قصاقيص من الحياه

(أرتعشت كثيرا..ثم أغمي عليها)
مالك في ايه..؟
ونظره غامضه
تلاها نظره من الاخري عندما فاقت

مش انتي اللي اعرفها..مالك حصل ايه
ثم صمت رهيب
وخرجت

- طمنيني عليكي لما تروحي
بحبك وانتا بتطمن عليا لما بروح

- قلت لك تروحي مكانها (بصوت عالي)
ونظره غريبه .. اول مره تبص كدا لحد
ينفع كدا يعني الصوت العالي دا ادام الناس
معلش حقك عليا..سمعت خبر وتعبني نفسيا
خير...؟؟
وكلام كتير اوي وراه

-معقوله ..هي لحقت
حامل؟
وكمان باين عليها
طب البت دي مقالتش ليه علشان نبارك ليها
يمكن خيفه من الحسد ولا حاجه
طب نعمل مقلب يعني فيها ولا؟

سبيها هي لما تيجي تقول وساعتها نفكر نعمل فيها ايه
حـــــــــرام عليكي..خليها تتجنن وتعملها بس

-يسلم فمك يعوكشه
يادي النيله حد بيتفرج عليه لحد دلوقتي
طب اقولهم ايه طيب...بيتفرجو علي عكاشه

مهما زمان قالو عليه مجنون وكلامه طلع صح
طب اقولها ايه طيب...بتشوف عكاشه وباسم
الاتـــــــــــــنـــــــــــــــــــيـــــــــــــــن

- يخربيت قرف المواصلات والوقت اللي بتسرقه

وصوت تسمعه
(شايف البحر شو كبير...كبر البحر بـــــحــبـــك)

أحم
طيب ومالو 
خلينا نسمع فيروز أهي تروق الاعصاب شويه
علي النعمه السواق دا بيفهم

-مش عرفه أقلك ايه يبنتي
أحكي هو هتلاقي حد غيري يعني يسمعك
بصي
انا معجبه بيه أوي
بس مش عرفه أعمل ايه
ولا حاجه
خلي اللي فقلبك...جواكي
أيــــــــــــــه...ليه كدا
هتروحي تقوليله انك معجبه بيه يعني
(صدمـــــه)
لا مينفعش...اني بنوته محترمه ومينفعش انتي اللي تروحي الاول
لازم يجي هو ويكلمك وتحصل كل حاجه بعد كدا
بجد
اها بس بالعقل
طيب وبعدين
ولا قبلين..سبيها علي ربنا يحلهالك من عنده
يــــــــــــــــــــــــــــــــارب..نفسي بقاااااااا
بــــــــــــــــــــــــنــــــت..أتقلي فضحتينا

-اول ماتقع عيناها علي جورنال التحرير صباحا
مربعات الابنودي..

عامِل لى فيها (راسِ الغُول)

ونافخْ لى صَدْرك ع الفاضى؟

بكرة يِقُولُوا انْتَ المسؤول

وتْلاقى قُدَّامَك قاضي

الله عليك ياخال

-لوك لوك لوك لوك لوك
(بنات مع بعض والنميمه الصباحيه)
خلصو رغي..ورانا شغل بعد دقيقيتن

يخربيتك ..انتي عمله زي السيسكو كدا ليه

هوا احنا جيين نشتغل ولا نرغي
طيب قومي يلا من هنا

- أنتي عرفه هو عملي ايه؟؟
دا قتلني
قتلك ازاي..
قتل براءه البنت من جوايا
اه معمليش حاجه..بس دا محبنيش
امال كنتي فكره ايه
؟
قلت ليكي من الاول دا مش بني أدم..دا حيوان درجه اولي

بيعرف البنت من دي وبيسحب روحها  وبيقلك فالاخر بمزاجكك

تفتكري دا بني أدم بيحب
سبيه كدا يومين ولا تردي عليه
(بعد يومين من التفكير)
قررت أسيبــه
طيب هتقدري...هقدر وربنا يساعدني
بصي قومي اتوضي وصلي ركعتين وادعي من جواكي وهتلاقي ربنا جنبك
(بعد 5أيام)
ها ايه الاخبار
الحمد لله أتحسنت اوي ..بس هو,امممممم
مالو
عمال بيكلمني وبحاول مااردش عليه..مش هخبي عليكي ضعفت وكلمته مره 
قالي انا مش وحش
بس أعمل ايه فنفسي..خليكي جنبي وساعديني

ردت وقالت
خلاص...انتي قرري من نفسك هتعملي ايه
محدش بيساعه النفس..غير النفس

وصــــــــــــــــــمــــــــــــــــــــــــــــت

-بصي هوا لونو ارزق فاتح
النيلي يعني
لا..لون الزهري بتاع الغسيل دا
اها ..امو ولا برسيل,حيريتيني كل دا علشان فستان خطوبه,امال فالفرح هتعملي ايه؟؟
يلا علشان عوزا أخلص منك بأه..دا انتي بقيتي هم علي قلبي
 يلهوي,من الواضح كدا انك بتحبيني
اوي يـــــــــشيخه ويلا خلصيني دا انتوا هم علي القلب  
 

-أزيك ياطنط عمله ايه
انتي بقا اللي بتتصلي كتير
عرفتك من صوتك

طب ودا شيء كويس ولا وحش
مااعرفشي بقا
قولي لنفسك  

-كل سنه وانتي طيبه يممتي
ياريت هديتي تعجبك

وانتي طيبه ..يبنتي ليه كدا بس,حد قالك انا عوزا حاجه
بصي بقا انا جبتها وصرفت أخر مليــــن(مليم)معايا

أسمها مليم
طيب خلاث

بحبك اوي علي فكره


                      أنا بقالي كتير مكتبتش فمدونتي
                   فأتمني أن التدوينه دي تعجبكم لانها
                  بتبقي جزء من يوميات أي حد فالحياه

  
  
          
  
   

الامنيات في العام الجديد ... 2013

كل سنه وكل اللي بنحبهم طيبين يارب وبخير

بقالي فتره مدخلتش مدونتي او المدونات التانيه وعرفت ايه الاخبار
كان في مليون حاجه حصلت والحمد والشكر لله قبل كل شيء ان مازلنا عايشين 
(الفقره اللي جيه لونها موف هاند ميد علشان الاحداث)
باسم يوسف أستايل:)

لكل واحد فينا امنيات دائما فباله وفكل خطوه بيخطيها بتفضل هي موجوده ادامه وبيحاول علي مدار حياته يحققها

أما اللي فقائمتي فلم تزالي  ماهي مأثرتشي اوي الاحداث او بأي حاجه بتحصل

تلت او أربع حاجات نفسي فيهم من يوم ماوعيت علي الدنيا دي
واللي بيجري فيها
-نفسي اموت وربنا راضي عني واشوف رسولنا ويمدلي ايده 
مش خيفه من النار اد مانا خيفه ان ربنا يكون زعلان او غضبان مني
 -كل حد فينا عاوز يشتغل شغل كويس...انا نفسي اكون كويسه فأي مجال انا بشتغل فيه وبحبه وانا بحب شغلي حتا لو متعب وحتا لو مفيهوش انصاف بس كفايه عليا اني اكون متقدمه فمجالي وان يكون شغلي هو أحسن من اللي حوليا ودا بيسعدني جدا حتا لو بيتعبني اوي

-امنيتي ...اللي من جوايا وي
لما تحب حد اوي ويسيبك اوعي تزعل
انتا اتقيت ربنا فيه ومظلمتهوش وخنته او عملت حاجه من وراه وكنت عاوز تكون فالنور معاه فعلاقتك وفحلال ربنا
ويسيبك اوعي تزعل
ربك بعد الشر عنك وفيوم من الايام
ربنا هيكرمك بحد هيحبك اوي بجد لدرجه من حبه فيك انتا هتحبه عشان هو حبك اوي 
هتحبه لانه دعا ربنا من جواه انه يلاقي حبيب بجد وبتطس فيك بقا(الجمله دي من عندي )
وتلاقي نصك التاني المجنون شبهك او مختلف عنك بس فلحظه مش هتعرف تستغني عنه وتقول الحمد لله انك رزقني يارب بحاجه جميله اوي وفحلالك .. هتبص لنفسك فالمرايه وتبتسم وتفتكر كلامي
وهتقول الحمد لله علي كل اللي مريت بيه
وتفتكر الايه اللي حطتهالك خصوصي ولنفسي قبل كل شيء

-كل عيان يخف ...
الحته دي ياما بتتعب اوي
يارب اشفي كل مريض

-مــــــــــــــــــــــــــصـــــــــــــــــــــــــــــــــر
ياللي وجعالي قلبي
بدعي انك تكوني أحسن من اي بلد فالدنيا
بس مش عرفه الدنيا مودياكي علي فين
اسمع كلام اهلي وأسيبك وأهاجر
وانا مش عوزا دا
وبقاومه

انا عرفه انك مش فندق وقت ماالدنيا تبوظ هسيبك وأمشي
مهو لازم يكون في ناس موجودا علشان تصلح وانا عوزا أكون موجودا وقت التصليح

يرجعوا يقلولي ولو وقعتي ولا حصلك حاجه مين هيهتم بيكي؟؟

برجع افكر تاني
 نفسي امورك تتصلح
بأيدينا

يارب

هي دي قائمه أمنياتي

ونفسي ان كل الناس متنساش

أجمل واحلي حاجه لينا



تكاتفنا مع بعض

لحظه حلوه تجمعنا

فرحه جميله بتضم الكل

حتا الحزن لما بيجي...

بيخففه أيد تتطبطب عليك



سنه سعيده أن شاء الله

وتحققوا كل اللي انتو عوزينوا



:)                 

      

حداد علي الارواح اللي لسا ماكبرتش

الامنيه (५)

السؤال اللي ديمن فبالي

ليه كل الناس مبتحبش بعض
بسهوله كدا؟؟

نفسي وأمنيه من أمنياتي تتحقق

ليه مش بنحب بعض
ليه حبيب وحبيبه بس

مهو في حب تاني
حب الاب لولاده والام كذلك
حب الصاحب لصاحبه لدرجه ان لو حصله حاجه ممكن يموت معاه
حب الواحد لوطنه ودي فدم أي حد بيحب بلده بجد

ليه الصوره قاتمه أوي
ليه منصحاش الصبح ونقول (الحمد لله يارب...بحبك أوي انك ادتني يوم جديد
أعيش فيه مبسوط وأحاول أحب بجد واعمل الحاجه اللي بحبها)

اه في كراكيب ونغبشه فرؤيتنا للحاجات حولينا
في صراع وفي كره
والمصيبه اننا بنعلي صوتنا بأننا بنكره
لكن لما بنحب....صوتنا بيكون واطي أوي

دا حتا الحب صحي ياجدع

لما تلاقي حد بيهتم بيك(ابوك ,امك,صحبك,حبيبك,جوزك...)
دي نفسها حاله تحمد ربك عليها

تلاقي حد بيهتم بيك
يطبطب عليك...يخاف انك تتوجع
يتحملك ويتحمل جنونك

بالذمه بعد دا كلو منحبش حتا نفسنا

دا حتا الاسلام أنتشر بحب الناس لبعضها
وبحب كل حاجه أحنا بنعملها وبنخلص ليها

انا بحب
ربنا
اهلي
اصحابي
كل حاجه حوليا حتا الهوا اللي بتنفسه

بحبه

وبقول لكل حاجه بتفرحني وبحبها

شكرا...
لكل حاجه خلتني سعيده ومبسوطه وجنبي ديمن
وانا فقمه جناني وجنوني
فقمه زعلي وفرحي

حتا وأنا سكته وشارده
بيكون في مليون حاجه تخليني أحب

يبقي نكره ليه
انا مبحبش أكره
مبعرفش أكره...اه في حالات ببقي مخنوقه وساعات ناس بيوصولتي لحاله اني هكره نفسي

بس بلاقي حبيبي ربنا يبعتلي حد يرجعني لقلبي وحبي لكل حاجه تاني

الحمد لله
علي نعمه ....الحب

الامنيه (४)

-ممكن برساله صغيره...تكون أسعد
بني ادم فالكون كله

-هل تعرفون سر...أرنبه الانف؟؟

-السعاده ماهي الا
أحساس داخلي

يأتي حينما....
تنظر اليه ,بالنسبه لها


-هل تري
ماحدث لها

انها ولأول مره....سعيده فعلا
مع كل ماحدث ويحدث حولها
قررت ان تترك كل ماكان ورائها
(وتعيش اللحظه)

-نظره,فكلمه
فحديث
فلقاء

فشعور يسري ألي أبد الابدين

-هل وجدتيه
.....نعم,واخيرا

أستطيع قولها للعالم كله
وجدته منذ ولادتي,بقلبي
وجدته منذ لحظه تنفسي ,بروحي
انه نصفي الاخر


-برغم من الظلام
هناك بصيص نور
بالقلب

-مهما قيل من أغاني او وصف
مهما كان الصوت او الكلام

فما بالقلب
يبقي في القلب

-الحياه كلها
للانسان
تتخلص في لحظه
قد تكون
سعاده
كره
غضب

لكن مااسعده حينما تكون تلك اللحظه
لحظه حب(بجد من القلب)

_يارب كل الحياه تبقي


♥

الامنيه (३)

التحرش...
كل ماافتح الموضوع دا قلبي بيتقبض

كل مابسمع الكلمه دي بحس بأحساس رهيب
ببقي عوزا أجري من المكان

ماحدش يعرف أحساسها الا البنات اللي مروا بالتحربه دي أو شافوها بعيونهم

اول مره عرفت يعني ايه تحرش كان لفظي وكان أبتتدي بمعاكسات
ووصل مرحله التطور طبعا للي بنشوفوا دلوقتي
واللي بسببه بقينا بنكره العيد

لانها الايام الوحيده اللي بيبقي نفسنا نخرج فيه
ونروح ونيجي فرصه نشوف قرايبنا واصحابنا
ونبعد شويه عن الشغل وقرفه
فبنتقرف أكتر

طب أحنا نخرج امتا علشان نقدر نفك بعد شغل البيت والشغل غير فالعيد اللي بنقضيه فالبيت خوفا من ان يحصلنا حاجه فالشارع

بسبب دا ماتعرفش أيه بيحصل للبنت
لحظه التحرش دي أسوء لحظه ممكن تمر بيها اي كائن يحمل تاء التأنيث
بتحس أن كرامتها وجسدها انتهك...وحتا ملهاش اي وجه حق انها تستنجد بأي حد او تصرخ
ولو صرحت فهي عرفه ان اللي حوليها هيقلولها(مهو لبسك ضيق وانت السبب,ايه اللي خرجك اصلا من البيت)
هوا يعني مانخرجكش مثلا .....هل دا هيحل المشكله
طب المشكله فالولد ولا البنت

يسلام...انتا جي تقول ولد ولا بنت
طب ماتقول فين التربيه

؟؟؟
تعرفوا ان اصلا المتحرش دا اخته وقرايبه بيحصل فيهم كدا
بس مابيقدروش يتكلمو....عرفين ان ماحدش هيحس بيهم
حتا المنتقبات والمتبرحات والمحترمات وكل واحدا ايا كان تعليمها ونوعها
بيحصل فيها اللي بيخليها تتمني ان الارض تنشق وتبلعها

مواقف التحرش حصلت ادامي كتير
مره كنت فدرس عند صحبتي وكنا انا وهي طلعين من المدرسه وكنا فبيتها
وأحنا طالعين دخل ولد مانعرفش هوا مين
وهي كانت ورايا ...لقيتها صرخت مره واحدا
الولد ضربها من وراها وجري

ولدتها ووالدها وقرايبها والمدرس جريو أفتكرو حصلها حاجه
كل اللي فكراه ان شوفت فعنيها نظره انكسار
عمري مشفتها فيها

النظره دي لحد دلوقتي موجوده ...
تخيل انها من ساعتها اتغيرت
الضحكه راحت وكأن روحها اتسحبت منها
ماعدتش بتتكلم زي زمان
الاخطر انها بعدت عن كل الناس......حتا عني انا

المره التانيه كنت مع شله في الجامعه
وكلنا كنا خرجين فوسط البلد

فمشينا فشارع جانبي
مدينا شويه وكان في بنت فالاخر
فجأه لقيناها صرخت

الولد مسكها من صدرها
انهارت تماما

الولاد جريوا وراه ماعرفوش يمسكوه
من ساعتها وهي محطمه
سنتها مادخلتش الامتحانات بالرغم من اننا اتحايلنا عليها
انها تمتحن
ولا كاننا بنتكلم معاها
هي فودا واحنا فوداي
لحد ماقدرنا لحد ما نخرجها من الحاله دي ألي حد ما

احب اقولكوا
ان مره كنت بتكلم مع والد واحدا زمليتي

من أنصار(ايه اللي خرجها مهي السبب بلبسها)
وكانت لسا بنته متعرضه لموقف من المنيلين دول
كلمني بصوت عالي بنفس الجمله
البنات السبب.........

قلتلو وايه رأيك يعمو فالمواقف دي
بص علي بنته وهو بيتكلم لقاها دمعت
ببصلها اوي كدا
انفجرت
حكتله اللي حصلها

سكت


هل تعرفوا ان اللحظه دي بتكسر اوي
وبتولد طاقه
ممكن نكسر بيها اي بني ادم ادامك
مبنقدرش نعمل حاجه
فبنتضطر تنتظوي علي نفسها

وفالاخر بيقولك دا عيب مين
عيب ولد مااترباش
ولا عيب بنت كل ماتيجي تخرج يقولها لبسك وشوفي لبسك
ولا عيب تربيه كل الناس بتشتغل وتيجي تطلع كبتها فالعيال تقوم تضربهم فبيطلعوا مشوهين
ولا عيب مجتمع بيخرس الضعيف ويخلي القوي يكمل فطغيانه

ولا عيب مين
ونصلح ازاي

ومازال السؤال قائما؟؟

هل حد هبقدر يعمل حاجه
قبل مايجي اليوم اللي هنلاقي فيه
ان واحد ماشي ورا واحدا بدل مايعاكسها
يغتصبها؟؟؟؟؟

ممكن توصل لكدا
واحب اصدمكوا
انها ممكن توصل للدرجه دي

اه ممكن
لان مافيش وازع او رادع

طب واخرتها
هتتحل ازاي

الله اعلم

الامنيه (२)

أكتر حاجه فالحياه بكرهها
الفلوس

عمري ماكرهت حاجه أو انا من النوع اللي
مبعرفش أكره...لابني أدمين ولا أكل
ولا اي حاجه
ماعدا....الفلوس

أمنيتي فالحياه انها تختفي
حسه ان المشاكل هتنتهي بأنتهائها

يمكن سذاجه...يمكن جنان
بس دا أحساسي

لما حد بيحب حد يتضر يسيبه علشان الفلوس
وحتا لو قدر يرتبط باللي بيحبه بردو
متضطر يشتغل ويبعد بالايام علشان خاطر الفلوس

لما صاحب يبيع صاحبه او حتاقريبه
يخونه وأحيانا توصل لدرجه القتل

كل دا ليه
ورق ملهوش لازمه الا فالعالم اللي أحنا
عايشين فيه

من يوم ماأتولدت بكره الفلوس
أول ضربه فحياتي كانت بسبب الفلوس
اول غدر...اول خيانه ثقه
أول كل حاجه شر حصلت فحياتي كانت بسبب الفلوس

منكرش أنها مهمه
بتبني وتعمر

بتكبر وتأكل وتعيش
تعمل مستوي هايل للي بيكنزها أوي

وأحيانا كتير ممكن تنقذ
عيان تجيب ليه دوا
عمليه محتاجها مريض

اتنين يتجوزوا بعض
بيت بيكبر

بس بردو هتفضل أمنيتي

ان كل حاجه نعيشها من غير ماالفلوس تتدخل تبوظها

بحسها بتغرب الكل عن بعض علشان يقدرو يعيشوا
الاهل عن بعض
الام والاب
الزوج والزوجه
سفر الاولاد وعدم سؤالهم

بتوصل لدرجه قتل شعوب...كل دا علشان ورق

هي السبب اللي وصلتني لكتابه الجمله اللي مبحبش أسمعها او اكتبها

(زمان كان عندي وقت اني أكل الشكولاته بس مكنش معايا تمنها.......
دلوقتي أقدر اجيب الشكولاته ,بس ماعنديش وقت أني أكلها )