان وبس
ونسيت نفسي
نسيتني بكل تفاصيلي
لحد مافيوم
قررت وبكل شيء أنك ...تبعد
أفتعلت مشكله..ومشيت وسبتني
وانا ماعرفش تهمتي أيه
خلتني أدوق وجع عمري ماحسيت بيه
فضلت موجوعه وقفله علي نفسي
الآقرب ليا كانو عرفين سوني كويس...مسابونيش
شويه شويه حاولت أني أخرج من الحاله دي
لحد ماقررت أنت ترجع تاني
ولأني كنت أنت لسا جوايا..سامحتك
وتقبلت رجوعك وعذرك ألي هو مش عذر
انت وكل الناس مقتنعين بحوار الظروف والحال والمحتال
لكن مش بالنسبالي...ألي عاوز حاجه وبيصمم عليها
وهي صح..ربنا بيبقي معاه وبيساعده فيها
وعدتني أنك مش هتعملها...لقيتك بتكررها تاني 
بعدت ورجعت..ولما أتقابلنا تاني قلتلي لأخر مره سامحيني مش هكررها
بس انا من وجعي قررت انها المرادي..الاخيره
لاني حسيت بأحساس جديد...عدم الأمان
ومحدش يعرف يعني أيه لما حد بتحبه تحس بعدم الامان من ناحيته...
كنت مقيده نفسي وقلبي بيك.. لو كنت استنيت فعلا انا كنت مستعده أستناك عمري كله
بس أنت بردو رجعت تاني 
ولأخر مره لعادتك القديمه.. بس انا كنت حسه انك هتعملها تاني
لما حبيت ترجع
كان فات الاوان
أديت ليك فرص كتير..بس علشان مأظلمكش
وأقدر اتحرر من وجعي ومن حبي ناحيتك
وأحرر نفسي..منك
أتعودت فأزماتي متبقاش موجود... وفعلا فكل مره انا كنت بمر بأزمه مكنتش بتبقي موجود
بس ربنا عوضتني بصحبه كانت هي الي بتسندني لحد ماقدر أقف علي رجلي
مش هنسي أول وقت قراري كنت موجوعه أوي وانت جيت وقفت قدامي ... انا اتسمرت مكاني,,, أتصايقت أوي من نفسي وتصرفي
بس ربنا كان فعلا ليه حكمه فالظروف الي حصلتلي
مبقاش في مكان تاني يجمعنا 
انا فمكان وانت فمكان تاني
مش هقلك شفت أنت عملت فينا أيه
بس كل الي عوزا أقلهولك غير ان بردو مازلت سوني
انا اتغيرت تماما بسببك.. مبقتش بتعلق بالناس
تجربتي خلتني اتعلق بالحاجات ودا كنت فيوم محتاجه أني اعمله
الوجع علمني حاجات كتير أوي
شكرا ليك
علمتني حاجات كتير أوي
وفعلا...العهده راحت لربنا
والمهم 
اني مهما حصل
مش هعرف أفتكرتك بالشر
وأتمني بردو أتغير للأفضل بعد كل تجربه بمر بيها
ديما ربنا موجود
وشكرا للي كانو معايا... أنتو هتفضلوا أحسن حاجه فحياتي مهما مرت بيا السنين

أنتظروا رسالتي القادمه

الاثنين، 20 أكتوبر، 2014

فاتيما

مش هنسي أول مره اتقابلنا فيها
مش هنسي حكاوينا وكلامنا
مش هنسي أحن قلب شفته
القلب الي بيطبطب علي الي حوليه
برغم الوجع
قدرت تطبطب علي القلوب
قدرت تبقي معانا ..برغم من الوجع
عرفتها
ومين ماعرفهاش
عرف قلبها وعرف يوسف منها

الرجوع واللقا
فرحه بعد وجع
يمكن كنت عوزا اكتب حاجات كتير
بس الفرحه جوا القلب مبتتوصفش
يارب يرجع كل بعيد ويقربه من أحبابه
يارب أفراحنا تكتر
اتوجعنا كتير
بس الفرح جاي
مستنيه أشوفك
مع يوسف

تتجمعوا علي خير
أمين

الثلاثاء، 7 أكتوبر، 2014

لازم...

لما يبقي في كلام عاوز تقولو بس مبتعرفش
بتحصل مواقف كتير في حياه الواحد

حصلت مواقف 
حسيت بيها فعلا بفرحه وبطبطه من اللي أدامي
ومواقف حسيت أن اللي ادامي لوحه (زجاج)
فرحه وأبتسامه وشكل (زجاج)
هوا وبس

فكرت فالمواقف الي مريت بيها
الحقيقي والزجاج

هو الي بيعلمك الدنيا
التجارب الي بنمر بيها
هي اللي بتبنيك
استفيد منها لأقصي حد
الي وجعك اتعلمت منه الصبر والعزه والكرامه
الي فرحك علمك معني السعاده
الي فضل مكمل معاك والي سابك
كل حد علمك حاجه 
فأنت بقيت انت
بكل حاجه حصلتلك
يمكن متحطتشي فمواقف كتير زي ناس 
يمكن ربنا حن عليا واداني علي اد مااقدر أستحمل
يمكن بكره هيبقي فيه مليون حاجه ليا


بس لازم من الصبر
لازم من الأمل
لازم اتعلم ونتعلم
لازم

الثلاثاء، 9 سبتمبر، 2014

عن.......

عن
 الفرحه لما تشوف حد

عن
 الطبطه في عز الوجع

عن
 التوهه فالحياه فتلاقي حد بيدلك علي الطريق

عن 
بحبك ... وبعدين بيمشي ويكمل الطريق

عن
 فيروز الصبح

عن 
كلام فورق في المحفظه

عن 
التفاصيل الصغيره اوي لما تلاقي البعيد بياخد باله منها
والقريب مش واخد باله اصلا من حاجه

عن
الاحتياج.. للمه .. للصحاب واللي بتحبهم

عن 
حاجات حاسس بيها ومش عارف تقولها

عن
الدفا فكل حاجه بتعملها وحواليك أحساس برود رهيب

عن
كل حاجه عملتها حلوه او وحشه..كفايه انك عملتها وانتا مقتنع بيها

عن 
بكره الي بتأمل فيه خيرا

عن
يارب....الي فالسجده وبتحكيله

عن 
المشهد الاخير من كل حاجه
المشهد الأخير الي فيه كل حاجه

عن
ألي نفسك نشوفهم من زمان..بس الظروف والمسافات
مبتسمحش

عن 
لحظه الغروب فمنطقه اللسان فراس البر
أخر الدنيا عندي

عن
النظره الي فيها كل حاجه بتتقال وبتتحس
بس من غير كلام

عن
خطوتك وانت وسط الناس بتشق طريقك

عن
كل دول
ربك
دينك
صلاتك
اهلك
اصحابك
كل حاجه حوليك

عن
كل حاجه
جت وهتيجي

شكرا
انا بقيت انا
بكل دا





الأحد، 3 أغسطس، 2014

اللا نهايه

أحساس انك فدايره
بتلف وتدور بيك
مش عارف تعمل حاجه جديده
بتحاول تخرج برا المود الي أنت فيه
يكاد انه يبقي مستحيل

بتراضي اللي حوليك
الشغل والبيت والأصحاب
طب وأنت

نفسك فأيه
يووووووووووووه
نفسي فحاجات كتير

أفرح
نفسي فالفرح أوي
مش عرفه أفرح
حتي لما بيجي
بيبقي فرح ناقص
بتبقي الحاجه ناقصه
الحكايه مش سعاده
انتا مش هتبقي مبسوط وسعيد لوحدك
بس بحب جتي لما اكون مبسوطه وسعيده
بعمل شير ليها مع الي حوليا
................
كلنا فينا وجع ما
من الي حوليا
مبنقدرش نتكلم عليه
بس بيبقي وجع جوانا بس..كتير مبيطلعش بره أتنين
حكايات لاتنتهي
..............
لو بطلنا نحلم,,
............
أحلامي مبقتش أحلام
كتير منها بتبقي حاجه لبعدين
فرحه تيجي..بس أمتي يارب
انا مرهقه جدا
عوزا أعمل حاجات علشان اقدر اجدد فحياتي
بس مش عرفه
أحساس المربوط فساقيه دا مش بيخليني أستمتع بعمل أي حاجه فحياتي

هو الاحساس دا بيجي منين
عوزا أخلص منه ومش عرفه 
بقالي كتير مش باجي هنا
فبيتي الأصلي
بحس هنا انه عامل زي بيت جدو وتيتا
زكريات جميله اوي
بس كل شويه بروح وبغيب وباجي كل فين وفين
قلقي اني أنسي هنا
انسي المكان الي بفضفض  فيه

..............
يارب
اننا ننتظر رحمتك
فقربها منا يالله
فكلنا موجوعون
ونحتاج
للطبطبه

وشكرا يارب

ملحوظه:
مش هقدر أنسي طبطبتك عليا يارب
الفتره الي فاتت

بس انا محتاجاها فحياتي كتير اوي
ولناس اعرفها محتاجين أكتر
عرفه انك مش ناسينا
بس احنا بطبعنا
مستعجلين 
سامحنا علي أستعجالنا

سامحني علي كل حاجه وحشه عملتها وزعلتك مني
او حاجه حلوه كنت المفروض أعملها ومعملتهاش

.............................
مكنتش فدماغي حاجه أكتبها
بس لقيت نفسي بكتب
بس

لكل حاجه حسه بيها
لما لانهايه

الأحد، 25 مايو، 2014

حياتي

الحياه بتمشي بقرارات
قرار انك تكمل ...قرار انك تسيب
قرار انك تعدي وتخليها مش فرقه معاك
برغم من أنها تفرق
بس علشان متسيبهمش
وتعيش لوحدك
.....
أبويا
بكره ميعاده مع القلب المفتوح
وأنا خيفه
بكره المستشفيات وعندي فوبيا منها
عودتني صديقه ليا أهدي نفسي وأفتكر بس دخلاها علشان مين
بس كل مره بتعب جدا
أبويا المرادي موجوع ومتغير
انا مش عرفه أعمل حاجه
غير أني أدعي
واقرر
هعمل اي حاجه علشانه
حتي لو تعبتني المستشفيات
مفيش مفر
مفيش حل بديل

مفيش اني أستحمل 
علي الاقل علشانه

ادعو
ادعو له كثيرا
يارب
رحمتك
يارب

الجمعة، 9 مايو، 2014

الحياه

حياه الشخص مننا
 بين

 وبين

احنا بقي المصريين 
بنبقي كدا
كتر خيرنا أساسا
اننا موجودين
وعايشين
حد دلوقتي
وسط كل دا

يارب بس نعدي لحد مانوصل لبر الامان

الثلاثاء، 22 أبريل، 2014

عيد ميلادي

لما بيجي عيد ميلاد الواحد
بيبقي عاوز يعمل 
كذا حاجه يبقي مبسوط فيها
لذلك بعد كل حاجه
بعد لما انتا تفتكر الناس ومحدش يفتكرك
بعد لما تبقي مبسوط لكل حاجه
ولكل حد
وتتنسي
لذلك
مفيش حاجه تستاهل
وهقضيه مع نفسي
وفيوم
هروح بعيد
وهحتفل بيه
مع صوت فيروز

علبحر
لما تيجي فرصه

هحتفل بمرور
مؤبد
علي وجودي في الحياه
لذلك
كل سنه وانتي طيبه ياسوني
وتورته وشموع كتير ليا
:)

الجمعة، 7 مارس، 2014

احلام

- دا كان طبق كبير وحلو اوي
واخدت منك الكحكحه الاخيره بالعافيه
فالحلم
شويه أيام
- شوفتي بقي
أنتي اللي أخدتي الكحك كله
الحمد لله


قمت مفزوعه من الحلم
السنان بتتكسر
خير اللهم أجعله خير
بس أبن سيرين والمفسرين قالو
انه خير
دا زوال هم وغم
وقضاء دين
يارب 


 كانت فكوبايه بيضا
ست كبيره
وملتها
جت تديها لبنوته تانيه
مشيت
وجاتلي
أدتهالي
وصحيت وأنا بشربها
دي معناها أيه

بس كل حلم
مختلف
ليه مليون معني
لايعلمهم  الا الله
يارب
الحمد لله علي كل شيء
 

السبت، 22 فبراير، 2014

ومازلت..

بعتذر عن البوست اللي فات
بس كنت مخنوقه شويه حبتين
لا
تلت حبات
 بس فعلا لما الوجع
يجيلك من القريبين ليك
بيبقي أكبر

عموما مكنتش أعرف بردو اني غاليه عندهم
لدرجه أن اللي كانت السبب دعت علي نفسها لمجرد أنها حست
انها زعلتني

فعلا كتير بنبقي متضايقين من حاجه ومش عوزين
حد يكلمنا لحد
 مانحل المشكله أو نروق علشان نقدر اننا نكمل

الفتره اللي فاتت أتعملت منها حاجات كتير
الأولويات
عرفت يعني أيه أولويه

طول الوقت بهتم بأصحابي والشغل وبس
بنسي نفسي
بنسي أهلي
بنسي حاجات كتير

أبويا
فلحظه
كان هيضيع مني

كان لوحده
وانا عرفت بالصدفه
فثانيه مرت حاجات كتير أدامي
لحظتها فالشغل انا كنت موجودا
بابا راح المستشفي وكالعاده مقلناش
كلمته
صوت ضعف جدا
اتجننت 
عارفين لما شريط كل لحظه بيمر ادام عنيكم
ربنا يبعد عنكم شر اللحظه دي
معنديش فشغلي أستأذان لأي سبب
كمتهم ولما عرفو ان المشكله عندي
سابوني ...جريت
ساعتين فالشمس لأن مكنتش أعرف هو فين
ربنا رزقني بحد ساعدني اني الاقيه
ومخدش حاجه

أقولكم سر
انا عندي حاجه زي فوبيا من المستشفيات
رجلي مش بتشيلني لما ببقي وقفه بعيدا عنها
اما لو دخلتها بقي
أنتمتي كانت معايا .معرفتش تيجي بسبب ظروف
بس كانت معايا طول الساعتين تلاته دول بالفون
فعلا مكنتش قدره أتنفس
بس لولا ربنا رزقني بالراجل اللي ساعدني
ومرضيش ياخد فلوس..استغربته لأني عرفه ان كل حاجه
بيبقي ليها حاجه بس ساعدني ومشي برغم من أننا لفينا كتير
وهي كانت معايا بالفون لحد ماوصلت
ولقيناه

مش مهم اللي حصل بعد كدا
كان بالنسبالي اني الاقيه أهم

الحمد لله دلوقتي هو فالبيت ومعانا
كل اللي سأل عليا وأهتم
شكرا ليكم بجد
 وقت الشده تعرف مين فعلا صحابك اللي بجد
ومين أنتا ليهم ..علي الهامش

حاجات كتير فثواني في حياه البني أدم بتتغير وتختلف
لحظه
في حياه كل مننا لحظه
خلي بالكم من لحظاتكم أوي
متسيبوش لحظه تعدي
أعمو كل اللي فنفسكو
أتنططو لو شوفتو حد واحشكم أوي
وسيبكم من كلام الناس انكم كبرتوا
كل حد فينا فيه حته صغيره جواه
يفضل عايش بيها

هي دي اللي بتخلي حياته مستمره
حافظوا نفسكم واللي حوليكم

الحمد لله

الجمعة، 31 يناير، 2014

انا فعلا بكره نفسي

لأول مره بجد
بقيت بكره نفسي

انا ماعملتش حاجه
غير أني بطمن علي اللي حوليا 
لما بيضيقوا
غلطتي اني بطمن عليهم

انا فعلا
بكرهني أوي

ماكنتش اعرف
اني تقيله
علي اللي حوليا كدا

 يارب خدني
يارب أرجوك

خدني يارب
مش عوا أبقي تقيله علي حد
أرجوك

السبت، 25 يناير، 2014

لنفسي

الفتره دي 
صعبه عليا أوي

من أول يناير وانا مش عوزا افتكر
اللي أتنسوا

ربنا يرحمهم
ويرحمنا لاننا قصرنا فحقهم
ويرحمني
علشان قصرت فحق نفسي

حلمت بحاجه وكان نفسي فيها أوي
بس ماكملتش
حلم جميل أوي

صحيت منه
بشكل شخصي أو بشكل عام
الاتنين

أتوجعت اوي
بس هتوجع أكتر لو بعدت
لذلك ماعنديش غير اني بتمني كل خير

دلوقتي مفيش غير جمله واحدا بس بقولها ليا

ماحدش عارف في ايه جي
بالنسبالي

أملي بس فربنا
ومبفكرش فأي امل تاني

تعبت من التفكير
تعبت من كل حاجه
بحاول ارجع تاني لنفسي

علشان اعرف اكمل
وربنا يأذن للي فيه الخير للكل
عرفه انه كلام غريب وعام أوي



لكني موجوعه أوي
وبحاول أصبر
ومش عرفه النهايه
بقيت حسه أني مشوشه
بقيت مش عرفه حاجه
بس بحاول اخرج من الحاله دي
أرجع اعمل كل حاجه بتفرحني تاني
أرجع تاني
لنفسي
يارب

الجمعة، 17 يناير، 2014

بدايه

  الواحد بقي يفكر كتير هيعمل ايه بعد كدا..
وياتري أيه اللي جي

مليون فكره فدماغي بحاول أفكر واترجمها لواقع
شويه بعرف وشويه لا
حاجه عوزاها وهي واقع ادامي
بس مش قدره أطولها

ماضي بحاول انساه وأتنساه
بفتكر الحلو وبجتهد اني استفاد من الوحش
بكل حاجه اتعلمتها

بكبر فعليا
فالعمر
شويه فالفكر
وزي ماأنا فحاجات تانيه

بحاول أفضل بشخصيتي برغم محاولات كتير
اني اتغير
بنفكيري وتصرفي اللي كتير منه طفولي
بس انا كدا
ومش عوزا اتغير
واللي عاوز يقبلني فحياته يقبلني بالشكل دا
وكتير منهم أهلي وناس قريبين مني

بس انا مش عوزا اتغير غير للأحسن
مش عوزا أبقي متجمدا او شخصيه هاديه
خالص
عوزا ابقي مجنونه زي مانا
اعمل الحاجه اللي بحبها
انزل الصبح قبل شغلي أعدي علي حبيبتي
وأزوها أطل عليها...السيده
اتمشي يوم أجازتي فالحسين واخد البنات معايا
هما بيتبسطوا يمكن اكتر مني لما بنروح هناك
أخد المج وأنزل الصبح اتمشي حبه علي النيل
قبل مااروح الشغل
حتي وانا ركبه بحب أسمع فيروز
امنيه حياتي أروح شط مفيهوش حد
اقعد اتفرج علي شروق الشمس وانا بسمعها

لما بحب الناس أوي ويغيبوا واشوفهم تاني
ببقي فرحانه بيهم لدرجه اني بتنطط

طبعي كدا
وحياتي كدا

ومش بقبل حد يغيرني
انا بحب اتغير من نفسي فدماغي
يبقي ليه عوزين ابقي زي الاله
كل حاجه بحساب

؟
ليه

بس دا قراري
بدايتي بفكر فيها
يمكن اوصل
يمكن لا
بس هحاول
فبدايتي...