السبت، 6 مارس، 2010

اصحابي (2)

تاني حد هتكلم معاه فالبوست دا هي نوسه
عرفين الشخصيه الهاديه الخلوقه والواقعيه جدا
اهي هي دي نوسه
البنوته اللي بميت راجل,لو حد محتاج لمساعده هي اكتر حد بيجري يساعد
دي بقي صحبتي من ايام ثانويه عاااااااااااااامه (ايام الشقاوه الفعليه حيث انني وقتها لم اكن هاديه بالمره وكنت بجنن اللي حواليا وبطلع عين المدرسين عندنا)
ونوسه دي احيانا كنت بحس انها شويه وهتشد فشعرها مني نتيجه للحجات اللي بعملها معاها ههههههههه
ايام بجد الواحد ميقدرش ينساها لان ثانوي بالرغم من المنهج اللي عاوذ يتولع فيه رسمي وايام المذاكره لحد مالعين يتنعمش يايتحطلها نضاره بفعل فاعل
لما جينا جامعه مع بعض اتبسطت انها معايا وقولت الحمد لله اني موش هكون لوحدي ودي فحد ذاتها نعمه من عند ربنا ان في حد معايا فالجامعه من ثانوي
ثم بدأنا الطريق من الاول والحمد لله اهو سبع سنين مستحملاني البونيه لانها وبأعترافا مني كنت ببقي كتير خنقه ورخمه خصوصا واني ملييش مود ثابت فياعيني عليها هي اكتر وحده مستحملاني
وبجد اسألو الكل علي نوسه هي فوقت الجد بتبقي الضهر للكل وبالذات ليا انا حيث انني من النوع اللي ممكن يأثر فيا الكلام
موش هنسي لما مره وحده من اخواتنا اللي يسامحهم وحكيت عنهم قبل كدا قالتلي كلام ضايقني فقعدت لوحد منذويه "حلوه منذويه دي...:)" والوحيده اللي لاحظتني هيا
قعدت هدتني وقالتلي مالك..صراحه مكنتش حبه اضايق حد باللي مضايقني قالتلي احكيلي بس فحكتلها
بعدها قالتلي الكلام اللي موش هقدر انساه ابدا
بصي ياسوني..ياما هتقابلي ناس هايحولو يدمروكي بالكلام وبأي وسيله لما يلاقوكي ناحجه فلو ذعلتي علي كل كلمه تضايقك انتي اللي هتدمري نفسك..ارمي وراكي وكملي طريقك وموش اي حد يقول حاجه تذعلك تذعلي
هما موش عوذين غير تدميرك ودمار الناس اللي حوليكي
هتلاقي ناس كتير اوي كدا لما تتخرجي من الجامعه فحولي علي قد ماتقدري تسيبك منهم وقوي نفسك بنفسك ومتسمعيش ليهم
انتي حد كويس وملكيش دعوا بيهم تاني
من غير ماتدري يانوسه كل يوم بيزيد احترامي ليكي يوم بعد يوم وبحمد ربنا كل يوم انه اداني صحبه ذيكو والله اعلم من غير وجدوك ووجود اللي حوليا معايا انا كنت هعمل ايه..الحمد لله
تحياتي

هناك 24 تعليقًا:

  1. نوسة ... وسوني... ايه الدلع ده كله... ههههههههههههه... وش بيطلع لسانه...

    يستي ربنا يخليهالك... ويبعد عنكم هادمي الصداقات ومفرقي الجماعات...


    تحياتي

    ردحذف
  2. الصداقة هى اعظم كنز يحوزه الإنسان فى الحياة

    ولكن ككل شىء جميل
    لا يعرف الإنسان قيمته إلا بعد أن يفقده

    أدعوا الله تعالى لك الأصدقاء ان يديدم الله المحبة بينهم وان يجعلهم مترابطين

    ردحذف
  3. وأنا والله كمان احترمتها من كلامك عنها .. ربنا يا رب يبارك لكم في بعض ويجمعكم دايماً في الخير .. وبلاش سيره الناس أياها دي !! هههههههههه

    ياللا .. ربنا يهديهم ويهدينا جميعاً اللهم آمين


    تحياتي
    :))
    سلااااااااام

    ردحذف
  4. بصرااحه انا لقيت ان الوست طويل ومش قريته
    :D
    بس بسبب ان انا بخلص شويه شغل ع الجهاز
    ووعد هدخل اراه فى اقرب فرصه
    بس حبيت اقول بجد بلوج جميله وكلام اكيد اكتر من رائع
    تحياتى ومودتى

    ردحذف
  5. ربنا ما يحرمكوا من بعض


    تحياتى

    ردحذف
  6. سمع هوص (Abo 3li) :ايييييييييون نوسه وسوني
    موش بنات بقي ولاذمن ليهم الدلع
    واللي يلاقي الدلع وميدلعش بيقي اييييييه
    واهو نلخق نشوف لينا كام يوم قبل ماندخل علي مرحله المعارك الحربيه رسمي
    هههههههه

    ردحذف
  7. الازهرى:ياااااااااااارب يسمع منك
    والحمد لله علي كل حاجه
    ويارب الناس كلها تلاقي صحبه ذي صحبتي كدا
    فكل ميسر لما خلق له

    ردحذف
  8. P A S H A:هي بجد والله تستاهل كل خير
    دي اعقل وحده فينا ياابني والحمد لله انها لم تتجنن بسببي حتي الان..وربنا يهدي الجميع

    ردحذف
  9. :) QŁp 7āZēŋ:ماشي ومستنيه تعليقك ورايك بأذن الله

    ردحذف
  10. لاسع افندى:يااااااااااااااااااااااااااارب
    اللهم امين

    ردحذف
  11. ربنا يخليكم لبعض

    بس بجد انسي الناس اياهم الي هما خنقه دول
    عشان دول هتلاقيه علي طول في كل حاجه
    اعملي بس انتي ليهم تجاهل من حياتك
    وربنا يكرمك ويوفقك ويخلي ليكي احلي شله صحاب وتفضلو مع بعض طول العمر

    تحياتي

    اتمني التوفيق

    ردحذف
  12. سونــــي حبيبة قلبي
    معلش يا قلي بس الموضوع مش ظاهر عندي مش عارفة ليه
    جايلي على انه مربعات كده مش عارفة ده مشكلة عندي بقى و لا ايه ؟؟ بس حاولت اغير لغة الصفحة اكتر من مرة مش راضية تظبط

    بس من غير ما اقرا و الله انا عارفة ان اكيد كلماتك كلها رقة و جمال زيك يا عسولة

    حبيبتي انا متشكرة اوي انك وقفتي جنبي و شجعتيني بجد في الموضوع بتاعي
    و بجد سعيدة اوي اني اتعرفت على انسانة طيبة و خلوقة و محبوبة زيك يا قمرايا

    خالص حبي و حبي و حبي و حبي و تقديري

    ردحذف
  13. ازيك ياقمر

    انا البوست طالع عندى كله رموز وبس
    بس اللى فهمته من الكومنتس انك بتتكلمى عن صاحبتك

    ربنا يخليكو لبعض يارب

    بجد الصداقة الحقيقة هى فعلا كنز

    ميرسي يا قمر لانك نورتى مدونتى بزيارتك الجميلة

    وبجد اسعدنى اوى تعليقك وتشرفيك ليا

    ردحذف
  14. ربنا يخليكو لبعض ... و كما يقال

    جميل أن يكون لك قلب أنت صاحبه .. و لكن الأجمل أن يكون لك صاحب أنت قلبه !

    ربنا يديم عليكو السعادة و الحب و يسعد أيامكو ياا رب


    و اتمنى تشرفيني في مدونتي المتواضعه و اتشرف بتعليقك عليها

    هنا

    http://ahmedabdulmohsin.blogspot.com/2010/01/blog-post_25.html

    ردحذف
  15. ربنا ياستي يباركلك في نوسة
    ويجعلني قادر ياكريم لكل أصاحبي (نوسة
    ويجعل كل أصحابي ليا نوسة
    عشان نونس بعض

    ردحذف
  16. ربنا يديم عليكم صحبتكم دى يارب
    مش من السهل فى الزمن ده تلاقى صديق بجد
    ربنا يخليكم لبعض يارب

    ردحذف
  17. ربنا يخليكوا لبعض يارب
    وتفضل صداقتكوا حلوة
    كده على طول وماتتفرقوش
    ابدااااااااااااااااااااا

    ردحذف
  18. نوسة دى ونعم الاصدقاء بجد وانا مع الكلام اللى قالت ليكى علية

    ربنا يوفقك ويكرمك

    مع خالص تحياتى

    ردحذف
  19. سوني
    سامحيني أول ما دخلت لقيت البوست مربعات وحاجات غريبه

    تقبلي مروري

    ردحذف
  20. السلام عليكم

    ما شاء الله عليكم

    ربنا يخليكم لبعض يا رب ومش يحرمكم ابدا ابدا من بعض

    نعم الصحبه والله

    بس بجد يا ريت تحافظوا على صداقتكم لان بجد
    نادر اوى فى الزمن ده اما تلاقى حد يلاقى صديق بجد


    تحياتى ليكى انتى ونوسه

    وسلميلنا عليها كتير

    تقبلى مرورى

    انا هضيف مدونتك عندى فى المفضله عشان يبقى بينا تواصل ان شاء الله

    ردحذف
  21. ازيك يا سونى

    تحياتى

    اشكرك على زيارتك فشكول
    ما عرفتش اقرأ حاجه عندك عشان الخط مش عارف ايه وما فيش كتابه فيه رسومات نوع الخط عايز يتغير

    تحياتى

    ردحذف
  22. عزيزتي التدوينة عبارة عن مربعات لايمكن قراءة اي شئ
    دمت بكل ود

    ردحذف
  23. الي الجميع:شكرا لذيارتكم ليا وهشوف الخطأ انشاء الله

    ردحذف