السبت، 22 فبراير، 2014

ومازلت..

بعتذر عن البوست اللي فات
بس كنت مخنوقه شويه حبتين
لا
تلت حبات
 بس فعلا لما الوجع
يجيلك من القريبين ليك
بيبقي أكبر

عموما مكنتش أعرف بردو اني غاليه عندهم
لدرجه أن اللي كانت السبب دعت علي نفسها لمجرد أنها حست
انها زعلتني

فعلا كتير بنبقي متضايقين من حاجه ومش عوزين
حد يكلمنا لحد
 مانحل المشكله أو نروق علشان نقدر اننا نكمل

الفتره اللي فاتت أتعملت منها حاجات كتير
الأولويات
عرفت يعني أيه أولويه

طول الوقت بهتم بأصحابي والشغل وبس
بنسي نفسي
بنسي أهلي
بنسي حاجات كتير

أبويا
فلحظه
كان هيضيع مني

كان لوحده
وانا عرفت بالصدفه
فثانيه مرت حاجات كتير أدامي
لحظتها فالشغل انا كنت موجودا
بابا راح المستشفي وكالعاده مقلناش
كلمته
صوت ضعف جدا
اتجننت 
عارفين لما شريط كل لحظه بيمر ادام عنيكم
ربنا يبعد عنكم شر اللحظه دي
معنديش فشغلي أستأذان لأي سبب
كمتهم ولما عرفو ان المشكله عندي
سابوني ...جريت
ساعتين فالشمس لأن مكنتش أعرف هو فين
ربنا رزقني بحد ساعدني اني الاقيه
ومخدش حاجه

أقولكم سر
انا عندي حاجه زي فوبيا من المستشفيات
رجلي مش بتشيلني لما ببقي وقفه بعيدا عنها
اما لو دخلتها بقي
أنتمتي كانت معايا .معرفتش تيجي بسبب ظروف
بس كانت معايا طول الساعتين تلاته دول بالفون
فعلا مكنتش قدره أتنفس
بس لولا ربنا رزقني بالراجل اللي ساعدني
ومرضيش ياخد فلوس..استغربته لأني عرفه ان كل حاجه
بيبقي ليها حاجه بس ساعدني ومشي برغم من أننا لفينا كتير
وهي كانت معايا بالفون لحد ماوصلت
ولقيناه

مش مهم اللي حصل بعد كدا
كان بالنسبالي اني الاقيه أهم

الحمد لله دلوقتي هو فالبيت ومعانا
كل اللي سأل عليا وأهتم
شكرا ليكم بجد
 وقت الشده تعرف مين فعلا صحابك اللي بجد
ومين أنتا ليهم ..علي الهامش

حاجات كتير فثواني في حياه البني أدم بتتغير وتختلف
لحظه
في حياه كل مننا لحظه
خلي بالكم من لحظاتكم أوي
متسيبوش لحظه تعدي
أعمو كل اللي فنفسكو
أتنططو لو شوفتو حد واحشكم أوي
وسيبكم من كلام الناس انكم كبرتوا
كل حد فينا فيه حته صغيره جواه
يفضل عايش بيها

هي دي اللي بتخلي حياته مستمره
حافظوا نفسكم واللي حوليكم

الحمد لله

هناك 25 تعليقًا:

  1. الف سلامة ع الوالد .. ربنا يشفيه شفاءا تاما لا يغادر سقما و يباركلكم فيه

    ردحذف
  2. اصبري وثلبري يا سوني فأنت بنت نبت أصيل وما خُلقنا إلا للعناء والكد فأحمدي الله وأخرجي ما لديك من كبت مع اقرب الناس مودة لكِ واكثرهم نصحاً


    سعيد بعودتك للمدونات

    ردحذف
    الردود
    1. الحمد لله
      وانا اسعد اني رجعت بيتي

      حذف
  3. الحمد لله إنك بخير وربنا يجعل لحظاتك كلها سعيدة
    والحمد لله إن الوالد بقى بخير وربنا يبارك فيه وفى عمره
    وطبيعة الإنسان مهما كبر فى السن والشكل بيرجع للطفوله وكل مكبر بيكون عدم اهتمامه بانتقادات الإخرين بيزيد
    تحياتى وأتمنى لكى دوام السعاده واللحظات الجميلة

    ردحذف
    الردود
    1. ربنا يخليك يمال
      وادينا بنحاول فيها

      حذف
  4. الف حمدلله على سلامته يا سنسن
    ونصايحك كلها ف الصميم
    مفيش حاجة ف الدنيا تستاهل زعل وخناق وبعاد وأى نكد
    الدنيا أقصر مما نتخيل
    ربنا يطمنك دايما على كل اللى بيتحبيهم
    ويوقفلك دايما ولاد الحلال

    ياريت اشوفك يوم الأتنين
    ف حفل توقيع الغالى محمد غالية ف أرابيسك
    لو عرفتى تيجى ياريت تحاولى
    عشان انا مش ناوية أحضر أى لقاءات تدوينية تانى قبل وقت طويل

    بوسات وحضونات وطبطبات

    ردحذف
    الردود
    1. و انا لو جيت
      هاجي علشانك

      بسي اوعي تسسي
      بوسات وحضونات

      حذف
  5. أولا ألف سلامة على سلامة عمي الحاج يا مستشارة
    تاني حاجة لولا الحتة الصغيرة دي مش هنعيش رغم ان البعض بيتريق أو يسخر لكن
    طول ما فيه جزء من الطفولة جوانا هنعرف قيمتنا في الحياة وقيمة تقدير الآخرين اعمل اللي انت عايزه في الوقت اللي انت عايزه مدام مش حرام

    ردحذف
    الردود
    1. انا بطنش
      كلامهم
      واعمل الي انا عوزاه

      حذف
  6. الف حمد الله على سلامه والدك
    والحمد لله انك بقيتى احسن
    ويارب دايما ايامك كلها سعاده وفرح
    وياريت متنسيش نفسك بعد كده الحياه مش شغل واصحاب وبس لازم يكون ليكى اولويات تانيه
    تحياتى ليكى
    اتمنى التواصل

    ردحذف
  7. ألف حمداً لله على سلامة الوالد ، ربنا يباركلكم فيه وفي صحتة ويطول عمره ويفرح قلبه بيكم
    :)
    يا بنتي أبوس إيدك بلاش تلحمي حرف الفاء في الكلام !!
    أنا لحد دلوقت مش ناقصي "فقصة"
    D:

    ردحذف
  8. الردود
    1. هههههههههه
      براحتشييييييي

      حذف