الجمعة، 26 مارس 2010

بنت ومامتها

قابلتني مامتها الصبح وانا ريحه الكليه..يافتااااح ياعلييييييييم يارزاااق ياكريم,دا أنا فسري لاني طبعا موش هقولها فوشها:)
اذيك ياسوني وعمله اييييه وايييه اخبارك كدا بقالي كتييييييييييير مشفتكيش..(انا من جوايا ربنا يسترها يااااااااااارب)
اذيك ياطنط انا الحمد لله كويسه وانتي عمله ايه وصحتك عمله ايه كدا؟؟؟
والله ماعرفه ياسوني صحبتك دي هتجبلي الضغط والسكر...
(انا من جوايا :مع بعض...لييييييييييييه)الف سلامه عليكي ياطنط ايه بس اللي حصل علشان كل ده
صحبتك اتقدملها كام عريس كدا كويسين ومحترمين وهي موش عوذه تقبل بولا واحد فيهم
لسه ياطنط مجاشي صاحب النصيب ولما هيجي هيحصل بأذن الله
مهو طول مابتعمل كدا يبقي موش هيجي ابدا..متعرفيشي ياسوني هي بترفضهم ليه ..طب يعني فالكليه في حد وهي موش عوذه تقولي؟؟؟
انا بقي ركبت وش موزبهل كدا ولاااااا كأني اعرف حاجه..وقلت الله اعلم(وانا عرفه علي فكره,شوفتو التسوييييييييييس هههههههه)
وانتي ياسوني مفيش حد لسه؟؟؟؟؟؟؟
انا وقد بدأت اتخنق:كله بأمر ربنا ياطنط وبعدين انا موش عوذه دلوقتي انا مركذه فدراستي حاليا وبس
ياطنط خليها براحتها والمفروض متتجوذسشي اي واحد والسلام لاذم يكونو مناسبين لبعض علشان يشوفو اذا كانو هيقدرو يستمرو ولا لأ
يعني لاذم يلعبو اكس أو يعني ولا يرسمو قلوب والكلام الفاضي ده
انا:طااااااااااااااااااانط.....محطتي جت ..عن اذنك ..سلام
ولما روحت الكليه بأه مسكت صاحبتي:انا شوفت مامتك النهارده
نعم؟؟؟؟؟؟؟؟طب وقلتلك ايه
حكتلها علي اللي حصل
ونسيت اقولكو..صحبتي في حد بيحبها وبتحبه..بس عاوذ علاقتهم فالنور..لابيتكلمو ولا بيقعدو مع بعض ولما كان عاوذ يكلمها وشه جاب الوان وهي كمان :)
اصلهم بيحبو بعض من بعيد لبعيد وموش عوذين يقعو فالغلط...هو مستعد بس علي خفيف وعوذها تصبر عليه شويه وهي مستعده لكدا وانا كنت حمامه السلام اللي فالأخر بتاخد كل الذوند اللي الكل عارفها هههههههه
انا عرفه ان كل ام نفسها نشوف بنتها فبتها كدا وحوليها اولاد بنتها..بس هل دا معناه انها تتجوذ اي واحد والسلام من غير ماتعرفه ويعرفها ولا ذم حد يكون فعلا بيحبها وشاريها؟؟؟؟؟؟؟؟
بجد محتاجه رايكو.....
تحياتي




هناك 50 تعليقًا:

  1. على الاقل يكون مناسبين لبعض من جميع النواحى

    ومش هقول يكونوا بيمتوا فى بعض بس على الاقل كل واحد مستعد يحب التانى ويخلص له وده معناه ان كل واحد مفيش فى حياته حد غير التانى

    انما بقى لو بتحب حد تانى يبقى ده وضع تالت هى تشوف ظروفه ايه ولو مفيش نصيب ولا امل يكملوا مع بعض بيتيهالى ملوش لزوم تستنى على امل هى عارفه انه مش جاى انما لو ظروفه تمام بس محتاج وقت بيتهيالى تستناه احسن

    ردحذف
  2. والله يبنتي مبقتش عارف..
    كل قصص الحب ال شفتها قدامي انتهت بالفشل... وانا اقصد هنا الحب ال انا متأكد انه كان بجد.. مش تضييع وقت..
    تقريبا 5 % بس البينتهي نهاية سعيدة...
    يمكن انا متشائم... يمكن..


    ماعلينا... كده كده هيا لسه بتدرس.. خليها تستني لما تخلص... صاحبنا خطبها رسمي كان بها.. استندل او هيا الا استندلت... فلة ... تبقي عرفت راسها من رجلها.. بس متتعقدش..

    تحياتي.. ومعلش علي الكومنت الغتييت بتاعي ده

    ردحذف
  3. أنا موافقك يا أبو على

    فعلا معظم قصص الحب إللى بنعاصرها بتنتهى بفشل
    يمكن لإن الوسط المحيط بيها فى مصر مينفعش ينمو فيه حب

    يمكن لإن المصريين مبيعرفوش يحبوا أو إن الحب مش من ضمن أولويات حياتهم


    يمكن لإن الحب بالشكل دا حاجة غلط


    يمكن المفروض منحبش أصلا

    مش عارف

    بس الخلاصة واحدة ......قصص بتبدأ جميلة و بتنتهى مؤلمة و بتصبح ذكريات غير مرغوب فيها

    ردحذف
  4. صباح الفل يا بنوتي

    اولا الحب جميل للي عايش فيه
    بيديه طاقة اجابية ينجز بيها احلامه ويدفع بيها نفسه للأمام
    وأي حب لا يعلو بصاحبه فهو احساس فاشل ومش حب اشاسا

    ثانيا بحزن كتير لما اعرف ان فيه بنت مخبية شيء جوهري كده عن مامتها
    مش بلوم البنت
    بلوم الأم الفاشلة اللي مش عارفة تبقى صاحبة لأعز الناس .. اللي هي بنتها

    ثالثا بما ان حبها ايجابي ومش فيه شيء حرام والولد داخل في سكة جواز فسنة والتانية والحقائق كلها تبان ويتعرف هل مشاعرهم حقيقية ولا مجرد افتتان
    وطالما معملتش شيء حرام فحتى لو طلعت مجرد افتتان فهي مشاعر جميلة ستظل لها ذكرى في القلب وكمان تجربة انسانية ها تضيف لشخصيتها ولن تأخد منها

    المهم في الموضوع تحري الحلال والحرام
    علشان اللي بيتحرى الحلال ربنا بيبارك له في الرزق اللي في ايده
    يعني الراجل اللي بتحبه

    بحبك وصباحك فل يا عيوني

    ردحذف
  5. اولا طالما فى حد فى الكلية
    وهى متعلقة بيه
    يبقي مستحيل هتوافق على حد يجيلها

    بس لازم تعرف كويس اذا كان اللى فى الكلية دا اد المسئولية ولا لا

    يعنى هينجز وليه مستقبل كده ولا لا

    لو لا يبقي تحاول تصرف نظر بدرى بدرى قبل ما يتعلقو ببعض اكتر

    لان الارتباط مش حب بس

    لازم فى تكافؤ وتوافق ظروف مستوى متقارب وشوية حاجات فوق بعضها

    بالنسبة للعرسان اللى بتيجي
    لو مفيش حد متعلقة بيه فى الكلية
    مقولناش تتجوز اى حد
    بس ع الاقل يتشاف كده وتعرف ظروفه

    وتشوف فى قبول ولا لا
    مستريحاله ولا لا
    دا مبدأيا قبل الكلام فى اى حاجة

    لو مستريحاله يبقي يتكلمو فى بقية التفاصيل
    مش مستريحاله يبقي ترفض على طول من غير كلام

    وزى ما قولتى
    كل واحد بياخد نصيبه

    نصيبه بقي مش تقوليلي مركزى فى دراستي وبس :D

    ردحذف
  6. صدقتي ده قسمة و نصيب

    ردحذف
  7. عزيزتي قصص الحب فيها الناجحة التي تكلل بالنهاية الطبيعية الا وهي الزواج وهناك قصص كثيرة ايضا لا تكتب لها هذه النهاية وتنتهي لاي سبب من الاسباب
    بالنسبة لصديقتك عليهاأن تريح والدتها ليس هناك من هو اقرب اليها منها ولا من يريد مصلحتها أكثر منها لتصارحها بمشاعرها وبرغبتها في انتظار من أحبه قلبها وعلى العموم زمن الغصب والاجبار انتهى فوالدتها ستتقبل الامر حتى ولو كانت غير راضية على ذلك
    تمنياتي لها بالتوفيق
    تحياتي

    ردحذف
  8. اهم شىء هو التوافق والاندماج بين الشخصين واكيد بالتعامل الحب هيجى هيجى ولو مجاش فتره الخطوبه اتعملت لكده ...يعنى مش مفروض البنت توافق على اى شخص والسلام لازم طبعا يكون مناسب وعقلها مقتنع بيه وتشعر انه انسان مريح ممكن تحبه وتكون مخلصه ليه....انما بقى الحب فى الجامعه وترفض انسان مناسب علشان زميل ليها وهيكون نفسه واللى بسميه شغل العيال ده فانا ضده تماما لان هناك مؤهلات لازم تتوفر فى هذا الشخص ومؤهلات تتوفر فى البت ايضا ليكونوا مؤهلين للزواج ومسئوليته .

    ردحذف
  9. السلام عليكم ..

    يعافيك ربي اختي سوني ..

    لا أكيد الزواج يحتاج تأني وصبر ..
    نظام خذوة فغلوة ماينفعش ابداً..
    وفي النهاية هو قسمة ونصيب..
    ابن ادم علية التفكير وللرب التدبير..

    ربنا يهني الكل ويسعدهم ويوفقهم
    اطيب التحايا

    ردحذف
  10. بصي انا طول عمري مقتنع ان راي الاهل هو الصح
    بمعني فيها ايه لما الام تقول ان العريس الفلاني كويس و تقولي علي حاجات انا مش شايفها( ده لو انا بنت هههههه)
    و انا في الاخر عليا اني انقي و اقول رايي
    بس حتة ان ارفض علشان في واحد انا معجبة بيه
    او قصدي اني واهمة نفسي اني معجبة بيه( ده برضو لو انا بنت)ده غلط

    ردحذف
  11. سونــــي2000 ............
    حبيبة قلبي يا قمرايا واحشاني واحشاني واحشاني موت و الله يا قلبي

    و معلش اذا غيبت الفترة اللي فاتت دي بس علشان ببقى برة البيت كام يوم كده

    البوست جميل اوي
    و رايي ان البت في الموضوع ده بيختلف من ناس للتانية يا سوني

    يعني فيه بنات عايزة تحب و تتحب و تتجوز انسان و يكونوا متشابهين مع بعض في حياتهم

    و فيه بنات عايزة تتجوز من غير ما يبقى فيه حب الاول و بردو هتعرف تتاقلم مع جوزها و تحبه و تخليه يحبها و يعيشوا في سعادة مدى الدهر

    و فيه بنات عايزة تتجوز و خلاص ظل راجل و لا ظل حيطة

    و فيه بنات عايزة تتجوز اي حد و السلام ارضاءا لاهلها

    لكن لو سالتيني عن رايي
    انا بشجع الاتنين اللي في الاول
    احب و اتحب و نتجوز
    او اتخطب و بعدين احب خطيبي و نقرب من بعض و نتجوز و نعيش حياتنا كلها سعادة

    ربنا يخليكي يا قلبي

    خالص حبي و حبي و حبي و تقديري

    و عقبال ما افرح بيكي يا حمامة السلام يا رب

    هههههههههههههههههههههههههه

    ردحذف
  12. جواز الصالونات ده بيعقد و الله
    مع ان فيه جوزات كتير بتفنع فيه لأنه بيبقي قايم على العقل اولا و منكرش ان ده الصح برضه
    بس برضه مينمعش انه لازم يكون فيه شويه من البتاع ده الى اسمه الحب يعني حتي ولو على خفيف من قبل ما حد يتقدم لحد
    مش يروح من الباب كده على ططووول لواحده ميعرفاش

    ردحذف
  13. أعلنها مدويه
    أنا بأيد الدكتوره ستيته في رأيها قلبا وقالبا

    سلاموا عليكوا

    ردحذف
  14. هلا سوني حبيبتي ...

    حلو أوى الحب البريء ده ...

    والأحلى لو البنوته صاحبتك تتقرب لمامتها شويه وتقولها على اللى في قلبها طالما هي مش بتعمل غلط ... عشان تتفهم رفضها وماتغصبها على حاجه هى مش عايزاه ...

    ربنا يوفقها يارب ويوفقك حبيبتى
    ... ;) ,,, ;) ...

    ردحذف
  15. star in the sky:ايه مين فين ليه
    هههههههههههههههه
    لاا هما بيحبو بعض بس فالخباثه كدا
    وانا اللي اعرف بس
    اصلي الحمام بتاع السلام ده عارف كول حاجه
    بس سووووووووسه
    سوسه:)

    ردحذف
  16. سمع هوص (Abo 3li):كومنتك موش غتيت ولا حاجه
    وانت عندك حق انا برده شوفت ان عدد قليل اوي من نعانا لما بينتهي النهايه المفروضه
    بس بيبقي عدد قليل اوييييييييييي
    موش ذي اللي متوقعاه نوهائي
    يلا ربنا يهدي الجميع:)

    ردحذف
  17. هراء لا داعى له .....:
    اييييه ياعم دا كلووووووووووووووو
    الصح من الاساس المفروض انه يكون معروف
    بس المشكله فحاجه
    ان الكبار معلمو ناش اذاي نحب صح
    لان الكل اصلا خارج من الحياه بمفهوم ان الحبدا عيب ولا يجوذ
    ومعندناش غير حب الله والاهل والوتن وبس:)

    ردحذف
  18. ستيتة حسب الله الحمش :صباح النور يانور عيوني يامتتي
    يالهوتيذ...دي دخلتك عليا دولوقتي هعمل فيها ذي الصعايده عندنا واجيب طبنجايه وهقعد اديها طااااااااااخ طااااااااااخ...هههههههههههههه
    جمعه مباركه ياممتي وانتي عندك حق
    انا اخدت سكه تانيه خالص وبقول لماما علي كول حاجه
    لاني اصلا نويت اني مأخبيش حاجه عليها لان دا الصح اساشا
    بردك الكبار هما اعرف وافهم مننا فأي حاجه لانهم خبره عننا
    وربنا يهدي الجميع يارب
    مرورك عليا دلوقتي خففني كتييييير اوي ياممتي
    تسلميلي:)

    ردحذف
  19. !! a7mad sala7:مهو لو ظهر منه حاجه وحشه
    انا موش هسكت اساشا
    ايون عرفه الاتنين بس مرايه الحب عميا
    والحمد لله انها بتثق فكلامي لانها لو موش وثقه ماكانش قالتلي وهو جه عرفني بعدها
    واجي انا هنا فالاخر واعييييييييييش
    هههههههههه
    هو حد جدي وانا مسكتش ولا هي لاننا عوذين نشوف حل للموضوع ده
    وقلتلها لاذم تقول لمامتها واهي بدات تتكلم معاها
    علي الله بس مامتها متكونشي دماغها ناشفه لما تعرف سبب رفضها للناس اللي بتيجي
    ربنااااااااايوووووووووستور:)

    ردحذف
  20. Sonnet:هو اكيد قسمه ونصيب
    والحمد لله يارب يطلع نصبها كويس:)

    ردحذف
  21. خواطر شابة:مهو فعلا مفيش غير الصراحه مع الاهل علشان الكل يستريح
    وياااااااااااااااااااااااما نصحتها بكدا
    بس خوفها ديما غالبها
    وبحاول اشجعها تقولها
    اهو بنعمل اللي نقدر عليه
    وفالاخر...كلووووووووو بيجي علي دوماغي انا:)

    ردحذف
  22. SHAPE YOUR LIFE (ABOALI) :بجد انا معاك فكل كلمه
    بس هنشوف كدا ونجرب
    لو هي شيفاه موش قد المسئوليه كانت فركتشها من ذماااان
    وخصوصا انها من النوع المتردد جدا
    ومدام ماهي اساشا متمسكه بيه....يبقي اقتنعت بيه قوي
    يارب بس بعد دا كله ينتهي الموضوع علي خير
    ياااااااارب:)

    ردحذف
  23. عنّاي العيون :اكيد طبعا كل شيء قسمه ونصيب
    وادينا بنعمل اللي علينا اهو
    مهو كله مرررررردودن مردودن ياولدي:)
    يارب يوفقها يارب والموضوع يمشي علي خير

    ردحذف
  24. حصان المرجيحة:لاااااااااامهي مرحله الاعجاب دي عدت من ذمان
    وبصراحه وانت بنت دي الحجات دي كانت ذمان
    دلوقتي لاذمن تفحيص وتمحيص
    واساشا انا عن نفساويتي موش ساكته الا لما اجيب قراره
    موش صحبتي ولا لاذمن اسبها وحدها كدا
    لو سبتها كدا هتغرق بعيد عنك
    لانها لاليها فالطور ولافالطحين بعيد عنك
    علشان كدا لجئتلي واهو بنساعد علي قد مانقدر

    ردحذف
  25. مهموهـــــــة :طب قوليييلي كنت اخدتيني معاكي بدال رقده البيت اللي انا فيها ناو دي
    بسبب تعبي
    يالهوتيذ
    انا عمري ماقعدت كل المده دي فبتنا من غير مااخرج
    يلا ربنا يتم شفا الحميع علي خيييييييير
    واهو كل واحد بيشوف نصيبه
    اما عن حمامه السلام فهي دماااااااااااااااااغ لوحديها
    وانا اساشا هتعب جمجمتي ليه فالحجات دي
    كدا احسن من وجع القلب وعماليه
    انا والحمد لله جمجمتي مستريحه كدا وموش عوذه اي حاجه ناو
    ولما ربنا يأذن ...هبقي اقولك
    هههههههههههه
    تسلميلي ياقمرتي ومبروك العوده:)

    ردحذف
  26. سبايدرمان:يختااااااااااااااااي
    اسكوةت ياخويا والنبي
    اللي شفته حصل فعيلتي من جواذ الصالونات ده
    يعقد اساشا بلد
    علشان كدا احسن حاجه فعلا الجواذ وفيه شويه حب حتي لو صوغنططين
    ربنا يوفق الجميع يارب

    ردحذف
  27. قلم رصاص :
    وانا كمان معااااااااااك
    معاااك
    معااااااااااااك
    ههههههههههه
    وعليكم السلام ورحمه الله وبركاته

    ردحذف
  28. ghada mOhsen :اذيك ياغدودتي وحشاني مووووت موت
    وانا اهو وراها وراها لحد ماتعملها والموضوع بأذن الله يتم علي خير
    ادعولها بس ان ربنا يتملها علي خير
    قااااااااااادر ياكريم:)

    ردحذف
  29. مساء الخيييييييييييييييييييييييييييييييير

    ردحذف
  30. سمع هوص (Abo 3li):مساء النوووووووووور ياابو علي
    فين الشيكولاته اللي عليك
    اسيح ولا بلااااااااااش:)

    ردحذف
  31. يا سونى .. ازيك
    الجواز يا سونى قصمه ونصيب .. مش شرط انهم يكونوا بيعرفوا بعض ومش شرط انهم يحبوا بعض ومش شرط كل الشروط اللى انتم فاهمينها .. المواضيع معايير بتحطها كل واحده او واحد لنفسه وبعدين لما تيجى المعايير دى على مقاس واحد او واحده بيحصل النصيب .. ويارب يجيلك نصيبك

    ردحذف
  32. فشكووول :اكيد طبعا قسمه ونصيب
    كفايه ان ربنا هو اللي كنبه للبني ادم
    وهيشوووووووووفه هيشوووفه
    وانت دلوقتي بتدعي عليا ليييييييييه
    ههههههههههههه
    موش قلت انا كدا تومام
    حللللللللو اوي
    انتخه فالبيت...بعمل اللي عوذاه وقت ماانا عوذاه
    بذمتك لو اتجوذت هعرف اعمل كدا
    ويحضرني اغنيه امينه بتاعه الحنطور وموش فكره اسم الاغنيه اساشا:)

    ردحذف
  33. انا جيييييييت

    اول مرة اجي المدونة دي ولو مرحبتيش بيا هصوت واعيط

    عاااااااااااا

    بصي ياقمر .. لازم نختار اللى يناسبنا

    لازم نحط اختبارات زي ماهما بيحطولنا اختبارات

    بس عارفة البروبلم .. ان اغلبية قصص الحب مابتمش

    انا اعرف واحدة قعدت تحب ف واحد 3 سنين

    حب من بعيد لبعيد وهو بيحبها من بعيد لبعيد

    بحجة انه مش عاوز يظلمها

    وفجأة كلمها وقالها انا مش عاوزك تضيعي مني

    وبقو بيكلمو بعض وبيسالو ع بعض

    و3 سنين متقعدوش فيها مع بعض وخرجو الا مرتين تلاتة ..

    واذ فجأة ف الوقت اللى المفروض يتقدملها فيه .. قالها مش هاثق ف واحدة خرجت معايا .. وواحدة مش قاعد معاها معرفش هي بتعمل ايه وانا بعيد

    يعني ف الاخر سابها وجرحها وكرهها ف نفسها وف الصنف كله يا اوختي :D

    ودلوقتي بحاول اعالج فيها ومش عارفة :D

    ابسط حاجة تقولي يا ريمووووو انتي مش حاسة بيا عشان انتي مش ف مكاني :(

    وعندها حق بس الاختيار يا سوني هو اللى فرق والاختبار هو اللى فرق

    مواقف صغيرة تبين الشخص اللى ادامك عاوزك ولا لاء

    مش حب بس ولكن مودة ورحمة وتفاهم ويكون عنده اصل ومثقف وحاجات كتيرة مع بعض

    ومش شرط تكون حبته قبل الخطوبة يعني ..

    لان عند تجربة بعد الخطوبة بيتغير حاجات كتير :(

    تقبلي مروري الممل الطويل

    ويارب نظل علي توااااصل دائمـــــــــآ ^_^

    ردحذف
  34. A32L MaGNoNa:اولا هرحب بيكي بصوت عالي اهو
    يامراااااااااحب يامراااااااااااااحب بالغاللين اللي شرفونا هنا
    البندقيه ياولد...طااااااااااااخ طااااااااااااااخ
    ههههههههههههههههه
    بصي ياميرو...الحمد لله الحمد لله اخينا مطلعشي ندل ولا حاجه
    اتكلمو خلاص والموضوع اهو دخل فمفاوضات اوسلو وربنا يمتها علي خيييييييير يارب
    اللهم امين

    ردحذف
  35. السلام عليكم

    طبعا انا اول مرة ازور مدونتك واتشرفت بيه جدا

    اما موضوع الجواز ففعلا لازم الواحد يختار كويس يعني مش جواز والسلام وربنا يكرم الجميع


    تحياتي

    ردحذف
  36. السلام عليكم

    بجد السؤال دا محير جداً وفعلاً مالوش إجابه ثابته
    يعني الموضوع فعلا بيختلف من حاله لحاله تانيه

    أحياناً الزواج التقليدي بتكون نتيجته حياه سعيده وجميله وأحياناً العكس

    وكذلك الزواج عن حب أحياناً بيقلب بعد الزواج لحياة صعبة ومشاكل وأحيانا بيفضل حلو وجميل

    فالموضوع في الأول والأخر قدر ونصيب
    ............
    في رأيي الشخصي إن الواحده تبحث في المقام الأول عن واحد يكون رجل بمعنى الكلمه
    يكون إنسان مستقيم في حياته ويكون بيخاف ربنا وعنده تقوى ويكون له عقليه تحترمها وتفكير تحس إنه ممكن يقود حياتها للأفضل

    فإذا وجدت في حياتها شخص بالمواصفات دي وحصل إعجاب أو حب بدون ما يكون فيه حاجه خطأ أو حرام فده يكون جميل جداً

    أما إذا ما صادفتش دا في حياتها فعليها أن تنتظر حتى تجد الشخص دا في زواج تقليدي


    دا لأن الصفات الكويسه وحسن المعامله ممكن يخلقوا الحب بعد الزواج
    أما الصفات الغير سويه فهي قادرة على قتل الحب بل وخلق البغض بعد الزواج

    بأشكرك وبأحييكي بجد على موضوعك المتميز

    ردحذف
  37. اختى الكريمة فى الغالب يجب ان نضع رأى الاهل فى العتبار و لاكن يجب ان يكون مناسباً و توجد راحة نفسية تجاه الشخص الاخر و لاكن توجد اساسيات لا يجب التنازل عنها أن يكون رجل بمعنى الكلمة ذو دين وخلق و شخصية سليمة و بعد ذلك البنت تفكر فى الموضوع بموضوعية و لا ترفض لمجرد انها مطلوبة فيمكن ان تظل ترفض الزواج حتى لا تجد من يتقدم لها بعد ذلك و تضطر الى التنازل عن بعض شروطها فى شريك حياتها .

    ردحذف
  38. عزيزتى سونى
    ازيك اخبارك اية؟ يارب افلح واعرف ابعت التعليق المرة دى
    بالنسبة لصاحبتك هى صح وبالنسبة لمامتها هى كمان صح لية بأة؟ لان كل واحد بيشوف الموضوع من وجهة نظرة وبناء عن تجاربة ورؤيتة للأشياءربنا يوفقها ويوفقك انتى كمان
    تحياتى يا قمر

    ردحذف
  39. الحمد لله

    ربنا يتمملها ع خير

    بس تحرص ولا تخونشي :D

    وميغسي ع الترحيب

    بس البندقية دخلت ف عيني عاجبك كدا :P :P

    ردحذف
  40. اها والله العظيم انا علقت هنا امبارح ؟؟

    ايه بقه ده انا شايفاه اتبعت وربنا

    بسم الله الرحمن الرحيم

    ردحذف
  41. ازيك ياقمر يارب تكوني بالف خير

    انا طول عمري مع الزواج التقليدي

    لكن الحب بحد ذاته جميل وهي ماشية صح وزي الفل من هنا لغاية ماتخلص جامعة هيبان اذا ليهم نصيب مع بعض ولا لأ

    وبنسبة لسؤالك فالجواز قسمة ونصيب مش لازم تكون تعرفه ممكن يحصل قبول من اول لقاء وربنا يسهل والجوازة تتم

    ربنا يوفقها ويسعدها يارب وانتي بالمثل :)

    ردحذف
  42. Haytham Alsayes:وانا معاك فنفس هذا الرأي بردك
    موش اي حد والسلام
    الفكره فكدا
    موش اي حد والسلام ارضاء للي حولينا وبس:)
    والشرف ليا طبعا بذياره المدونه:)

    ردحذف
  43. علاء سالم:بجد عجبني ردك جدا
    انت عندك حق
    بس كل اللي بتتمناه الوحده فعلا انها تلاقي فبيتها المستقبلي
    احساس بالحب وبالامان والاستقرار
    علشان كدا ممكن يعملو اي حاجه علشان خاطر البيت ده
    في اللي بيجاذفوا ويطلع معاهم حق...وفي اللي مجاذفتهم ملهاش اي قيمه بعد كدا
    وكله فالاخر قسمه ونصيب:)

    ردحذف
  44. akeed :مهي المشكله فكدا
    انها تفضل منتظره منتظره لحد ماتتناذل
    وبيخوفونا من اللحظه دي
    انها هتوصل لدرجه التناذل
    علشان كدا بتلاقي بنات كتير اوي ممكن تقبل بأي حد يجلها
    وانا بكره كدا اوي
    التدخلات المستمره والكلام الكتير اللي بيوصل للتجريح
    ربنا ميوري حد ابدا:(

    ردحذف
  45. Single Mummy:الحمد لله ان تعليقك وصل:)
    هو الفكره ان الكل شايف فكرته صح تبعا لافكار الجيل
    اللي اتعود عليها وكبر وشافها لقاها حوليه
    امال تصادم الاجيال بيجي منيييييييين؟؟؟؟

    ردحذف
  46. A32L MaGNoNa:يارب يتملها علي خيييييييير
    يارب
    اللهم امين
    ويخلي لينا نفسنا فمفاوضات اوسلو:)
    والترحيب دا بالحيايب بس:)
    وكل اللي هنا حبيايبي علشان كدا برحب بيهم احسن ترجيب
    ترحيب الصعايده بقي موش اي كلام
    ولاا تقلقي دي بندقيه صوت بس

    ردحذف
  47. мαησηα :طب دروي عليه كدا
    هيكون راح فين يعني
    كب شوفي فوق الصور ولا وسط الكومنتات ؟؟؟

    ردحذف
  48. نـــوارة :ميرسي ليكي ولكلامك بجد شكرا ليكي:)

    ردحذف
  49. ياحبيبتى ربنا يسعدك ويسعد صاحبتك يارب
    والام عايزه لبنتها احسن واحد من وجهه نظرها وهنا ياتى الخلاف فى وجهات النظر



    ربنا ييسرلهم كل خير

    ردحذف
  50. GiGi world :اكيد طبعا كل ام نفسها فكدا
    بس للاسف ان كل واحد شايف نفسه صح وموش بيسمع للتاني
    لا الكبار بيسمعو اللي هيكونو بيوتهم هما عوذين ايه
    ولا الصغيرين بيسمعو للكبار وخبرتهم فالحياه
    ربنا يهدي الجميع وييسر السبل يارب:)

    ردحذف