الأحد، 1 مايو 2011

مش عرفه اقول حاجه

انا بجد ..مش عرفه اقول حاجه
عوزا أكتب وبس
يمكن الكتابه تريحني شويه من اللي جوايا
انا خيفه بجد علي بلدي..من كتر اللي بيحصل فيه
وبقول ديمن ان بكرا كل حاجه هتكون كويسه...ودا يقيني
بس احساسي دلوقتي,ان كل حاجه متدمرا
من كتر بكائي وخنقتي مش شيفه اللي بكتبه اصلا..بس انا عوزا اتكلم وخلاص
موضوع كاميليا اللي ظهر فجأه دا وكان سبب للمظاهرات دلوقتي
سؤالي:هل مصر خلصت من المشاكل علشان يفضل موضوع كاميليا؟
السلفيين اللي ماأعرفشي عنهم حاجه قبل كدا وظهورهم فجأه..ماكنتش اعرف حاجه عنهم الا لما جه موضوع سيد بلال واللي حصلو
وخلافهم مع الصوفيين وبعد كدا مظاهراتهم علشان كاميليا شحاته
أحساسي بيقلي ان مافيش كاميليا شحاته وكل دا موضوع لأحداث مشكله وتظاهرات وبس
طيب حتا لو كانت موجودا فعلا..هل مظاهرات كاميليا دي وقتها
البلد بجد محتاجه لكل ايد علشان تشتغل وتقف بلدنا علي رجليها تاني
كأن في مليون مشكله حوليا وانا ببص يمين وشمال ومش عرفه اركذ فطريقي علشان اعرف اعمل حاجه
كلنا من غير مانحس سلف..اتباع خطوات الرسول والسلف الصالح
طب ايه بيميز ناس عن ناس في موضوع السلف دا؟
كلنا مسلمين او مسيحيين ..بنحب بلدنا
دلوقتي وقت بنا بلدنا..هل نسينا بلدنا
نسينا ان الثوره كانت من كام شهر مش من كام سنه:(
نسينا ان الثوره دي..مات فيها كتير جدا مننا..مسلمين ومسيحين..سلف وأخوان وناس عاديه جدا..محجبه ومن غير محجبه..كل الناس شاركت
نسينا ترابطنا فوقت الثوره وفكل مكان فالميدان وفكل حته
أسكندريه بتغلي..قنا بردو ولو اتحلت مشكلتهم هتتطلع مشاكل تانيه
هوا حرام نفرح بالثوره
تطلع مشاكل ومظاهرات فئويه..تخلص المظاهرات الفئويه تطلع مظاهرات علي كاميليا لنااس ماحدش كان يعرف حاجه عنهم
هل ان ممكن بعد ماقامت ثوره لتصحيح أوضاع..نرجع زي ماكنا واسوأ؟
وقنا اللي معروف انها تظاهرت ضد المحافظ الجديد علشان اللي عمله
يقوم يخلوا المظاهرات لحاجه تانيه خالص
ياتري الغلط فمين ولا أيه؟
حسه ان دماغي متبرجله ومش عرفه افكر
ببص فمليون اتجاه..
انا خيفه عليكي يابلدي..خارجين من وضع اقتصادي سيء
وكلو بيحذر انه هيكون اسوأ لو استمر الوضع اكتر من كدا
واحتمال ان مصر تعلن افلاسها وارد
لو دا حصل لاقدر الله
بشهد ربنا ان كل سبب لكدا...مش مسامحاه
دا أخر كلام عندي
خيفه عليكي يامصر..ربنا معاكي يارب

هناك 61 تعليقًا:

  1. هنعمل ايه
    زي ما قلتها في اول يوم في الثوره
    كل واحد بيدور على مصلحته و بس
    حتي الاخوان بيدوا على مصلحتهم و بس

    اقولك على خبر جديد يخوف شويتين
    البورصه طلعت النهارده تقريرها عن شهر ابريل
    خساره 20 مليار في راس المال نفسه
    و ده مع كل الاحتياطات الى عمولها

    امال لو سابوا الموضوع ايه الى هيحصل ؟؟؟

    ردحذف
  2. مقدمناش غير اننا نقول يارب
    و ندعـــــــــــــي

    ردحذف
  3. سونى زياره اولى

    اقول انا

    الدوله والثوره اللى حصلت
    طلقت افواه كانت مكممه

    والان تنطلق بفكرها سواء كان الفكر ده مريضا
    او علمانيا او دييننا
    بس متقلقيش ليه
    لان لابنا مش هينسانا

    ردحذف
  4. ربنا معاكم ..

    من جد شعور مألم أن نشعر أن هناك أشياء في وطننا لا نفهمها

    دوماً ننتظر الغد الأفضل ولكنه لا يأتي ..

    يحتاج الكثير من الوقت ..

    ربي يعينكم ويعيننا كلنا ..

    نحياتي

    ردحذف
  5. اية يا سوني
    ممكن تهدي شوية
    اناعارف انك بتحبي مصر وخايفة عليها
    شوفي يا ستي فعلا كلامك صح الموضوع في مصر معقد وملعبك ومتداخل ومتشابك...
    ودة طبعا كان نتيجة تراكم الفساد والظلم والحكم السيئ لمصر نتج عنة كل هذا...
    وعلي فكرة ممكن نشوف اكتر واكتر ... اذا لا تستغربي ولا تتعجبي دة نتاج طبيعي لمرحلة التغيير من السابق الي الحالي ..
    بالنسبة للسلفيين انت رديت علي نفسك انت لم تسمعي عنهم من قبل وفجئة ظهروا ...
    لا لم يظهروا فجئة لهم تاريخ كبير من زمن السادات بس الاعلام والدولة وأمن الدولة بهدلهم وأعتقلهم وشردهم وشرد أسرهم وأولادهم وزوجاتهم ونهب اموالهم وأملاكهم ... كل ذلك وهم صابرون يدعون ربهم بالفرج والنصر علي الظالم حتي اتي نصر الله .... كمان فية معضلة كبيرة ان اذا انا أو انت نسمع ان هناك اخ او اخت دخلوا في دين الله بكامل ارادتهم ويسجنوا ويعتقلوا ويعذبوا في داخل الكنائس وهذا صحيح وحقيقي مائة بالمائة ... طبعا دا شيئ مشين
    وبعدين لو السلفيين دول بلطجية كانوا عملوا زي المسحيين البلطجية اللي اخذا اسلحة نارية الية وراحوا ذبحوا اختهم التي اسلمت هي وطفلها ودي مش اول مرة ..
    ممكن جدا لو السلفية بلطجية يدخلوا الكنيسة عنوا وهما علي فكرة بيحبوا الموت في سبيل الله يعني مش خايفين...
    المهم عاوز اقلك لا زعلي دة طبيعي لحد ما الامور تاخد فترة وكلشيئ يعود للهدوء
    تحياتي لك

    ردحذف
  6. مصر بخير وستظل بخير ومر بها من الأزمات كتير وبترجع اقوى من الأول متخافيش على مصر طول ما ناسها بتخاف عليها

    ردحذف
  7. دايما بقول اننا لازم نتغير من جوانا مش من ع الهامش وبس
    زييك تمام ف موضوع كامليا شحاتة ده حساسة هوجة وخلاص للقتال
    ان شاء اله الجاي احسن بإيدينا وبتفكيرنا الصح
    ودعاءنا لله
    وان شاء الله ربنا مش هيرد دعواتنا لاننا صادقين وعايزين الخير

    ردحذف
  8. كل دة من تأثير التويتر
    عارفة اقولك سيبيها علي الله
    لسبب واحد بس
    ربنا صنع هذه الثورة علي عينه
    وخللي عندك يقين ان ربنا سيحمي مصر لانها الاساس لاي نهضة للامة
    تفائلوا يرحمكم الله

    ردحذف
  9. بجد عندك حق يا سوني
    الموضوع بقي عامل زي النكتة البايخة
    بجد لو البلد فضلت كدة قريب جدا مش هنبقي فيها
    المفروض نفوق بقي نبني اللي اتهدم في 30 سنة
    سلبة ولا مبالاة وسكوت وخوف
    تعليم وصحة وحاجات كتير
    كانت خطوة حلوة اوي يوم 25 يناير ليه بيوظوها
    ليه مبيحولوش يكملوها صح
    بجد انا اسفة اني طولت عليكوا
    بس ده اللي كنت محتاجة اقوله
    حلو يا سوني تسلم ايدك

    ردحذف
  10. بصى تخيلى 30 سنه فساد تخيلى كنا عايشين على بركه وكانت متغطيه وفجاه الغطا اتشال هتلاقى كل البلاوى ظهرت
    ده طبيعى فى مرحله ضعف ان يظهر كل ده
    اى ضعف بتتعرض ليه اى دوله وحتى على مر العصور لازم وقت عشان نذدهر
    متقلقيش ربنا معنا ويحفظنا ويحفظ مصر كلها

    ردحذف
  11. السلام عليكم

    أرى أنها محنة وسيأتي بعدها الفرج؛ هو فقط نوع من هواجس الخوف بدافع محبتك لبلادك. وكما قال الأخوة أن هذا كله نتيجة تراكمات سنين من فساد، فمثلا لو حصرنا الماء في سد مثلا فمن الطبيعي لو أطلقناه سينجرف بقوة ولكن من المؤكد أن الأمر سيعود لطبيعته.
    مع كل أنا أحترم صبر المصريين وجلدهم وتفاعلهم، وأفتخر دائما بأنهم رغم كل شيء هم قدوة في التعايش.
    والحمد لله رب العالمين.

    ردحذف
  12. الله يسلم ويثبت اقدامنا
    فى زمن الفتن علينا ان نراجع اهل الثقة من العلماء

    ردحذف
  13. القادم افضل بأذن الله تعالى

    خالص تحياتى و تقديرى

    ردحذف
  14. خلينا نعمل اللي علينا و نوعي بعض مانوقفش نتفرج , عايزين نشتغل و نفكر و نبدأ بنفسنا نغير أي سلوك سيئ كنا بنضطر نعمله و نركز في الايجابيات.
    سيبيها على ربنا و ان شاء الله تُفرج.
    تحياتي ليكي

    ردحذف
  15. انا معاكي عن الامور ممكن تخرج عن السيطرة بس خوفك لحد دلوقتي زيادة عن اللزوم, فيه ناس كتير تقدر تحافظ على الثورة, الخوف الزيادة ده ممكن يساعد الثورة المضادة

    ردحذف
  16. خافي

    بس الفرق بين الرأي الواحد والتعدييه

    والفرق بين أنعدام المسئوليه و تحملها كامله

    ناهيك عن أنعدام التجربه وغموضها

    كل دي اسباب للخوف

    ردحذف
  17. سونى
    انتى بجد حد بيحب بلده بجد وبيخاف عليها وان زيك تمام بنحبها بس صدقينى كل ده متوقع وباذن الله لو عبرنا الازمه دى هتكون بلدنا احسن
    تحياتى ليكى

    ردحذف
  18. ربنا يصبر البلد يا حجة
    بصي بالنسبة للسلفيين فمش هقدر أقول إنه غلطوا ـ لكن توقيتهم غلط . وخلافهم العقائد مع المتصوفه هما أحرار فيه .

    بس برضوا الكنيسه مش عارف ليه محسسه الناس ان دا تنازل .


    الحل بسيط لموضوع زي ده : كامليا تروح النيابة في حماية وتدلي بشهادتها .

    أسلمت أهلا وسهلا
    لسه مسيحية : لكم دينك ولنا ديننا .

    واللي يتكلم بعد كدا سواء سلفيين أو مسحيين يخبط دماغه في الحيطة .

    البلد مش ناقصه ، استنوا نعدي من الجسر اللي تحته نار جهنم وبعد كدا نشوف كل الحقوق وصاحب الحق ياخده والمقصر ياخد علي دماغه

    ردحذف
  19. عندك حق والله ياسوني
    ونفس اللي انتيخايفه منه انا خايف منه
    بس اقولك علي حاجه
    دا وضع طبيعي جدا
    ولازم يحصل بعد الثورة دي
    الناس مصدقت تقدر تتكلم وتخرج
    ان شاء الله ربنا هيعديها علي خير
    والحمد لله اننا مش زي ليبيا ولا اليمن ولا حتي سوريا

    ردحذف
  20. أنا كمان حاسة إنه مش موضوع أصلا. مش بس مش وقته. حاسة فيه ناس ورا الموضوع دة عشان يعملوا حاجة معينة، و بس بتمنى تكون مش حاجة من برا لأن اللي في مصر إن شاء الله هنقدر عليهم

    الموضوع يدايق جدا، بس واثقة إنها هتعدي. مش هتكون آخر مشكلة دة طبيعي دلوقتي. مفيش تغيير بيحصل في يومو ليلة، و بعد أي تغيير بييجي فترة لخبطة و هبوط في كل حاجة. دة بجد طبيعي نسبيا. إحنا بس نعمل اللي علينا و إن شاء الله الدنيا هتبقى أحسن زي ما كنت بتقولي يا سوني
    خليكي بتقولي كدة. بكرة أكيد أحسن

    ردحذف
  21. متقلقيش خالص
    اللي يخلينا نعمل ثورة على ظلم واستبداد وتخلف وقبضة حديدية كبلت مصر لمدة تلاااااااااااااتين سنه.زمش هنقدر نعدي من حاجات زي دي؟!

    مصر أم الدنيا وربنا حاميها من بدء الخليقة ليوم الدين. ربنا سبحانه وتعالى قال: ادخلوا مصرَ ان شاء الله آمنين.

    بس دا قلق طبيعي ومشروع من كل حد وطني وبيحب بلده بجد..وان شاء الله هتعدي على خير
    :)

    ردحذف
  22. لو بتثقى فى كلامى

    يبفى اطمنى
    مصر اللى انا اعرفها اقوى من كده بكتير
    اللى حصل مش مجرد ثورة دا تغيير تاريخى
    وارجعى للتاريخ سواء القديم او الحديث وانت تفهمى اكتر وتطمنى

    مصر بخير

    ردحذف
  23. طول ما فيه ناس كويسه خايفه عالبلد حالنا حيتصلح غن شاء الله بس واحده واحده يا سوني ...عمرك شفتي بيبي بيجري أول ما يتولد؟ لا بيفضل نايم وبعدين يبتدي يقعد وبعدين بيحبو وبعدين يقف يتسند ويمسك في ايدين مامته وبعدين تاتا تاتا وبعدين تلاقيه بيجري جري(:

    ردحذف
  24. "دايمن"
    دايماً الالف ثم شيفت ص ياقمر القمرات (:

    "سؤالي:هل مصر خلصت من المشاكل علشان يفضل موضوع كاميليا؟
    "

    لأ ماهو لو كل مشكلة هنيجي نحلها ونقول يعني احنا خلصنا اللي عندنا عشان نحل دي يبقى مش هنحل حاجة
    وبعدين كاميليا ووفاء قسطنتين من حقنا نعرف مصيرهم لانها مشكلة انسانية ..كل المشاكل تتأجل الا المشاكل الانسانية .





    السلفيين اللي ماأعرفشي عنهم حاجه قبل كدا وظهورهم فجأه..ماكنتش اعرف حاجه عنهم الا لما جه موضوع سيد بلال واللي حصلو"


    " هو عدم معرفة القمر بيهم مش معناها نفي وجودهم هما موجودين من زماااااااااااااان جداً وهما ناس محترمة اعيب عليهم بعض الافعال وعدم اندماجهم في المجتمع وتطور سلوكياتهم بس ده ميمنعش وجودهم في حياتنا وانهم شريحة من شرائح المجتمع المصري

    لولا

    ردحذف
  25. مش هزود كلمة على كلامك يا سونى لان الخوف اللى جواكى جوايا

    بس معلش اسمحيلى اقول كام كلمة للاستاذ على يونس

    حضرته بيقول وبيأكد ان فى تعذيب فى الكنائس والاديرة

    طيب يا بشمهندس سيادتك عندك دليل ؟؟

    حضرتك شوفت بعينك

    ولا حضرتك بتقول اللى بيقولوه وبس من غير ما تتأكد

    بيتهيألى ان فى اية فى القران بتقول ان جائكم فاسق بنبأ فتبينوا ان تصيبوا قوم بجهااااالة

    مش كده بردو ولا ايه ؟


    عيب جدا ان انسان مثق يقول كلام بدون دليل

    سامحينى يا سونى لكن التعليق لفت ظرى واستفذنى

    كمان بيقول ان المسيحين بيقتلوا وارهابين وبيستدل بده ان اخ قتل اخته

    طب حضرتك هو كام مسلم قتل اخته وامه وابوه ؟؟

    هل انا بقى اقول ان المسلمين قتلين قتلى وارهابيين بنفس المنطق ؟؟


    حقيقى سبحان الله

    ردحذف
  26. لا تتعجبى و لا تقلقى انها ارادة الله ان يظهر كل صاحب رأى و قضية ليدافع عنها قد تجدى انها فى نظرك صغيرة و لكن عند آخرين هى قضية حياتهم فما معنى الحياة بدون قضية نعيش من اجلها فلنجعل قضيتنا الان هى رفع المظالم حتى يستطيع كل فرد ان يعمل بجد و ضمير من اجل الحفاظ على الحقوق المكتسبة و هذا طبيعى بعد ثورة بهذا الحجم و ربنا معانا و يحمى مصر من كل شر و متقلقيش من السلفيين ما بيعضوش

    ردحذف
  27. أنا مش شايفة سبب للخوف
    سبب للقرف
    ملوين سبب للقرف ربنا يقل من المقرفين من ذوي الشمال وذوي اليمين
    لكن خوف..نو .. ابسلوتلي

    كل شيء سابق وآني بيقول كلمة واحدة
    مصر لن تعود مرة أخرى للإنبطاح التام
    مهما حد قاوم حركتها محركها البخاري "اللي هو أهلها" أقوى من اي مقاومة

    ربنا يجيب المخبي لطيف

    ردحذف
  28. المسألة أسهل من كده بكتير
    و حلها سهل ,
    إن كاميليا تروح النيابة و تقول أنا نصرانية يا جماعة , طلعوني من دماغكم ,

    إنما إنهم يطلعوا لها صور و لا فيديو و الناس تقول عليه متفبرك و كده ,
    ده حله بسيط إنها تروح النيابة و تهدي الدنيا ,
    أما مسألة إنهم بيعطلوا البلد , فده مش اعتصام مفتوح و لا مقفول ,
    دي مظاهرة ليوم واحد , و كل واحد بيروح شغله و ينتج و يدور عجلة الإنتاج عادي ,
    فمافيش أي ضرر على البلد و لا حاجة ,
    بس خلاص :)

    ردحذف
  29. "كلنا من غير مانحس سلف"
    فعلا عندك حق يا سوني..
    الموضوع فيه اطراف بتوجد مشكلة من غير مشكلة..
    ربنا يحفظ مصر من كل سوء.

    ردحذف
  30. سبايدر مان:
    عندك حق

    مشكله
    الناس مسكه فالفروع وسيبه المشكلات الاساسيه
    طب وبعدين

    يارب

    ردحذف
  31. كاشف همومي:
    المدونه نورت بيك

    واكيد سيباها علي ربنا
    ونعم بالله

    ردحذف
  32. المورقه عبير:

    ملناش غير ربنا ندعيله يثبتنا ويثبت اقدامنا

    ردحذف
  33. علي يونس:

    انا مااعرفشي ان ليهم تاريخ قديم كدا
    واقدم كمان بعد مادورت وعرفت عن خلافتهم مع الصوفيه

    بس الفكره ان كان نفسي نعمل زي اليبان
    بجد بجد بزعل وبضايق من اللي بيعملوه
    زلزال زدمر كل حاجه

    وبرغم كدا وقفوا علي رجلهم تاني
    واحنا اربع شهور

    ومازلنا متعثرين

    رحمتك يارب

    ردحذف
  34. هشام الجندي:
    لو ماخفتش عليها
    هخاف انا علي ايه؟

    ردحذف
  35. رحاب صالح:
    ياريت يارحاب

    مش عرفه انا الدماغ دي هتودينا وتوديهم لحد فين

    ردحذف
  36. هيثم السايس:
    مش تويتر بس

    ياري ياهيثم
    يارب

    ردحذف
  37. لولو:

    اللي عملوه الثوار يالولو
    هدوا كيان كان واكل كل حاجه
    ولسا موجود منو فكل مكان
    الله اعلم بكرا هيحصل ايه

    بس بأذن الله عندي يقين انها هتكون احسن


    ويمكرون ويمكر الله والله خير الماكرين

    ردحذف
  38. نيللي:

    اكيد يانيلي
    الخراب فكل حتا وكان مدفون

    بس مش وقت لما نعمل حاجه صح
    نبوظ اللي عملناه

    ولا ايه؟

    ردحذف
  39. ابو حسام الدين:

    شكرا لكلامك بجد كتير
    شكرا ليك

    ردحذف
  40. طارق سليم:
    ربنا يحفظها ويحميها يارب

    نفسي
    نفسي الامان يرجع ومصر ترجع بجد
    يارب
    اللهم امين

    ردحذف
  41. ابراهيم رزق:
    دعواتك

    يارب

    ردحذف
  42. شيرين سامي:
    معاكي صدقيني
    بس مانسبشي اللي بيسلطوا الناس دول
    يوصلوا لهدفهم
    لازم ناخد بالنا منهم كويس

    ردحذف
  43. هتشوفوا:

    الحمد لله علي كل حال

    ردحذف
  44. مصري جدا:
    زي كل دول
    زي الفرق مبين الخوف المرضي والخوف الصحي

    وانا خوفي صحي
    وبأذن الله منو الشغل الصح والانطلاق

    ردحذف
  45. شريف صابر:
    اتمني بجد

    اتمني

    ردحذف
  46. سيدي الرئيس:

    هي كامليا خلصت جابوا عبير

    طب الموضوع دا هيفضل لحد امتا
    والناس مش فاهمه ولا عرفه
    ولا ايه اللي بيحصل

    استغفر الله العظيم

    ردحذف
  47. العقل الجميل:
    لو انتا معترض علي حاجه

    اتصرف صح
    العين عليك دلوقتي

    مش تتصرف بهمجيه
    سواء منك او من الطرف التاني

    الطرفين غلطانين
    يبقي يتعرف الغلط منين

    والقوانين الكل يحترمها
    وخلصت علي كدا

    ردحذف
  48. Wish I were a Butterfly :

    والله فكدا عندك حق
    الحمد لله علي كل حال

    ردحذف
  49. قلم رصاص:

    شكرا ليك
    ريحتني بجد

    ردحذف
  50. الازهري:
    بحاول والله

    دعواتك

    ردحذف
  51. كلمات من نور:

    شكرا ليكي
    وعلي فكره انا حاولت اعلق علي مدونتك مش عرفت

    شكرا لمرورك

    ردحذف
  52. لولا وزهراء:

    لولتي:)
    دي الوغه بتاعتي اولا
    ثانيا كنت بكتب ومش ببص علي اللي بكتبوا لاني فعلا مخنوقه ومش عرفه اعمل ايه

    وشكرا علي معلوماتك القيمه

    منوراني

    ردحذف
  53. ميس فينوس:

    معلش بس الكلام دا موجود او مش موجود
    الطرفين مخوفين بعض ياحببتي

    وخوفهم من بعض بدال ثقتهم فبعض دا غلط

    والحل تطبيق القانون علكل بغض النظر عن ديانته
    وقبلها معاقبه المخطئ من الطرفين

    شكرا لمشاركتك

    ردحذف
  54. محمد بهجت:
    ممكن يكون عندك حق

    بس اللي برجوه
    التصرف الصحيح
    لا اكثر

    ردحذف
  55. ستيته حسب الله الحمش:
    ايون يمامي قر

    بس تعدي بالنسبالي لمرحله الخوف علي بلدي

    طب والعمل

    نفسي حد يعمل حاجه بقا:(

    ردحذف
  56. تيمي:
    ياريتها يوم واحد

    دا بقا شغل مابيخلصشي

    تعبت بجد واتخنقت

    ربنا يارب يعدي الايام دي علي خير

    ردحذف
  57. تيمو:

    وياريتها حاجه علشان تتخانق علها

    نهايه الكلام
    القانون يطبق

    كلو هيتحل
    بس خلااص

    ردحذف
  58. حلوه قوي :)))
    يارب البلد تعدي بجد يااااااااارب

    ردحذف
  59. السلام عليكم سونى
    تحياتى
    انا جيت هنا تانى احسن من الفيس بوك عشان نقرأ كلمه ونقول كلمه لكن فى الفيس ورشه ودوشه وما حدش فاهم ولا حد عارف حاجه.

    شوفى بقى يا سونى .. انت عارفه عفريت العلبه شكله ايه .. آهوا النظام السابق كان مخبى لنا كذا عفريت فى العلبه وقبل ما يمشى راح مطلعهم وطالقهم علينا وطلعوا يجروا هما ينجوا بنفسهم .. لكن ربنا كبير
    تحياتى

    ردحذف
  60. الصبر مقتاح الفرج يا سوني

    اعملي اللي عليكي و ادعو غيرك للعمل

    ردحذف
  61. ماتخافيش ياسوني
    مصر اكبر من ده كله

    وعمرها ماهتقع

    وحشتيني ووحشني الجروب هناك

    ردحذف