السبت، 22 مايو 2010

هو اللي عمله صح ولا غلط؟؟؟؟؟؟؟؟؟؟

هو اللي عمله دا صح ولا غلط؟؟؟
دا سؤال وجه فجمجمتي لما كان بيحكيلي حكايته
حبها لدرجه العشق..مأتمناش حد غيرها معاه..من كتر حبها أستحوذت علي قلبه وعلي عقله وعلي تفكيره واحنا بنسأل..هل حد ممكن يحب حد للدرجادي
المشكله مكنشي فيه دا كانت فيها..
اتقدم ليها رسمي ذي ماكل الناس الصح بتعمل..هي اللي خافت وهربت
وسألني:هي ليه عملت كدا؟؟
ملقتشي اجابه ارد عليه..قالي يمكن هي موش وثقه فيا؟
قلتلو لو كدا ماكنتشي حبتك من الاول وانت عملت الصح انك رحت وطلبت ايديها
قالي طب ليه عملت كدا؟؟قلتلو ممكن تكون خيفه او متردده..بعد عنها شويه وهي رجعتلو تاني..قلت انا طب الحمد لله انكو رجعتو لبعض
من كتر ماحبها فعلا..أتخلي عن شغله اللي قضي فيه وقت طويل علشان شريكه بنته كانت معجبه بيه ومياله ليه..ساب الشغل اللي ياما تعب فيه وسهر فيه وخسر فيه رأسماله وتعبه ومجهوده علشانها..بس علشانها وعلشان يقولها انه موش لحد تاني ليها
بيقولها انه مستعد يخسر الدنيا كلها علشان خاطرها هي وبس
لما حكالي كدا..انا الصراحه معرفتش ارد او اقوله حاجه
كل اللي قلته ليه:يارب هي تكون بتستاهل كل ده
رد عليا:دا اللي خايف ومقلق منه..بعد ماسبت كل حاجه بس علشان اقول ليها انها كل حاجه واني مستعد اسيب الدنيا علشان خاطرها..بس خايف لحسن تبعد تاني وتعمل ذي اللي حصل قبل كدا..لما روحت لبيتها وهي اللي خافت
قلتله سبها علي ربنا
بس اللي جه فبالي..ياتري هو عمل الصح ولا ده غلط
انه يسيب كل حاجه علشانها وفي ذره قلق جواه من ناحيتها
اتكلمت مع ناس كتير وأخدت رأيهم...قالولي ماكنشي ينفع اللي عملوه ده
يتخلي عن كل حاجه علشان خاطرها...مينفعشي
بس بجد صعب ان حد يحب حد كدا..وفالاخر حصل ذي ماتوقعت..من ساعه ماعرفت لا اتصلت ولا كلمته..قالي انا خلاص عرفت الرد
بجد ماعرفتش اقوله ايه..لانه ادي ثقه لحد غير اهل للثقه دي او انه يعمل حاجه بتضر بمستقبله من غير مايكون واثق جداااااا من الطرف التاني
سؤالي لاهل التدوين..لو حد بيحب حد اوي,ممكن يسيب شغله او يضحي بمستقبله علشان خاطر الطرف التاني حتي لو موش واثق فيه؟؟؟
اعذروني يجماعه علي عدم ردودي عندكو او عندي..بس ربنا عالم بالحال وامتحاناتي اللي هتبتدي بعد اسبوع
بس متابعه لكل عالم التدوين واهلو علي اد مااقدر..دعواتكو ليا..تحياتي

هناك 15 تعليقًا:

  1. السلام عليكم

    اولا ربنا يكرمك في الامتحانات
    ثانبا ادخل في موضوع البوست انا شايف ودة رأى انه دة اكبر غلط مينفعش مهما كان بيحبها انه يسيب كل حاجة دي سذاجة كبيرة منه اكيد هو بيحبها بس مش لازم توصل للدرجة دي احنا في عالم صعب لازم الكل يعمل احتياطه للمستقبل وهي لو بتحبه بجد هي اللي عترفض اللي عمله دة

    رأى المتواضع انه هو غلطان جدا انه يسيب كل حاجة في حياته علشانها
    في ايه انا بحبها جدا ممكن تكون مش متوافقة مع الموضوع دة بس ممكن نستلهم منها حاجة مهمة جدا
    قال الله تعالى: ((قل إن كان آباؤكم وأبـنـاؤكـم وإخــوانكم وأزواجكم وعشيرتكم وأموال اقترفتموها وتجارة تخشون كسادها ومساكن ترضونها أحـب إليكم من الله ورسوله وجهاد في سبيله فتربصوا حتى يأتي الله بأمره والله لا يهدي القوم الفاسقين))

    مش عارف افتكرتها ليه في الموقف دة
    اهنوا اختيار بقي اللي صعب

    معلش لو طولت عليكي
    تحياتي وربنا يوفقك

    ردحذف
  2. بصي هقولك رأي ومتقوليش انه متحامل علي الستات...

    مفيش ست تستاهل ان الواحد يضحي بمستقبله علشانها... لان مفيش ست ممكن الراجل يثق فيها بنسبة 100% اصلا... غير امه... وعلي رأي محمد هنيدي ولو ابوه طلقها ميأمنلهاش...

    اه نسيت... ربنا يوفقك في المذاكرة والامتحانات..

    ردحذف
  3. ربنا ييسر لك كل امورك يا حبي
    ويسهل لك وكل اللي زيك ويفرحكم بعد طول التعب والسنة أم خنزؤر دي

    ردي من رد السيد سمع هوص
    لا فيه راجل
    ولا فيه ست
    ولا انسان على وجه الأرض
    يستاهل اسيب نجاحي علشانه

    اتحجج بيه ماشي
    اخليه سبب لكسلي وهبلي ممكن
    لكن اقول فشلت علشان عيون فلان
    نووووووووووووووووووووووو

    انا اتجنن من بنت تقول اثق في حد اكتر من نفسي
    مينفعش
    اتجنن من قريبة تقول لي عملت توكيل عام لجوزي
    جناني مش قلة ثقة في جوزي
    ولكن هناك حدود لكل شيء
    عيب مجتمعنا ان اهله ميعرفوش الحدود
    اهله يظنوا ان الحدود قلة حب وقلة ثقة ومكر ووووووو وخمسين واو ورا بعض

    الأخ ده طبعا انا معرفش جاي من انهي كوكب
    بس اللي عمله غير مبرر
    الحب اللي مش مجرد عربة في قاطرة نجاحي يولع بجاز
    اتوجع شوية ماشي
    اتمنى الرجوع جايز
    لكن اتذل واتهبب واسيب نجاح واسيب فلوس واربط ايشارب واكنس السيدة
    .
    .
    .
    .
    .
    .
    عند أمه يا أدهم :)

    ردحذف
  4. مســــــــاء الخيــــــــــر

    ربنا يكرمك ويوفقك بإذن الله في الإمتحانات وتنجحي بتفوق إن شاء الله .

    ممممممم .. مش عارف !

    أصعب الأسئلة تلك التي أجوبتها واضحة !
    "خليل النعيمي"

    يعني من وجهة نظري .. هل هو كان عارف من جواه إنها مش بتبحه عشان كده كان بيحاول من جواه إنه يرضيها بأي طريقة ولو على حساب نفسه ومستقبله ؟
    يبقى هو غلطان لإنه كان عارف الإجابة بس مش عاوز يشوفها .
    ولو ما كانش عارف .. ومراية الحب عامية .. وهو كان متخيل إنها بتحبة لدرجة خليته يتخلى عن طريقة عشانها .. يبقى برضه غلطان لإنه صدق تخيل هو افترضه لا أساس له من الصحة

    ربنا ييسر الخير للجميع إن شاء الله

    أرجو أن تتقبلي رأيي بصدر رحب

    خالص تحياتي وعميق احترامي وتقديري

    :)

    سلام

    ردحذف
  5. بصي مستقبله ده الحاجة الوحيده اللي هتبقاله .. كون انه يتخلى عنه علشان خاطرها تبقى تستاهل بجد يحسدوها على حبه ليها .. بس يارب تكون هي فعلا تستاهل يضحي بكل ده علشانها .. علشان للاسف الايام دي بقى في ناس كتير ميستاهلوش اننا نضحي بأي حاجه علشانهم مهما كانت صغيره

    ردحذف
  6. غلطان انه ضحي بكل شيء علشانها وهو مش واثق فيها مليون الميه

    وجمي بجد ان حد يبقي عنده الوفاء في زمن ميعرفش يعني ايه حب

    ردحذف
  7. ربنا معاكي ويوفقك في امتحاناتك
    انا الموضوع دا قاتلني بجد
    تقريبا نفس البوست كتبته عندي
    يعني نفس الحكاية ولكن بطريقة تانيه
    والاجابة هي
    لازم نتاني شوية في مشاعرنا
    وبلاش الاندفاع
    مش اي حد نديله كل حاجه بسهوله كدا
    اللي عمله غلط غلط
    كفايه كدا
    تحياتي

    ردحذف
  8. ربنا معاكى يا سنسن يا حبيبتى وان شاء الله ترجعيلنا

    مجبورة الخاطر انتى واللى زيك يارب اللهم اميييييين

    نيجى لسؤالك بقه وكل اللى تفضلوا قبلى ردوا عليه وماعنديش زيادة ع كلامهم

    بس انا ليا سؤال زيك بردو

    هو فيه حد بيحب حد كده ؟؟ مش عارفة

    مش مصدقة مثلا مش متخيلة او يمكن ماشفتهوش

    طيب وده حب حقيقى يعنى ولا ايه ؟؟

    يعنى هما لو اتجوزوا وهى طلعت كويسة مش هيخونها

    مش هيفكر ف حد غيرها مش هيسيبها لو طلعت عقيم ؟؟

    كل ده عايزة حد يجاوبنى عليه واعتقد

    انك انتى كمان عايزة تسألى نفس الاسئلة دى

    فا اسمحيلى اطرحهم عندك بما انك فتحتى

    الموضوع ويارب نلاقى حد يريحنا

    تحياتى ليكى يا قمر
     

    ردحذف
  9. حبيبتي يا سوني واحشاني اوي يا قلبي
    و ايه يا بنتي اللي قعدك على الكومبيوتر

    قومي اقراي كلمتين ينفعوكي
    هههههههههههههههههههههههههههه
    ربنا يوفقك و ينجحك و يطمنا عليكي يا رب

    اما عن السؤال

    اجابتي هي لا
    لو واثقة فيه بجد و بحبه بجد و هو بيحبني بجد
    يبقى هيساعدني و هيشجعني و هيطور مني و هيخليني انجح و انجح ما هو نجاحي هو نجاحه

    لكن التضحية اللي مالهاش معنى دي لا

    خلي بالك من نفسك

    خالص حبي و تقديري

    ردحذف
  10. سوووووني حبيبتي
    إيش أخبارك
    يارب تكوني كويسه

    ربنا يعينك ويوفقك في الإمتحانات
    أنتم السابقون ونحن اللاحقون :)))

    أما الموضوع إللي إنتي كاتبه عنه ده .. بجد حاجه غريبه وماينعش كل إللي حصل ده ..

    أنا رأي من راي دكتوره ستيته وأكتر إللي كتبوا هنا ...

    ضروري الواحد حتى في العلاقات يبقى عقلاني أكتر عشان يقدر ينجح علاقته

    ربنا يوفقك يارب ويكرمك يابنوته ...

    ... ;) ,,, ;) ...

    ردحذف
  11. لأ طبعا الحب المفروض يدى قوة مش يضعف اللى قدامه لدرجة انه يستغنى عن مستقبله بسهولة

    ردحذف
  12. بصراحه مش عارفه ارد اقولك ايه انا عاجزه عن الرد

    ردحذف
  13. بصي ياستي انا مقتنعة تماما بأن اللي عمله ده غلط وهي كده أصلا مالهاش امان يعني لما قرر يرتبط بيها بعدت هي عنه وسابته فيقوم هو يضحي بكل حاجة علشانها متهيالي صعب قوي وخصوصا انه ضحى باهم حاجة وهي نجاحة

    وربنا معاكي ياحبيبتي وتخلصي امتحاناتك على خير

    ردحذف
  14. جاية أمسي عليكي يا حبي واقول
    ربنا ييسر لك كل عسير وتنهي الأمتحانات زي الفل ان شاء الله

    ردحذف
  15. اعتقد
    انه صعب ان حد يضيع مستقبله عشان حد وخصوصا لو كان مش واثق فيه اصلالالا
    بس الحب يخليك تعمل اكتر من كدا

    ردحذف