الخميس، 11 نوفمبر 2010

الحمد لله...أحلي كلمه

الي هتكلم عنه دلوقتي بالرغم من انه تاعبني وواجعني لحد دلوقتي
بس هي تجربه كل حد ممكن فيوم يمر بيها او ممكن تكون حصلتلو او يارب يبعدها عنكو

أنا فيوم من الايام كنت ذي اي حد بتنطط وعيشه حياتي من غير اي هموم ولا مشاكل غير الاستعداد لأمتحاني ذي بقيه الطلبه
قبل الامتحان بيوم...أمي كانت بتشتغل فالشقه عادي جدا ذي مااتعودت بعمل معاها واحيانا بتسيب ليا كل حاجه اعملها
يومها امي قالتلي تعالي اشتغلي بدالي ياسوني شويه بس ...معلش هتعبك ياماما
قلتلها ولا يهمك ياست الحبايب...انتي بس استريحي وانا عن نفسي فاضيه...مهو اللي ذاكر ذاكر من ذماااااااااااان بقي
وانا بشتغل بذق وبشيل شويه حجات تقيله من اثاث الشقه
مأخدتش بالي ان في حجات بتتذق بوضعيات معينه علشان متأثرشي علي الضهر
وانا بذقها جامد ذي ماأتعودت...حسيت بألم رهييب فضهري جدا
وأستحملتوا لحد ماخلصت شغلي اللي ورايا...ساعتها مااقدرتش استحمل وصرخت بأعلي صوتي
مكنشي ينفع اني اروح لايمين ولا شمال غير كدا الامتحان تاني يوم
ماقدرتش انام يومها علي أساس انه شويه ألم وهيمشي
روحت امتحنت ...بس لقيت الالم خلاص مش قدره استحمله
روحت المستشفي وقالي الدكتور خدي شويه ادويه ومراهم كتبلي عليها وقالي استريحي بس اليومين دول
طبعا مكنشي في راحه والمفروض اني كنت اتابع معاه بعد كدا
الراحه مفيش والتوتر بسبب الامتحانات وغيركدا كان والدي تعب ووقع مننا وعمل عمليه خطيره جدا.......وأتضريت اني استحمل واستني كل دا لحد ماوالدي تم شفاؤه علي خير وابتدت رحله علاجي انا


كل دا مايهمش...اللي يهم فاللي جاي
روحت مستشفي تانيه بعد كدا...مستشفي احمد ماهر
بجد يومها انا خرجت مدمعه من اللي شفته هناك لحد ماوالدي ذعقلي....
وقعدت اقول فسري الحمد لله اني انا كدا دلوقتي لأني بالنسبه للناس اللي هناك اسمو دلع
الناس بجد تعبانه جدا....واللي أثر فيا بجد
طفل صغير...البرأءه فعلا في صوره الطفل دا....انا مش هقدر أنساه ابدا
الطفل في فدراعه شرايح باينه جدا جدا من جلده وجلد ايده متشقق وباين منها حديد الشرايح
وامه وابوه مسكين ايده غلط جدا وهو بيتألم عاوذ يعيط مش قادر
شوفت الالم والرعب فعيونه......تخيلوا لما حد بيحاول يقول ااااه ومش قادر
كل لما يحاول أبوه وامه بيبصلوه نظره تنم عن غباء شديد جدا
ماقدرتش اعمل حاجه غير اني ابتسم ليه واحاول اتكلم معاه
هو وسط كل الالم اللي فيه دا...أبتسم ليا بس لما حاول يتكلم معايا الاب والام بعدو بيه كتير وماقدرتش اتكلم معاه
كان نفسي اصرخ او اعمل اي حاجه...بس ما قدرتش
ودا اسوء شعور انك تحاول تعمل حاجه وماتقدرش


أتمني منكم بجد تدعو للناس اللي محتاجين لمجرد دعوه بالشفاء أن ربنا يتم شفاهم علي خير
ولو حد اتعرض لمرض او وجع او ألم
يقول الحمد لله ان دا حصلي....لأنو ساعات كتير بيحس بحاجات لايمكن انها تتوصف
بيحس انه قريب من ربنا جدا...وقريب من نفسه اوي اوي
والناس اللي بجد...بيكونوا معاه فكل وقت مهما حصل...وأن كمان في اسوء من حالته بكتييير اوي
الحمد لله علي اللي عندي وربنا يشفي كل مريض
اللهم امين

هناك 21 تعليقًا:

  1. اللهم أشفي مرضانا ومرضى المسلمين

    ردحذف
  2. يمكن زمان

    أنا كنت أقول أشمعنى و أشمعنى

    بس دلوق بعد ما عشت فى حياتى مواقف كتير

    الحمد لله من هنا لحد ما أموت

    ربنا يشفى كل مريض

    ربنا كبيييير

    أكبر من ما أحنا متخيلييين

    ربنا يشفيكى يا سونى

    و النتيجة كويسة أن شاء الله

    ردحذف
  3. ربنا يشفي جميع المرضى ..
    ربنا يشفيكي يا سوني
    والحمد لله على كل شئ
    تحياتي وتمنياتي بالشفاء

    ردحذف
  4. عزيزتى سونى
    الدنيا مليانه اكثر من كد بمراحل
    لكن فى النهايه بقول وبنفس راضيه نشكر ربنا

    نشكره على الحلوه والمره كمان
    ربنا يتمم الشفاء لكل مريض

    ردحذف
  5. فكرتينى يوم ما وقعت ع رجلى المرة التانية رحت مستشفى عشان اجبسها بعد ما عملت الاشعات بره وكده وخصوصا انها تانى مرة اجبسها فمكانتش سهلة عليا

    وانا فى المستشaفى شفت ناس
    وشفت معاملة
    وتاخير
    وتعطيل
    ولا كان الناس دى عيانه كانها جايه تهزر او تتفسح عندهم
    واما خرجت على كرسى عشان رجلى ممشيش عليها صعبت عليا نفسى وحسيت بالناس اللى مش قادرة تمشى اصلا اللى محتاجة طول الوقت لحد معاها يساعدها
    وحسيت بكمبة المهانة والذل اللى بتشوفه الناس عشان تتعالج

    بجد وقتها حمدت ربنا
    حمدته ع الصحة
    حمدته ع ان معايا فلوس اتعالج ع طول
    حمدته ان معايا اهل
    حمدته على كل حاجة واى حاجة
    و وقتها حسيت بحاجة حلوة اوى لما حسيت ان اللى حواليا حاسين بيا وكده حسيت باحساس حلو بجد يفرق عن اهتمام اللى حواليكى وانتى سليمة
    وفهمت قيمة انك تسالى على المريض لان ده فى حد ذاته بيحسسه بامان وبيرفع معنوياته وبيخلى عنده امل


    ع فكرة انا مكنتش قادرة اكمل البوست لان تعبت وانا بقرا الكلام مش بستحمل اسمع او اقرا اى كلام كده

    والف سلااااامة عليكى وربنا يشفيكى يارب وتبقى زى الفل وتمام
    ويشفى كل الناس والمرضى ويهون عليهم الالم والذل ويهون عليهم المرض

    شكرا
    خليتينى اخد بالى من حاجات كتيرة دلوقتى
    وخليتينى اقول الحمدلله من قلبى
    من زمان مش حسيتها كده

    شكرا
    :)

    ردحذف
  6. ربنا يشفى كل مريض ويخفف آلام الجميع

    ردحذف
  7. فعلا اللي يشوف مصايب الناس

    كل حد للاسف شايف انه عنده مصايب مش عند حد علي الرغم ان ممكن مشاكله بالنسبه لناس تانيه تافهه جدا ومالهاش قيمه

    ياريت يبقي جوانا رضا بابتلاء ربنا لينا


    دمتي بالف خير وحب يارب

    ردحذف
  8. لو كده الحمد لله قبل اى كلمة البنى ادم بيقولها
    بس عارفه بقى
    عارفه
    قولونى وجعنى على السيره
    يا سونى ربنا يشفيكى من حاجات كتير اولهم الرغى طبعا

    ردحذف
  9. عزيزتي انا الان اعيش ما تصفينه بالظبط انا ايضا دفعت شئ ثقيل بطريقة غلط والان انا في الاسبوع التاني والألم يخف شوية لما اخذ مهدئات واحط مراهم ويرجع من تاني اشد من الاول لكن ايضا لاأملك الا ان اقول الحمد لله على كل حال
    دمت بكل الود عزيزتي وأضحى مبارك ان شاء الله

    ردحذف
  10. اولا سلامتك ياجميلة الف سلامه

    عارف انا لما الاقي نفسي متمرده علي العيشه شويه انزل اروح اي عمل تطوعي
    لما بشوف الايتام ولا المسنين ولا المرضي
    بحمد ربنا علي اللي انا فيه وبتعدل علي طول

    :)

    ردحذف
  11. ربنا يشفى كل مريض ويخفف آلام الجميع

    ردحذف
  12. لورنس العرب:اللهم امين

    ردحذف
  13. رامي:ميرسي يرامي
    ودا ينطبق تحت المثل القائل
    اللي بيشوف بلاوي الناس
    بتهون عليه بلوته

    ردحذف
  14. imsa:اللهم امين يارب
    سنكس:)

    ردحذف
  15. مرمر:يارب يشفي كل مريض
    وبلذات اللي مش لاقيين تمن الدوا
    يارب

    ردحذف
  16. ستار:الحمد لله
    اننا كلنا
    بنفكر بعض ديمن
    بالصح
    يارب ديمن
    يكون في فحياتنا ناس
    هما ديمن......اغلي واحلي الناس اللي مشيين معانا بالصح
    اللهم امين

    ردحذف
  17. موناليزا:ياااااااااااااارب
    اللهم امين

    ردحذف
  18. صمت المشاعر:بجد
    اللي بيعيش
    ياما يشوف
    لو كل حد
    ذهقان من حاله
    يبص حوليه دقيقه
    دقيقه وحدا بس
    وهيقولها
    هيقول الحمد لله
    اني كدا
    الحمد لله

    ردحذف
  19. صوت من مصر:ربنا يشفيك ياعم
    والرغي مش مرض
    دا احلي حاجه فالدنيا
    وبعدين دي عادتنا يعني

    ردحذف
  20. خواطر شابه:يارب يشفينا كلنا
    من الحجات التقيله دي
    وكل وااحد ياخد بااالو
    ابوس ايديكو
    محدش عارف ولا هيحس بالالم دا
    والتعب دا
    ربنا يشفينا
    اللهم امين

    ردحذف
  21. شمس النهار:والله طريقه كويسه
    وربنا مايوري حد
    اللي شيفينوا دلوقتي
    يارب

    ردحذف